അങ്കമാലിക്കാര്ക്കൊപ്പം അടുത്ത സിനിമയ്ക്കായി തയ്യാറെടുത്ത് ആന്റണി വര്ഗീസ്. താന് നായകനാകുന്ന പുതിയ ചിത്രത്തെ കുറിച്ചുള്ളവിവരം താരം തന്നെയാണ് പുറത്ത് വിട്ടത്. വേലി, വിഡിയോ മരണം തുടങ്ങിയ ഹ്രസ്വ ചിത്രങ്ങളിലൂടെ ശ്രദ്ധിക്കപ്പെട്ട വിനീത് വാസുദേവാണ് ചിത്രം സംവിധാനം ചെയ്യുന്നത്. വിനീതിന്റെ ആദ്യ ചിത്രമാണിത്. അങ്കമാലി സ്വദേശിയാണ് വിനീത്.
ചിത്രത്തിന്റെ പേരു വെളിപ്പെടുത്തിയിട്ടില്ല. തണ്ണീര്മത്തന് ദിനങ്ങള് എന്ന ചിത്രത്തിന് ശേഷം ഷെബിന് ബെക്കര് പ്രൊഡക്ഷന്സിന്റെ ബാനറില് ഷെബിന് ബെക്കറും സംവിധായകന് ഗിരീഷ് എ.ഡിയും ചേര്ന്ന് നിര്മ്മിക്കുന്ന ചിത്രത്തിന്റെ തിരക്കഥ ഒരുക്കുന്നത് വരുണ് ധാരയാണ്.
'കുറെ അങ്കമാലിക്കാരുടെ കൂടെ അടുത്ത ഒരു പടം കൂടി.. എല്ലാവരുടെയും കട്ട സപ്പോര്ട്ട് പ്രതീക്ഷിച്ചു കൊണ്ട് അടുത്ത വര്ഷത്തിലേക്ക് ഇതും കൂടി ചേര്ക്കുന്നു' എന്ന കുറിപ്പോടെയാണ് ആന്റണിയുടെ പോസ്റ്റ്.
2017ല് ലിജോ ജോസ് പെല്ലിശ്ശേരി സംവിധാനം ചെയ്ത അങ്കമാലി ഡയറീസ് എന്ന ചിത്രത്തിലൂടെയാണ് ആന്റണി വര്ഗീസിന്റെ വരവ്. സ്വാതന്ത്ര്യം അര്ധരാത്രിയയില്, ജെല്ലിക്കെട്ട് എന്നീ ചിത്രങ്ങളിലും അഭിനയിച്ചു.
