ഒരിക്കല് മുഖം തിരിച്ചവരുടെ മുന്നില് അഭിമാനത്തോടെ ജീവിക്കുകയാണ് ട്രാന്സ് വുമണ് രഞ്ജു രഞ്ജിമാര്. കേരളത്തിലെ ആദ്യത്തെ സെലിബ്രിറ്റി ആന്ഡ് ബ്രൈഡല് മേക്കപ്പ് ആര്ട്ടിസ്റ്റാണ് രഞ്ജു. തന്റെ 22-ാമത്തെ വയസിലാണ് ഈ മേഖലയിലേക്ക് രഞ്ജു കടന്നു വന്നത്. തന്റെ മേഖലയില് പ്രാവീണ്യം നേടിയ രഞ്ജു, കൂട്ടുകാരോടൊപ്പം ട്രാന്സ്ജെന്ഡേഴ്സിന് തൊഴില് പരിശീലനം നല്കുവാനായി ദ്വയ ട്രാന്സ്ജെന്ഡേഴ്സ് അക്കാഡമിയും ആരംഭിച്ചു.
രഞ്ജുവിനെ കൂടാതെ ശീതള് ശ്യാം, സൂര്യ ഇഷാന്, ദീപ്തി കല്യാണി, അനീന, മോനിഷ, മീനു എന്നിവര് ചേര്ന്ന് 2018ല് ആരംഭിച്ച ഈ സംഘടനയില് ഇപ്പോള് എഴുപതിലധികം അംഗങ്ങള് ഉണ്ട്. കേരള സര്ക്കാരിന്റെ കീഴില് പ്രവര്ത്തിക്കുന്ന ഈ സ്ഥാപനത്തില് സൗജന്യമായാണ് ബ്യൂട്ടീഷ്യന് കോഴ്സ് പരിശീലിപ്പിക്കുന്നത്. '' തൊഴിലെടുത്തു ജീവിക്കുന്നത് സമൂഹത്തിന്റെ ഭാഗമാണ്. ഭിന്നലിംഗക്കാര്ക്കായി ഒരുപാട് സംഘടനകള് ഉണ്ടെങ്കിലും സ്വന്തം കഴിവുകളെ വളര്ത്താനും ഒരു തൊഴിലാക്കി മാറ്റുവാനുമുള്ള അവസരങ്ങള് വളരെ കുറവാണ് അങ്ങിനെയാണ് ഇത്തരമൊരു ആശയത്തിലേക്ക് എത്തിയത്. സമൂഹം ഒരിക്കലും ഞങ്ങളെ മനുഷ്യരായി കാണുന്നില്ല. ഞങ്ങളും മനുഷ്യരാണ്'' രഞ്ജു പറയുന്നു.
2016ല് ജനപ്രിയ മേക്കപ്പ് ആര്ട്ടിസ്റ്റിനുള്ള അവാര്ഡും സ്വന്തമാക്കിയ രഞ്ജു മലയാള സിനിമയിലെ നിരവധി താരസുന്ദരികളെ അണിയിച്ചൊരുക്കിയിട്ടുണ്ട്. കാവ്യാ മാധവന്, തമന്ന, ഭാവന, മമ്ത, മീരനന്ദന്, നവ്യ നായര്, ശ്വേത മേനോന്, മീന, അനുശ്രീ, റീമ കല്ലിങ്കല്, മിയ തുടങ്ങിയ താരങ്ങളെ രഞ്ജു അണിയിച്ചൊരുക്കിയിട്ടുണ്ട്.
