കൊച്ചി: എറണാകുളം അങ്കമാലി അതിരുപതയിലുണ്ടായ ഭൂമി ഇടപാടില് നഷ്ടം 41.51 കോടിയെന്ന് ഇഞ്ചോടി കമ്മീഷന്റെ കണ്ടെത്തലുകളിലുണ്ടെന്ന് അതിരൂപത അത്മായ മുന്നേറ്റം. ഭൂമി കച്ചവടത്തില് അതിരൂപത്ക്കുണ്ടായ സാമ്പത്തികവും ധാര്മ്മികവുമായി നഷ്ടം നികത്താനുള്ള സത്വര നടപടികള് സ്വീകരിക്കണമെന്ന് സിറോ മലബാര് സഭ സിനഡിന് സമര്പ്പിച്ച നിവേദനത്തില് ആവശ്യപ്പെടുന്നു. കൂരിയ ബിഷപ്പിനാണ് നിവേദനം കൈമാറിയത്. 2020 ജനുവരി ഏഴു മുതല് 15 വരെയാണ് കാക്കനാട് സെന്റ് തോമസ് മൗണ്ടില് സിനഡ് ചേരുന്നത്.
അതിരൂപതയുടെ മെത്രാപ്പോലീത്ത വികാരിയുടെ നേതൃത്വത്തില് കൂടിയ പാസ്റ്ററല് കൗണ്സില് യോഗത്തില് പ്രൊക്യൂറേറ്റര് ഭൂമി കച്ചവടവുമായി ബന്ധപ്പെട്ട കണക്കുകകളുടെ സംക്ഷിപ്ത രൂപം അവതരിപ്പിക്കുകയുണ്ടായി. അതനുസരിച്ച് വത്തിക്കാന്റെ നിര്ദേശപ്രകാരം നിയോഗിച്ച ഇഞ്ചോടി കമ്മീഷന്റെ കണ്ടെത്തലുകള് പ്രകാരം 41,51,28,916 രൂപയുടെ നഷ്ടം അതിരുപതയ്ക്ക് ഉണ്ടായിട്ടുണ്ട്. ഗമറ്റുകമ്മീഷനുകളുടെ കണ്ടെത്തലുകളനുസരിച്ച് നഷ്ടം ഇതിനും മുകളിലാണ്. എന്നാല് ഇവയില് തന്നെ മറ്റൂര് വാങ്ങിയ ഭൂമിയുടെ നഷ്ടവും അതിനു വേണ്ടിയെടുത്ത വായ്പയുടെ പലിശയും അടക്കമുള്ള നഷ്ടങ്ങള് പരിഗണിച്ചില്ലെന്ന് അത്മായ മുന്നേറ്റം ചൂണ്ടിക്കാട്ടുന്നു.
ഈ അതിരുപതയില് പുതിയ ആരാധനക്രമം സ്വീകാര്യമല്ലാത്തതിനാല് നിലവിലുള്ള രീതി തുടരാന് അനുവദിക്കുക, ദേവാലയങ്ങളില് നിന്ന് ക്രൂശിത രൂപം നീക്കം ചെയ്യുന്നതിനെ വിലക്കുക, കളങ്കിതരും ആരോപണ വിധേയരുമായ വൈദികരെ പക്ഷം പിടിച്ചതിന്റെ നന്ദിസൂചകയായി ബിഷപ്പുമാരായി വാഴിക്കാനുള്ള ശ്രമങ്ങള് ഉപേക്ഷിക്കുക, ലൈംഗിക സാമ്പത്തിക ആരോപണങ്ങള് നേരിടുന്ന വൈദികര്ക്കും ബിഷപ്പുമാര്ക്കുമെതിരെ സിനഡ് ശക്തമായ നിലപാട് സ്വീകരിക്കുക, ഇത്തരം വൈദികരെ സംരക്ഷിക്കുന്ന ബിഷപുമാരെ അന്വേഷണ വിധേയമായി പദവികളില് നിന്ന് മാറ്റിനിര്ത്തുക, അതിരൂപതയേയും വൈദികരേയും അധിക്ഷേപിച്ച വൈദികനെതിരെ നടപടി സ്വീകരിക്കുക തുടങ്ങിയ ആവശ്യങ്ങളാണ് അത്മായ മുന്നേറ്റം നിവേദനത്തില് ആവശ്യപ്പെടുന്നത്.
വത്തിക്കാനില് നിന്ന് നിര്ദേശം ലഭിച്ചിട്ടും അതിരൂപതയ്ക്കുണ്ടായ നഷ്ടങ്ങള് പരിഹരിക്കാത്തത് സിനഡിന്റെ ലാഘവബുദ്ധിയാണെന്ന് നിവേദനത്തില് കുറ്റപ്പെടുത്തുന്നു. അടിയന്തിരമായി സ്ഥിരം സിനഡ് വിളിച്ച് ഇക്കാര്യത്തില് കൃത്യമായ തീരുമാനമെടുത്തതായി അറിയിക്കണമെന്നും അല്ലാത്തപക്ഷം അത്മായ മുന്നേറ്റം പ്രത്യക്ഷ സമരനടപടികളിലേക്ക് കടക്കും. സംഘര്ഷഭരിതമായ സഭാന്തരീക്ഷം ഉണ്ടാകരുതെന്നാണ് ആഗ്രഹമെന്നും നിവേദനത്തില് പറയുന്നു.
പാസ്റ്ററൽ കൗൺസിൽ സെക്രട്ടറി പി പി ജെറാർദ്, അല്മായ മുന്നേറ്റം കൺവീനർ അഡ്വ.ബിനു ജോൺ, അല്മായ മുന്നേറ്റം അതിരൂപത കോർ ടീം അംഗങ്ങളായ ഷൈജു ആന്റണി, റിജു കാഞ്ഞൂക്കാരൻ, ജോജോ ഇലഞ്ഞിക്കൽ, ജോമോൻ തോട്ടപ്പിള്ളി, ബോബി ജോൺ, ആന്റണി ജോസഫ് എന്നിവർ കൂടിക്കാഴ്ച്ചയിൽ പങ്കെടുത്തു.
