ലക്നൗ: പൗരത്വഭേദഗതി നിയമവുമായി ബന്ധപ്പെട്ട് വന് പ്രതിഷേധങ്ങള് നടക്കുന്നതിനിടയില് ഉത്തര്പ്രദേശില് പ്രതിഷേധക്കാരോട് പാകിസ്താനിലേക്ക് പോകാന് സീനിയര് പോലീസ് ഓഫീസര് ആവശ്യപ്പെടുന്നതിന്റെ വീഡിയോ വൈറലാകുന്നു. കഴിഞ്ഞ വെള്ളിയാഴ്ച പടിഞ്ഞാറന് ഉത്തര്പ്രദേശില് മുസ്ളീം ഭൂരിപക്ഷ പ്രദേശത്ത് നടന്ന പ്രതിഷേധത്തിനിടെയാണ് ഉന്നത പോലീസ് ഉദ്യോഗസ്ഥന്റെ പെരുമാറ്റം.
മൊബൈല്ഫോണ് വീഡിയോ ദൃശ്യത്തില് കാണുന്നത് മീററ്റിലെ പോലീസ് സൂപ്രണ്ടായ അഖിലേഷ് നാരായണ് സിംഗ് എന്നയാളാണ്. മീററ്റിലെ ഒരു ഇടുങ്ങിയ വഴിയിലൂടെ ഇദ്ദേഹവും പോലീസുകാരും നീങ്ങുന്നതും പ്രതിഷേധക്കാര് എതിരേ വരുന്നതും വീഡിയോയിലുണ്ട്. എതിരേ വരുന്ന മുസ്ളീങ്ങളോട് നിങ്ങള് എവിടെ പോകുകയാണെന്ന് സിംഗ് ചോദിക്കുമ്പോള് പ്രാര്ഥനയ്ക്ക് പോകുകയാണെന്നാണ് ഇവരുടെ മറുപടി.
തുടര്ന്ന് അത് നന്നായി എന്നാല് നീലയും കറുപ്പും ബാഡ്ജ് ധരിച്ച നിങ്ങളെപ്പോലെയുള്ളവരോട് പാകിസ്താനിലേക്ക് പേകാന് പറയണമെന്നും നിങ്ങള്ക്ക് ഇവിടെ ഭാവിയില്ലെന്നും ഉദ്യോഗസ്ഥന് പറയുന്നു. പറയുന്നത് ശരിയാണെന്നായിരുന്നു മൂന്ന് മുസ്ളീങ്ങളെയും വളഞ്ഞ് നില്ക്കുന്ന പോലീസുകാരും പറയുന്നത്.
തുടര്ന്ന് നിങ്ങള്ക്ക് ഇവിടെ താമസിക്കാന് വയ്യെങ്കില് മറ്റെവിടേയ്ക്കെങ്കിലും പോകാനും പാകിസ്താനില് പോകണമെന്നുമാണ് പോലീസുകാരന് പറയുന്നത്. രണ്ടു മിനിറ്റ് ദൈര്ഘ്യമുള്ള വീഡിയോയില് മൂന്ന് തവണയോളം പോലീസുകാരന് ഇവരുടെ അടുത്തേക്ക് വരുന്നുണ്ട്. അവസാനം ഇവിടെയുള്ള എല്ലാറ്റിനെയും വീട്ടില് നിന്നും പൊക്കി ജയിലിലാക്കുമെന്നും എല്ലാരേയും തകര്ക്കുമെന്നും പറയുന്നുണ്ട്. ഏത് സാഹചര്യത്തിലാണ് സാമുദായികമായ പരാമര്ശം ഉദ്യോഗസ്ഥന് നടത്തുന്നതെന്ന് വ്യക്തമല്ല.
അതേസമയം കഴിഞ്ഞയാഴ്ച പോലീസ് നടത്തുന്ന സാമൂഹികാധിക്ഷേപത്തിന്റെ ആദ്യ വീഡിയോ അല്ല ഇത്. കാണ്പൂരിലെ ബാബു പൂര്വയില് നിന്നുള്ള രണ്ടു മിനിറ്റ് 30 സെക്കന്റ് ദൈര്ഘ്യമുള്ള മറ്റൊരു വീഡിയോയും പുറത്തുവന്നിരുന്നു. കടുത്ത പ്രതിഷേധത്തിനിടയില് ഒരു പോലീസ് കോണ്സ്റ്റബിള് കല്ലേറിനിടയില് സാമൂഹിക ആക്ഷേപം നടത്തുന്നതിന്റെ ദൃശ്യങ്ങളാണ് ഇതിലുള്ളത്. 200 മീറ്റര് അകലെയുള്ള ജനക്കൂട്ടത്തെ നോക്കി ജാത്യാക്ഷേപം നടത്തി ഇവരെ ഇന്ത്യയില് താമസിക്കാന് അനുവദിക്കില്ലെന്നു ഇയാള് പറയുന്നതാണ് വീഡിയോയിലുള്ളത്.
തങ്ങള്ക്ക് പ്രതിഷേധക്കാരില് നിന്നും കല്ലേറും അക്രമവും സഹിക്കേണ്ടി വരുന്നെന്നാണ് പോലീസുകാര് പറയുന്നത്. പശ്ചിമ യുപിയില് നടന്ന പ്രതിഷേധത്തില് ഇതുവരെ ആറ് മരണങ്ങള് റിപ്പോര്ട്ട് ചെയ്തു കഴിഞ്ഞു. മരിച്ചവരില് മിക്കവരിലും വെടിയുണ്ടയേറ്റ മുറിവുകളും ഉണ്ടായിരുന്നു. വെടി വെച്ചതായി പോലീസ് സമ്മതിക്കുന്നില്ല. പകരം മുഖംമൂടി വെച്ച പ്രതിഷേധക്കാര് പോലീസിന് നേരെ അനധികൃത ആയുധം ഉപയോഗിച്ച് വെടിവെയ്ക്കുന്നതിന്റെ വീഡിയോകള് അവര് പുറത്തു വിടുകയും ചെയ്തിട്ടുണ്ട്.
