അഹമ്മദാബാദ്: പുറത്തുവന്നിരിക്കുന്ന നാനാവതി കമ്മീഷന് റിപ്പോര്‍ട്ട് ഗുജറാത്ത് കലാപവുമായി ബന്ധപ്പെട്ട് പ്രധാനമന്ത്രിക്ക് ചുറ്റും രൂപപ്പെട്ട കാര്‍മേഘത്തെ മായ്ക്കുന്നതായി മാറുന്നു. ആയിരക്കണക്കിന് ആള്‍ക്കാര്‍ മരണമടഞ്ഞതായി റിപ്പോര്‍ട്ട് ചെയ്യപ്പെട്ട കേസില്‍ ഉയര്‍ന്ന ആരോപണങ്ങള്‍ ഗുജറാത്ത് മുഖ്യമന്ത്രിയായിരുന്ന നരേന്ദ്രമോഡിയുടെ പേര് മോശമാക്കാനും പ്രതിഛായ തകര്‍ക്കാനും വേണ്ടിയുള്ള ഗൂഡനീക്കമെന്നാണ് അന്തിമ റിപ്പോര്‍ട്ടില്‍ കമ്മീഷന് ചൂണ്ടിക്കാണിച്ചിരിക്കുന്നത്.
2002 ഫെബ്രുവരി 27 ന് ഗോധ്രാ റെയില്‍വേ സ്‌റ്റേഷനില്‍ സബര്‍മതി എക്‌സ്പ്രസിന് തീപിടിച്ച സംഭവത്തില്‍ കര്‍സേവകര്‍ ഉള്‍പ്പെടെ 59 പേര് വെന്തു മരിച്ച സംഭവത്തെ തുടര്‍ന്നായിരുന്നു ഗുജറാത്ത് കലാപമുണ്ടായത്. സംസ്ഥാന ഏജന്‍സികളെ നിഷ്‌ക്രിയരാക്കി കലാപത്തിന് സാഹചര്യം സൃഷ്ടിച്ചു എന്നായിരുന്നു മോഡിക്കെതിരേ പ്രധാനമായും ഉയര്‍ന്ന ആരോപണം. അനേകം സംഘടനകളാണ് കമ്മീഷന് മുമ്പാകെ മോഡിക്കെതിരേ ആരോപണം ഉന്നയിച്ചത്. എന്നാല്‍ എല്ലാം മോഡിയുടെ മുഖം വികൃതമാക്കാന്‍ നടത്തിയ ശ്രമമായിട്ടാണ് റിപ്പോര്‍ട്ടില്‍ പറഞ്ഞത്.
''ഒരു സമുദായം മറ്റൊരു സമുദായത്തിന് മേല്‍ മുന്‍കൂറായി തയ്യാറാക്കിയ ഭീകരാക്രമണം.'' എന്നായിരുന്നു ഗോധ്രാ സംഭവത്തെക്കുറിച്ച് 2002 ഫെബ്രുവരി 28 ന് മോഡി നടത്തിയ പ്രസ്താവന. ഈ വാക്കുകള്‍ സമുദായങ്ങള്‍ തമ്മിലുള്ള ശത്രുത രൂക്ഷമാക്കി എന്ന് ആരോപണം ഉയര്‍ന്നിരുന്നു. എന്നാല്‍ ഈ ആരോപണം ശരി വെയ്ക്കാന്‍ മതിയായ തെളിവുകള്‍ ഇല്ലെന്നായിരുന്നു കമ്മീഷന്റെ കണ്ടെത്തല്‍. ഇതിനൊപ്പം ''ഭീകരതയുടെ മുന്‍കൂറായി തയ്യാറാക്കപ്പെട്ട മനുഷ്യത്വരഹിതമായ സംയോജിത കലാപം'' എന്നായിരുന്നു മോഡി പറഞ്ഞതെന്നും സൂചിപ്പിക്കുന്നു. '' ഇത് വര്‍ഗ്ഗീയ കലാപമല്ല. മുന്‍കൂറായി തയ്യാറാക്കിയ നിര്‍വ്വികാരമായ ഹീനകൃത്യം'' എന്ന് ഫെബ്രുവരി 27 ന് മോഡി നടത്തിയ പ്രസ്താവനയുടെ പത്ര കട്ടിംഗും തെളിവായി ഒപ്പം വെച്ചിട്ടുണ്ട്്.
അതുപോലെ തന്നെ കലാപത്തെ മോഡി ന്യായീകരിക്കാന്‍ ശ്രമിക്കുന്നതിനെ ന്യായീകരിക്കുന്ന തരത്തിലുള്ള ദൃക്‌സാക്ഷികളുടെ മൊഴി ഉള്‍പ്പെടെയുള്ള മോഡിക്കെതിരേ വന്ന സിറ്റിസണ്‍ ട്രിബ്യൂണലിന്റെയും എഡിറ്റേഴ്‌സ് ഗില്‍ഡിന്റെയും റിപ്പോര്‍ട്ടുകളും പാനല്‍ ചര്‍ച്ച ചെയ്തു. മുസ്‌ളീങ്ങള്‍ക്കെതിരേയുള്ള കലാപത്തെ ന്യായീകരിച്ച് മോഡി സംസാരിച്ചു എന്നത് സത്യമല്ലെന്നും ആരോപണം മാത്രമാണെന്നുമാണ് കമ്മീഷന് പറഞ്ഞത്. കലാപകാരികള്‍ വളഞ്ഞപ്പോള്‍ മോഡിയെ വിളിച്ചെന്ന കോണ്‍ഗ്രസിന്റെ മുന്‍ എംപി എഹ്‌സാന്‍ ജാഫിയുടെ വാദവും കമ്മീഷന് സ്വീകരിച്ചില്ല. ഇക്കാര്യത്തിന് സാക്ഷികള്‍ ഇല്ല എന്നു കാണിച്ച കമ്മീഷന് മുന്‍ എംപി കൂടിയായ എഹ്‌സാന്‍ ജാഫ്രി തന്നെ വിളിച്ചിട്ടേയില്ലെന്നും കലാപം നടന്ന 2002 ഫെബ്രുവരി 2 ന് ഉച്ചയ്ക്ക് ഒരു മണിക്കോ അതിന് ശേഷമോ ആരും വിളിച്ചിട്ടില്ലെന്ന മോഡിയുടെ മൊഴി മുഖവിലയ്ക്ക് എടുക്കുകയും ചെയ്തു.
സംഭവത്തില്‍ മോഡിക്കെതിരേ രംഗത്ത് വന്ന മൂന്ന് മുന്‍ ഐപിഎസ് ഉദ്യോഗസ്ഥരുടെ മൊഴിയും ഗൗരവത്തില്‍ എടുത്തില്ല. സഞ്ജീവ് ഭട്ട്, ആര്‍ ബി ശ്രീകുമാര്‍, രാഹുല്‍ ശര്‍മ്മ എന്നിവരായിരുന്നു അവര്‍. അന്ന് സംസ്ഥാനത്തെ രഹസ്യാന്വേഷണ വിഭാഗം ഡപ്യൂട്ടി കമ്മീഷണറായിരുന്നു സഞ്ജീവ് ഭട്ട്. എന്നാല്‍ സഞ്ജീവ് ഭട്ടിന് സര്‍ക്കാരിനും ഉന്നതോദ്യോഗസ്ഥരോടും പരാതി ഉണ്ടായിരുന്നു എന്നാണ് രണ്ടംഗ കമ്മീഷന് പറഞ്ഞത്്. 2002 ഫെബ്രുവരി 27 ന് മുഖ്യമന്ത്രിയുടെ ഓഫീസില്‍ നടന്ന യോഗത്തില്‍ താന്‍ സന്നിഹിതനായിരുന്നു എന്നായിരുന്നു ഭട്ട് പറഞ്ഞത്. മോഡി പോലീസിനും സംസ്ഥാന ഭരണകൂടത്തിനും കടുത്ത നടപടിയെടുക്കേണ്ടതില്ലെന്ന് നിര്‍ദേശം നല്‍കിയെന്നും ഇത് ന്യൂനപക്ഷത്തിന് മേല്‍ ഭൂരിപക്ഷത്തിന് അക്രമം കാട്ടാന്‍ അവസരം നല്‍കുന്ന രീതിയിലായി മാറിയെന്നും പറഞ്ഞിരുന്നു.
എന്നാല്‍ ഈ യോഗം സംസ്ഥാനത്തെ ഉന്നതോദ്യോഗസ്ഥരുടേത് ആയിരുന്നെന്നും യോഗത്തിലേക്ക് ഭട്ടിനെ വിളിക്കേണ്ട ഒരു കാര്യവും ഉണ്ടായിരുന്നില്ലെന്നുമാണ് കണ്ടെത്തിയത്്. ഇത്തരത്തില്‍ ഉയര്‍ന്ന റാങ്കിലുള്ള ഉദ്യോഗസ്ഥരുടെ യോഗത്തില്‍ പങ്കെടുക്കാന്‍ ആവശ്യപ്പെട്ടാല്‍ പോലും വരേണ്ട കാര്യമില്ലെന്നും ചുണ്ടിക്കാട്ടുന്നു. ഇതിലൂടെ താന്‍ യോഗത്തില്‍ പങ്കെടുത്തു എന്ന് ഭട്ട് നടത്തുന്ന അവകാശവാദം നുണയാണ്. മോഡിയും മറ്റുള്ളവരും നടത്തിയ ചര്‍ച്ചയെന്ന നിലയില്‍ ഭട്ട നടത്തുന്നത് നുണകൊണ്ടുള്ള കഥമെനയലാണെന്നും പറഞ്ഞിട്ടുണ്ട്. യോഗത്തില്‍ പങ്കെടുത്തു എന്ന തന്റെ വാദത്തെ ന്യായീകരിക്കാന്‍ ഭട്ട് അയച്ചതെന്ന പറയുന്ന ഫാക്‌സ് സന്ദേശത്തെയും ശരിയായ രേഖയായി കണക്കാക്കിയിട്ടുമില്ല.
സര്‍ക്കാരിനോടും ഉന്നതോദ്യോഗസ്ഥരോടും ഉള്ള വിരോധത്തിന്റെ പേരില്‍ മുഖ്യമന്ത്രിയേയും സര്‍ക്കാരിനെയും മോശപ്പെടുത്താന്‍ താന്‍ മീറ്റിംഗില്‍ പങ്കെടുത്തു എന്നരീതിയില്‍ ഭട്ട വ്യാജരേഖയുണ്ടാക്കിയതാണെന്നും ചൂണ്ടിക്കാട്ടിയിട്ടുണ്ട്.
അന്ന് അഡീഷണല്‍ ഡിജിപി ആയിരുന്ന ശ്രീകുമാറും സര്‍ക്കാരിനെതിരേ ആരോപണം ഉന്നയിച്ചിരുന്നു. എന്നാല്‍ അസംതൃപ്തനായ ഓഫീസറായിരുന്നു ശ്രീകുമാര്‍ എന്നും സര്‍ക്കാരിനെ മോശപ്പെടുത്താനാണ് ആരോപണം നടത്തിയതെന്നുമാണ് കമ്മീഷന് പറയുന്നത്. മുഖ്യമന്ത്രിയുടെ നിര്‍ദേശം അനുസരിച്ച് ഉദ്യോഗസ്ഥര്‍ അനേകം അനധികൃത നിര്‍ദേശം നല്‍കിയെന്ന് പറയുന്ന ശര്‍മ്മയുടെ സത്യവാങ്മൂലവും കമ്മീഷന് തള്ളിയിട്ടുണ്ട്. ശരിയായ വസ്തുതകള്‍ കമ്മീഷന് മുന്നില്‍ വെയ്ക്കുന്നതിന് പകരം നേരത്തേ എടുത്ത നടപടിയുടെ പ്രതികാരമെന്നോണം സര്‍ക്കാരിനോടുള്ള വിരോധം തീര്‍ക്കാന്‍ തെറ്റായ ആരോപണം നടത്തുകയാണ് ശര്‍മ്മയെന്നായിരുന്നു കണ്ടെത്തല്‍.
അക്കാലത്ത് അഹമ്മദാബാദിലെ കണ്‍ട്രോള്‍ റൂം ചുമതലയുള്ള ഡപ്യൂട്ടി പോലീസ് കമ്മീഷണറായിരുന്നു ശര്‍മ്മ. അദ്ദേഹം പറയുന്നത് വാസ്തവമല്ലെന്ന് കണക്കിലെടുത്ത പാനല്‍ കലാപകാലത്ത് നടന്നതെന്ന് പറഞ്ഞ് നല്‍കിയ കാള്‍ ഡീറ്റെയ്ല്‍സ് സംബന്ധിച്ച സി ഡി വിശ്വാസയോഗ്യമോ വാസ്തവമോ അല്ലെന്ന് കാട്ടി തള്ളി. കലാപ കാലത്ത് അക്രമികളുമായി മുഖ്യമന്ത്രിയുടെ ഓഫീസിലെ ഉദ്യോഗസ്ഥരും മന്ത്രിമാരും നടത്തിയതെന്ന് പരാമര്‍ശിക്കുന്ന ഫോണ്‍വിളി സംബന്ധിച്ച സിഡി ശര്‍മ്മ തെളിവായി സമര്‍പ്പിച്ചിരുന്നു. ഇതും വാസ്തവ വിരുദ്ധമെന്ന് പറഞ്ഞ് കമ്മീഷന് തള്ളി. ഇസ്രത്ത് ജഹാന്‍ കേസില്‍ ജോയിന്റ് കമ്മീഷണറായിരുന്നു പിപി പാണ്ഡേയ്ക്ക് താന്‍ നല്‍കിയ സിഡി പിന്നീട് മാറ്റിയെന്നാണ് ശര്‍മ്മ ആരോപിച്ചത്. സമര്‍പ്പിക്കപ്പെട്ട സിഡിയിലെ വിവരം വിശ്വാസയോഗ്യമല്ലെന്നായിരുന്നു കമ്മീഷന്റെ കണ്ടെത്തല്‍. കലാപത്തിന് കാരണക്കാരായി റിപ്പോര്‍ട്ടില്‍ കുറ്റപ്പെടുത്തിയിരിക്കുന്നത് പ്രാദേശത്തെ വിഎച്ച്പിയുടേയും ബജ്‌റംഗദളിന്റെയും പ്രാദേശിക പ്രവര്‍ത്തകരെയാണ്.
Comments