വിവാദങ്ങള്ക്കും വിമര്ശനങ്ങള്ക്കും ഇടയില് തന്റെ ഏറ്റവും പുതിയ ചിത്രമായ 'വലിയ പെരുന്നാള്' റിലീസിനെത്തുന്ന സന്തോഷത്തിലാണ് ഷെയ്ന് നിഗം. ചിത്രത്തിന്റെ പ്രമോഷന് തിരക്കുകളിലാണ് നടന് ഇപ്പോള്. തന്റെ കരിയറിലെ മികച്ച പ്രകടനങ്ങളില് ഒന്നായിരിക്കും നാളെ തിയേറ്ററുകളില് എത്തുന്ന 'വലിയ പെരുന്നാള്' എന്നാണ് ഷെയ്നിന്റെ വാക്കുകള്.
ചിത്രത്തിന്റെ പ്രമോഷന്റെ ഭാഗമായി കോളജ് സന്ദര്ശനത്തിനെത്തിയ ഷെയ്നിന്റെ കിടിലന് ഡാന്സാണ് സമൂഹിക മാധ്യമങ്ങളില് തരംഗം സ്യഷ്ടിച്ചിരിക്കുന്നത്. ക്രിസ്തുമസ് ആഘോഷങ്ങള്ക്കിടെ ഒരു കൂട്ടം പെണ്കുട്ടികള്ക്കിടയില് നിന്നാണ് ഷെയ്നിന്റെ ഡാന്സ്. രണ്ബീര് കപൂര്, അനുഷ്ക ശര്മ, ഐശ്വര്യ റായ് എന്നിവര് കേന്ദ്രകഥാപാത്രത്തില് എത്തിയ 'യേ ദില് ഹെ മുഷ്കില്' എന്ന ചിത്രത്തിലെ ബ്രേക്ക് അപ്പ് ഗാനത്തിനൊപ്പമാണ് താരം ചുവടുവച്ചത്. ഷെയ്ന് തന്നെയാണ് തന്റെ ഇന്സ്റ്റഗ്രാമിലൂടെ ആരാധകര്ക്കായി വീഡിയോ പങ്കുവച്ചത്.
ഡിമല് ഡെന്നിസ് സംവിധാനം ചെയ്ത് ഷെയ്നിഗം പ്രധാനവേഷത്തില് എത്തുന്ന 'വലിയ പെരുന്നാളില്' പ്രൊഫഷണല് ഡാന്സറായിട്ടാണ് താരം എത്തുന്നത്. ഹിമിക ബോസ് ആണ് ചിത്രത്തിലെ നായിക. സൗബിന് ഷാഹിര്, ജോജു ജോര്ജ്, അലന്സിയര് തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. അന്തരിച്ച നടന് ക്യാപ്റ്റന് രാജുവിന്റെ അവസാനത്തെ ചിത്രം എന്ന പ്രത്യേകതയും ഈ ചിത്രത്തിനുണ്ട്.
