പ്രമുഖരായ പലര്ക്കും തങ്ങളുടെ വ്യാജമരണവാര്ത്ത പലപ്പോഴും നേരിട്ട് കാണേണ്ടി വന്നിട്ടുണ്ട്. നടന് സലീം കുമാറും ശ്രീനിവാസനും ഒക്കെ ഈ വ്യാജവാര്ത്തയ്ക്ക് ഇരയായിട്ടുണ്ട്. നടി രേഖ കഴിഞ്ഞ ദിവസം തന്റെ വ്യാജമരണവാര്ത്ത കൊടുത്ത യൂട്യൂബ് ചാനലിനെതിരെ പരസ്യമായി രംഗത്ത് വന്നിരുന്നു. ഇപ്പോള് അഭിനയ കുലപതി നടന് മധുവും വ്യാജമരണവാര്ത്തയ്ക്ക് ഇരയായിരിക്കുകയാണ്. മധുവിന്റെ വ്യാജമരണവാര്ത്ത സോഷ്യല് മീഡിയയിലാണ് ആദ്യം പ്രചരിച്ചത്.
''വാര്ത്ത വായിച്ചവരില് പലരും തന്നെ നേരിട്ട് വിളിച്ച് അന്വേഷിച്ചു. 'ആരാണ് ചെയ്തതെന്നറിയില്ല. ഫോണ് ശബ്ദിച്ചു കൊണ്ടേയിരുന്നു. ഒടുവില് ഓഫാക്കി വച്ചു. ഇന്ന് രാവിലെയാണ് വീണ്ടും ഓണാക്കിയത്. ഇപ്പോഴും ഈ വാര്ത്തയുമായി ബന്ധപ്പെട്ട് അന്വേഷണം വരുന്നുണ്ട്. ഇതിനൊക്കെ പ്രതികരിക്കേണ്ട കാര്യം തന്നെയില്ല. ഞാന് വീട്ടില് തന്നെയുണ്ടായിരുന്നതു കൊണ്ട് വീട്ടുകാര്ക്ക് ടെന്ഷനായില്ല. പക്ഷേ, ദൂരെയുള്ള ആളുകളുടെ ഉറക്കം പോയി. ഇത്തരം സംഭവങ്ങളെ ഒരു മാറ്ററാക്കാന് പോലും ഞാന് ആഗ്രഹിക്കുന്നില്ല.'' തന്റെ മരണവാര്ത്ത പ്രചരിച്ചതിനെ കുറിച്ച് ഒരു മാധ്യമത്തോട് മധു പ്രതികരിച്ചു.
