പുതിയ നിര്മ്മാണ കമ്പനിയുടെ ലോഗോ പുറത്തിറക്കി നടന് ദുല്ഖര് സല്മാന്. 'വേഫേറര് ഫിലിംസ്' എന്ന പേരിലുള്ള നിര്മ്മാണ കമ്പനിയുടെ ലോഗോയാണ് താരം ഫെയ്സ്ബുക്കിലുടെ പുറത്തുവിട്ടത്. അച്ഛന്റെ കൈപിടിച്ച് നടക്കുന്ന കുട്ടിയോടു കൂടിയ ലോഗോ ആരാധകര് ഏറ്റെടുക്കുകയും ചെയ്തു.
എന്നാല് ആ അച്ഛനും കുട്ടിയും മമ്മുട്ടിയും ദുല്ഖര് സല്മാനുമാണ് എന്നായിരുന്നു ആദ്യം അഭ്യൂഹം ഉയര്ന്നത്. ഇത്തരത്തില് നിരവധി പേര് അത് മമ്മുട്ടി തന്നെയാണെന്ന് കമന്റുകളില് ഉറപ്പിക്കുകയും ചെയ്തു. അഭ്യൂഹം പരക്കുന്നതിനിടെയാണ് ലോഗോയിലുള്ള കുട്ടി ആരെന്ന് വ്യക്തമാക്കി ദുല്ഖര് രംഗത്തെത്തിയത്. ഇന്സ്റ്റഗ്രാമില് ലോഗോ പങ്കുവെച്ചപ്പോള് 'മേരി ഇന് സ് ലോഗോ' എന്ന ഹാഷ്ടാഗും ചേര്ത്തതോടെയാണ് അഭ്യൂഹം അവസാനിച്ചത്. ലോഗോയിലുള്ളത് ദുല്ഖറും മകള് മറിയവുമാണെന്ന് അതോടെ വ്യക്തം.
ദുല്ഖറിന്റെ നിര്മ്മാണ കമ്പനി മൂന്നു സിനിമകളാണ് പ്രഖ്യാപിച്ചിരിക്കുന്നത്. നവാഗതനായ ഷംസു സൈബ സംവിധാനം ചെയ്യുന്ന ചിത്രം, ശ്രീനാഥ് രാജേന്ദ്രന് സംവിധാനം ചെയ്ത് ദുല്ഖര് തന്നെ നായകനാവുന്ന 'കുറുപ്പ്', സുരേഷ് ഗോപി, ശോഭന, കല്യാണി പ്രിയദര്ശന് എന്നിവര് പ്രധാന കഥാപാത്രങ്ങളാകുന്ന അനൂപ് സത്യന് സംവിധാനം ചെയ്യുന്ന ചിത്രം എന്നീ ചിത്രങ്ങളാണ് വേഫേറര് ഫിലിംസ് പ്രഖ്യാപിച്ചിരിക്കുന്നത്.
