ഇന്ത്യന് സിനിമയുടെ എണ്പതുകളിലെ താരങ്ങള് ഓര്മ പുതുക്കി വീണ്ടും ഒത്തുചേര്ന്നു. ഇതിന്റെ ചിത്രങ്ങള് സോഷ്യല് മീഡിയയില് തരംഗം സ്യഷ്ടിച്ചിരുന്നു. എന്നാല്, ഈ സൗഹൃദക്കൂട്ടായ്മയില് മെഗാസ്റ്റാര് മമ്മൂട്ടിയുടെ അസാന്നിധ്യം ആരാധകരെ നിരാശരാക്കിയിരുന്നു. ഇപ്പോഴിതാ റീയുണിയനില് മമ്മൂട്ടി പങ്കെടുക്കാതിരുന്നതിന്റെ കാരണം വെളിപ്പെടുത്തിയിരിക്കുകയാണ് നടി സുഹാസിനി.
ഇന്സ്റ്റഗ്രാമില് സുഹാസിനി പങ്കുവച്ച ഫോട്ടോയ്ക്കു താഴെയായിരുന്നു ആരാധകരുടെ കമന്റ് . 'ഫോട്ടോ വളരെ നന്നായിട്ടുണ്ട്. പക്ഷേ മമ്മൂക്കയെ കാണുന്നില്ലല്ലോ' ഒരാരാധകന്റെ ചോദ്യം.
'ഒരു പ്രധാനപ്പെട്ട ബോര്ഡ് മീറിങുമായി ബന്ധപ്പെട്ട് അദ്ദേഹം തിരക്കിലായിരുന്നു. അടുത്ത വര്ഷം ഉണ്ടാകുമെന്ന് പ്രതീക്ഷിക്കുന്നു' ആരാധകന്റെ ചോദ്യത്തിന് മറുപടിയായി സുഹാസിനി പറഞ്ഞു.
സിനിമാ ഇന്ഡസ്ട്രിയിലേക്ക് ഒന്നിച്ചെത്തിയ ദക്ഷിണേന്ത്യന് താരങ്ങളാണ് വര്ഷാവര്ഷം ഈ ഒത്തുചേരല് സംഘടിപ്പിക്കുന്നത്. പാട്ടും നൃത്തവുമൊക്കെയായി പഴയ ഓര്മകളുടെ സ്മരണയില് നടത്തുന്ന ആഘോഷരാവില് വെളളിത്തിരയിലെ മിന്നും താരങ്ങള് പങ്കുചേരും. മെഗാസ്റ്റാര് ചിരഞ്ജീവിയുടെ വീട്ടിലാണ് ഇത്തവണ ഒത്തുകൂടല് നടന്നത്.
ക്ലാസ് ഓഫ് 80'സ് എന്നാണ് ഇത്തവണ ഒത്തുചേരലിന് നല്കിയ പേര്. ബ്ലാക്ക് ആന്ഡ് ഗോള്ഡന് ആയിരുന്നു ഇത്തവണത്തെ കളര് തീം. തെന്നിന്ത്യയിലേയും ബോളിവുഡിലെയും താരങ്ങള് ആഘോഷത്തില് അണിനിരന്നു സൗഹൃദസംഗമത്തിന്റെ പത്താം വാര്ഷികമായിരുന്നു ഇത്തവണത്തേത്.
നാഗാര്ജ്ജുന, പ്രഭൂ, റഹ്മാന്, മോഹന്ലാല്, ജയറാം, പാര്വതി, ശോഭന, നാദിയ മൊയ്തു, ജാക്കി ഷെറഫ്, ശരത്കുമാര്, ജഗപതി ബാബു, പൂര്ണ്ണിമ ജയറാം, ലിസ്സി, അംബിക, രാധിക ശരത് കുമാര് ജയപ്രഭ തുടങ്ങിയ വന്താരനിര ഇത്തവണ ഒത്തുകൂടലിന് എത്തി.
