ആന്ധ്രാപ്രദേശിന് മൂന്ന് തലസ്ഥാനങ്ങള് മുഖ്യമന്ത്രി ജഗന് മോഹന് റെഡ്ഡി സര്ക്കാര് ഇന്ന് പ്രഖ്യാപിച്ചേക്കും. ഈ സാഹചര്യത്തില് അമരാവതിയില് നിന്ന് തലസ്ഥാനം മാറ്റുന്നതില് എതിര്പ്പ് രൂക്ഷം. കര്ഷകര്ക്കൊപ്പം പ്രതിപക്ഷ പാര്ട്ടികളും സമരം തുടങ്ങിയിട്ടുണ്ട്. അമരാവതിയില് നിരോധനാഞ്ജ ഏര്പ്പെടുത്തി. മുന് മുഖ്യമന്ത്രി ചന്ദ്രബാബു നായിഡുവിന്റെ അമരാവതിയെന്ന ഒറ്റ തലസ്ഥാന ആശയത്തിന് ബദലായാണ് ജഗന് മോഹന് റെഡ്ഡിയുടെ മൂന്ന് തലസ്ഥാന നിര്മ്മാണം എന്ന ആശയം.
വിശാഖ പട്ടണവും അമരാവതിയും പിന്നെ കുര്ണൂല് നഗരവുമാണ് ജഗന് ഇതിനായി തിരഞ്ഞിട്ടുള്ളത്. വിശാഖപട്ടണത്ത് ഭരണതലസ്ഥാനവും അമരാവതിയില് നിയമസഭയും കുര്ണൂലില് നീതിന്യായ തലസ്ഥാനവും ഒരുക്കാനാണ് പദ്ധതി. ഇതു സംബന്ധിച്ച പ്രഖ്യാപനം ഇന്ന് ഉണ്ടായേക്കും.
ത്രിതലസ്ഥാന പദ്ധതി ആന്ധ്രാ നിയമസഭയില് ജഗന് അവതരിപ്പിച്ചിരുന്നു. മൂന്ന് തലസ്ഥാനങ്ങള് നിര്മ്മിക്കുന്നത് വഴി മൂന്നു മേഖലയിലെ ജനങ്ങള്ക്കും തുല്യ പങ്കാളിത്തം ഉറപ്പുവരുത്താനാകുമെന്നാണ് അദ്ദേഹം പറഞ്ഞത്. വിശാഖപട്ടണം ആന്ധ്രയുടെ വടക്കന് തീരമേഖലയിലും 1950കളിലെ ആന്ധ്രയുടെ തലസ്ഥാനമായിരുന്ന കുര്ണൂല് റായലസീമയിലുമാണ്. അമരാവതി തീരമേഖലയിലുമാണ്. 1956 ഒക്ടൊബര് 31 വരെ ആന്ധ്രാപ്രദേശിന്റെ തലസ്ഥാനം കുര്ണൂലായിരുന്നു. നിലവില് തലസ്ഥാനം അമതാവതിയാണ്. മുന് മുഖ്യമന്ത്രി ചന്ദ്രബാബു നായിഡുവാണ് ആന്ധ്രയുടെ തലസ്ഥാനം അമരാവതിയായി പ്രഖ്യാപിച്ചത്.
