മുംബൈ: ലോകകപ്പിനു തൊട്ടുമുമ്പ് സിലക്ഷന് കമ്മിറ്റി ചെയര്മാന് സ്ഥാനത്തു നിന്ന് പടിയിറങ്ങേണ്ടി വരുന്നതില് നിരാശയില്ലെന്ന് എംഎസ്കെ പ്രസാദ്. നിലവിലെ സിലക്ഷന് കമ്മിറ്റിക്ക് കാലാവധി നീട്ടി നല്കില്ലെന്ന് ബിസിസിഐയുടെ വാര്ഷിക ജനറല് ബോഡിക്കു ശേഷം പ്രസിഡന്റ് സൗരവ് ഗാംഗുലി വ്യക്തമാക്കിയിരുന്നു. ഇതിനു പിന്നാലെയാണ് സിലക്ഷന് കമ്മിറ്റി ചെയര്മാന്റെ പ്രതികരണം പുറത്തുവന്നത്. ഒരു ദേശീയ മാധ്യമത്തിനു നല്കിയ അഭിമുഖത്തിലാണ് പ്രസാദിന്റെ വെളിപ്പെടുത്തല്.
ദേശീയ ടീമിലേക്ക് ഏറ്റവും മികച്ച താരങ്ങളെ തിരഞ്ഞെടുക്കാനും പകരക്കാരുടെ ശക്തമായ നിരയെത്തന്നെ രൂപപ്പെടുത്താനും തന്റെ നേതൃത്വത്തിലുള്ള സിലക്ഷന് കമ്മിറ്റിക്കു സാധിച്ചിട്ടുണ്ടെന്നും പ്രസാദ് പറഞ്ഞു. സിലക്ഷന് കമ്മിറ്റിയുടെ കാലാവധി നീട്ടി നല്കുന്ന വിഷയത്തില് എന്താണ് വേണ്ടതെന്ന് ബിസിസിഐ തന്നെ തീരുമാനിക്കും. സിലക്ടര്മാരുടെ നിയമനത്തില് വ്യക്തമായ ചില ചട്ടങ്ങളുണ്ടെന്നും അദേഹം കൂട്ടിച്ചേര്ത്തു.
ഓസ്ട്രേലിയ ആതിഥ്യം വഹിക്കുന്ന ട്വന്റി20 ലോകകപ്പിന് തൊട്ടുമുമ്പ് പടിയിറങ്ങേണ്ടി വരുന്നതില് യാതൊരു നിരാശയുമില്ല. എല്ലാറ്റിനും അതിന്റേതായ സമയമുണ്ട്. നിങ്ങള്ക്കു ലഭിക്കുന്ന സമയത്ത് ഏറ്റവും മികച്ച സേവനം ഉറപ്പാക്കുകയാണ് വേണ്ടത്. അത ഞങ്ങള് ചെയ്തിട്ടുണ്ടെന്നും എംഎസ്കെ പ്രസാദ് വ്യക്തമാക്കി. ദേശീയ ക്രിക്കറ്റ് ടീം സിലക്ടര്മാര്ക്ക് നാലു വര്ഷത്തെ കാലാവധി തന്നെ അധികമാണെന്നായിരുന്നു ഗാംഗുലിയുടെ അഭിപ്രായം. ടീം തിരഞ്ഞെടുപ്പ് കൂടുതല് സജീവമാക്കുന്നതിന് മൂന്നു വര്ഷം കൂടുമ്പോള് സിലക്ടര്മാരെ മാറ്റുന്ന കാര്യം പരിഗണിക്കുമെന്നും അദേഹം കൂട്ടിച്ചേര്ത്തിരുന്നു.
