ഛണ്ഡിഗഡ്: പൗരത്വഭേദഗതി ബില്ലുമായി ബന്ധപ്പെട്ട് നശിപ്പിക്കപ്പെട്ട പൊതുമുതലിന്റെ നഷ്ടപരിഹാരം പ്രതിഷേധക്കാരില് നിന്നും ഇടാക്കാന് ഉത്തരവിട്ടിരിക്കുന്ന ബിജെപിയോട് ദേരാ സച്ചൗ സൗദയില് നശിപ്പിക്കപ്പെട്ട 118 കോടി രൂപ വാങ്ങിയെടുത്തോയെന്ന് വിമര്ശകര്.
കഴിഞ്ഞയാഴ്ച പൊതു മുതല് നശിപ്പിക്കപ്പെട്ട് എന്നാരോപിച്ച് പ്രതിഷേധക്കാരുടെ വസ്തുവകകള് യുപി സര്ക്കാര് പിടിച്ചെടുക്കാന് ഉത്തരവിട്ടിരിക്കെ 2017 ല് ഗുര്മീത് റാം റഹീം സിംഗിനെതിരായ ലൈംഗികാതിക്രമ കേസില് ഹരിയാന സര്ക്കാര് കണക്കാക്കിയ 118 കോടി സമരക്കാരില് നിന്നും പിരിച്ചെടുത്തോ എന്നാണ് ഉയര്ന്നിരിക്കുന്ന ചോദ്യം. ഹരിയാനയില് ബിജെപി ഭരിക്കുന്ന കാലത്താണ് പ്രായപൂര്ത്തിയാകാത്ത രണ്ടു പെണ്കുട്ടികളെ ലൈംഗികമായി പീഡിപ്പിച്ചെന്ന ആരോപണത്തില് ദേരാ സച്ചാ സൗദാ തലവനും ആള് ദൈവവുമായ ഗുര്മീത് രാം റഹീം അറസ്റ്റിലായത്.
ഈ കാരണത്തില് അനുയായികള് വലിയ കലാപത്തിന് ഉത്തരവിടുകയും വലിയ തോതില് പൊതുമുതല് നശിപ്പിക്കപ്പെടുകയും ചെയ്തിരുന്നു. എന്നാല് ഈ നഷ്ടപരിഹാരം ഇപ്പോഴും പിരിച്ചെടുക്കാന് സര്ക്കാരിനായില്ല. ഇക്കാര്യം സംബന്ധിച്ച നിയമം ഇല്ലാത്തതിനാല് കേസ് ഇപ്പോഴും കോടതിയിലാണ്.
കുറ്റക്കാരനാണെന്ന പഞ്ചകുല സിബിഐ കോടതി കണ്ടെത്തിയതിന് പിന്നാലെ ഗുര്മീതിനെ അറസ്റ്റ് ചെയ്യാന് എത്തിയപ്പോള് ഇവിടെ തടിച്ചു കൂടിയവര് കലാപം അഴിച്ചു വിടുകയായിരുന്നു. സംഭവത്തില് 36 പേരാണ് കൊല്ലപ്പെട്ടത്.
2017 ഓഗസ്റ്റിന് ശേഷം പഞ്ചാബിലും ഹരിയാനയിലുമുള്ള ഗുര്മീതിന്റെ സ്വത്തുക്കള് പോലീസ് മരവിപ്പിച്ചിരുന്നു. എന്നാല് നഷ്ടപരിഹാരം ഇടാക്കാനുള്ള നടപടിക്രമങ്ങള് ഇപ്പോഴും കോടതിയില് തീരുമാനമാകാതെ കിടക്കുകയാണ്. കഴിഞ്ഞ മാസം പഞ്ചാബ് ഹരിയാന ഹൈക്കോടതിയുടെ ഫുള്ബെഞ്ച് വാദം കേള്ക്കല് ആരംഭിച്ചിട്ടുണ്ട്. ജനുവരി രണ്ടാം വാരത്തോടെ പൂര്ത്തിയാകുമെന്നാണ് കരുതുന്നത്.
