ലോകത്തെ ഏറ്റവും മാരകമായ സ്ട്രൈക്കിംഗ് ജോഡി ഏതാണെന്ന് ചോദിച്ചാല് സ്പാനിഷ് വമ്പന്മാരായ ബാഴ്സിലോണയുടെ ലിയോണേല് മെസ്സി - ലൂയി സുവാരസ് കൂട്ടുകെട്ടാണെന്ന് നിസ്സംശയം ആരും പറയും. ഗോളടിച്ചും ഗോളടിപ്പിച്ചും ഇരുവരും കളത്തില് അസാധാരണ ഒത്തൊരുമ കാട്ടുമ്പോള് ഇന്നലെ വലഡോയ്ഡിനെതിരേ ഇരുവരും നേടിയത് അസാധാരണമായ നേട്ടങ്ങള്. ലയണേല് മെസ്സി കരിയറില് 50 ഗോളുകള് നേടിയപ്പോള് സുവാരസ് ക്യാമ്പ് ന്യുവില് എതിരാളികളായ എല്ലാവര്ക്കിട്ടും ഗോളടിക്കുന്ന താരമായി മാറി.
അര്ജന്റീനയുടെ ഇതിഹാസ ഫുട്ബോളര് കരിയറില് മറ്റൊരു നേട്ടവും നടത്തി. ഫ്രീ കിക്കുകളില് നിന്നും 50 ഗോളുകള് നേടുന്ന താരമായി മാറാനും മെസ്സിക്കായി. ഇതില് 44 ഗോളുകള് താരം നേടിയത് ബാഴ്സിലോണയ്ക്ക് വേണ്ടി മാത്രമായിരുന്നു. ആറ് ഗോളുകള് അര്ജന്റീന ദേശീയ ടീമിന് വേണ്ടിയും കുറിച്ചു. ഇന്നലെ രണ്ടാം പകുതിയില് 75 ാം മിനിറ്റിലായിരുന്നു മെസ്സിയുടെ അമ്പതാം ഫ്രീകിക്ക് ഗോള് വന്നത്. 2008 നവംബറില് ബാഴ്സിലോണയുടെ സ്വന്തം മൈതാനമായ ക്യാമ്പ് ന്യൂവില് അത്ലറ്റിക്കോ മാഡ്രിഡിനെതിരേയായിരുന്നു മെസ്സിയുടെ ആദ്യ ഫ്രീകിക്ക് ഗോള്.
50 ഫ്രീകിക്ക് ഗോളുകളുടെ ക്ളബ്ബിലെത്തുന്ന എട്ടാമനാണ് മെസ്സി. ഏറ്റവും കൂടുതല് ഫ്രീകിക്ക് ഗോളുകള് നേടിയിട്ടുള്ളത് ഫ്രഞ്ച് ക്ളബ്ബ് ലിയോണിന്റെ മുന് താരം ജുനീഞ്ഞോ പെര്ണാമ്പുക്കാനോയാണ്. 1994 നും 2012 നും ഇടയില് ഈ ബ്രസീലിയന് താരം നേടിയത് 77 ഗോളുകളായിരുന്നു. തൊട്ടു പിന്നില് ഫുട്ബോള് ഇതിഹാസം ബ്രസീലിന്റെ തന്നെ പെലെ 70 ഗോളുകളുമായി നില്ക്കുന്നു. മറ്റൊരു ബ്രസീലിയന് താരമായ റൊണാള്ഡീഞ്ഞോയും അര്ജന്റീനക്കാരന് വിക്ടര് അന്റോണിയോ ലഗ്രോറ്റാലിയും 66 ഗോള് വീതം നേടി മൂന്നാമതുണ്ട്.
ഈ നേട്ടത്തില് മുന്നിലുള്ള ലാറ്റിനമേരിക്കന് താരങ്ങള്ക്കൊപ്പം യൂറോപ്പില് നിന്നും ഡേവിഡ് ബെക്കാം മാത്രമാണുള്ളത്. മാഞ്ചസ്റ്റര് യുണൈറ്റഡിനും ലോസ് ഏഞ്ചല്സ് ഗ്യാലക്സിക്കും ഇംഗ്ളണ്ടിനുമായി ഫ്രീ കിക്ക് ഗോളുകള് നേടിയ ബെക്കാം 65 തവണയാണ് ഫ്രീകിക്ക് വലയിലാക്കിയത്. മെസ്സി 50 ഫ്രീ കിക്ക് ഗോളുകള് നേടിയ മത്സരത്തില് സഹതാരം ഉറുഗ്വേയുടെ സുവാരസും മറ്റൊരു നേട്ടം ഉണ്ടാക്കി.
ലാലിഗയില് മത്സരിക്കുന്ന 27 ടീമുകള്ക്കെതിരേയും ക്യാമ്പ് ന്യൂവില് ഗോള് നേടിയ താരമായി സുവാരസ് മാറി. മുഖ്യ എതിരാളി റയലിനെതിരേയാണ് ഏറ്റവും കൂടുതല് ഗോളുകള്. ഇതുവരെ 10 കളിയില് ഒമ്പത് ഗോളടിച്ച സുവാരസ് രണ്ടു അസിസ്റ്റും ചെയ്തിട്ടുണ്ട്. ഇന്നലെ റീയല് വലഡോയ്ഡിന് എതിരേ ബാഴ്സിലോണയുടെ അവസാനഗോള് നേടാന് സുവാരസിന് അവസരമൊരുക്കിയതും മെസ്സിയുടെ സുന്ദരന് ത്രൂ ബോളായിരുന്നു.
