ബിഗ് ബോസ് സീസണ് ടു പ്രേക്ഷകര് ഏറ്റെടുത്തിരിക്കുകയാണ്. ചെന്നൈ ഇ വി പി ഫിലിം സിറ്റിയിലാണ് ഷോ തുടങ്ങിയത്. 'ഇനി വലിയ കളികളുമല്ല കളികള് വേറെ ലെവല്' എന്ന ടാഗ് ലൈനുമായാണ് ഇത്തവണ 'ബിഗ് ബോസ്' എത്തുന്നത്. ബിഗ് ബോസ് രണ്ടാം പതിപ്പിന്റെ മൂന്ന് ദിവസങ്ങള് കഴിഞ്ഞിരിക്കുകയാണ്. മത്സരാര്ത്ഥികളില് ആദ്യം മുതലേ മറ്റൊരു ദിശയിലേക്ക് സഞ്ചരിച്ചു കൊണ്ടിരിക്കുന്ന ആളാണ് ഡോ.രജിത് കുമാര്. വലിയൊരു മേക്കോവറിന് ശേഷമാണ് ഇദ്ദേഹം ബിഗ് ബോസിലേക്ക് എത്തിയത്. വന്ന നാള് മുതല് എല്ലാവരേയും ഉപദേശിക്കാന് ആരംഭിച്ച രജിത്, പിന്നീട് താന് ഒരു ക്രോണിക് ബാച്ചിലര് ആണെന്നും, തനിക്ക് മുന്പ് ഒരു പ്രണയം ഉണ്ടായിരുന്നുവെന്നും വെളിപ്പെടുത്തിയിരുന്നു.
കഴിഞ്ഞ ദിവസം ബിഗ് ബോസ് ഹൗസില് രജിത് പറഞ്ഞത് താന് വിവാഹിതനാണെന്നും, തന്റെ ഭാര്യയുടെ അബോര്ഷനെ കുറിച്ചുമാണ്. വിവാഹശേഷം ഭാര്യയുടെ അപ്പച്ചിയുടെ വീട്ടില് വിരുന്നു പോയെന്നും, അവിടെവച്ച് ഭാര്യയുടെ മുറച്ചെറുക്കന്റെ കല്ല്യാണം മുന്കൈയ്യെടുത്ത് നടത്താമെന്ന് വാക്കുകൊടുത്തെന്നും രജിത് പറയുന്നു. അഭിപ്രായം ചോദിക്കാതെ താനെടുത്ത തീരുമാനത്തോടുള്ള ഭാര്യയുടെ എതിര്പ്പിനെക്കുറിച്ചും രജിത് പറയുന്നുണ്ട്. ഫെബ്രുവരി 12ാം തിയതി വിവാഹിതരായ രജിത്തിനെയും ഭാര്യയേയും തേടി ഏപ്രില് ആദ്യ ആഴ്ചയില് ഒരു കുഞ്ഞ് വരാന് പോകുന്നു എന്ന സന്തോഷവാര്ത്തയെത്തി. എന്നാല് ഈ സമയവും ഭാര്യയുടെ മുഖത്ത് സന്തോഷമില്ലായിരുന്നെന്നാണ് രജിത് പറയുന്നത്.
'' ബ്ലീഡിങ് ടെന്ഡന്സി ഉള്ളതുകൊണ്ടുതന്നെ ഭാര്യയ്ക്ക് പൂര്ണ വിശ്രമം വേണമെന്നായിരുന്നു നിര്ദേശം. മെയ് ആദ്യ ആഴ്ചയിലായിരുന്നു ഞാന് ഏറ്റെടുത്ത കല്യാണം നടക്കുന്നത്. ഗുരുവായൂരാണ് കല്യാണം. തിരുവനന്തപുരത്തുനിന്ന് എത്തേണ്ടതുകൊണ്ടുതന്നെ തലേദിവസം ഉച്ചയ്ക്കെങ്കിലും ഇറങ്ങണം. ഞാന് ഒരുങ്ങി ഇറങ്ങാന് തയ്യാറായപ്പോഴാണ് 'ചേട്ടന് പോകണ്ട' എന്ന് അവള് പറയുന്നത്. ഞാന് കൊടുത്ത വാക്ക് പാലിക്കണ്ടേ എന്ന് പറഞ്ഞ് കാര്യം മനസ്സിലാക്കാന് ശ്രമിച്ചു. അപ്പോഴും എന്റെ ബന്ധുക്കളല്ലേ ചേട്ടന് പോകണ്ട എന്ന വാശിയായിരുന്നു അവള്ക്ക്. ഒടുവില് ഞാന് പോകുമെന്ന് ഉറപ്പായപ്പോള് അവള് ഇട്ടിരുന്ന ബ്രൗണ് നൈറ്റി പൊക്കിയിട്ട് എന്നോട് പറഞ്ഞു, ' എന്നാല് ഇതുംകൂടി കണ്ടിട്ട് പൊക്കോ' എന്ന്. എന്റെ കുഞ്ഞ് അവളുടെ തുടയിലൂടെ ഒഴുകിയിറങ്ങി' രജിത് പറഞ്ഞു.
നേഴ്സിംഗ് അസിസ്റ്റന്റായ അമ്മയോട് ഭാര്യയെ ആശുപത്രിയില് കൊണ്ടുപോകാനും വേണ്ട കാര്യങ്ങള് ചെയ്യാനും പറഞ്ഞേല്പ്പിച്ചശേഷം ഏറ്റെടുത്ത കല്ല്യാണം നടത്തികൊടുക്കാനാണ് രജിത് തീരുമാനിച്ചത്. ' ചെറുക്കനെയും കൂട്ടി ഗുരുവായൂരെത്തി കല്ല്യാണം നടത്തിയപ്പോഴും ഞാന് ആരോടും ഒന്നും പറഞ്ഞില്ല. തിരിച്ച് വീട്ടില് ചെറുക്കനെയും പെണ്ണിനെയും എത്തിച്ചു. അവരുടെ വിവാഹം നന്നായി തന്നെ നടന്നു. പോരാനിറങ്ങിയപ്പോള് അപ്പച്ചിയെയും കല്ല്യാണചെറുക്കനെയും മാറ്റി നിര്ത്തി ഞാന് പറഞ്ഞു ' നിങ്ങളുടെ മകന്റെ കല്ല്യാണം ഞാന് നടത്തി, പക്ഷെ എനിക്ക് നഷ്ടപ്പെട്ടത് എന്റെ കുഞ്ഞിനെയാണ്', രജിത് പറഞ്ഞു.
എന്നാല് രജിത്ത് കുമാറിന്റെ തുറന്ന് പറച്ചില് എല്ലാവരെയും അസ്വസ്ഥമാക്കിയിരുന്നു. ഭാര്യയെ സഹായിക്കാതെ വിവാഹം നടത്താന് പോയ രജിത്തിന്റെ പെരുമാറ്റത്തെ കുറിച്ച് മത്സരാര്ത്ഥികള് എതിര്പ്പ് പ്രകടിപ്പിച്ചു. അതേ സമയം അയാള് മെനഞ്ഞ് ഉണ്ടാക്കിയ കഥയാണിതെന്നും ചിലര് പറഞ്ഞു. ആദ്യ ദിവസം പരിചയപ്പെടുമ്പോള് ഫുക്രുവിനോടെ താന് ക്രോണിക് ബാച്ലര് ആണെന്നായിരുന്നു രജിത് പറഞ്ഞിരുന്നത്. ഇപ്പോള് ഭാര്യ ഉണ്ടെന്ന കാര്യം പറഞ്ഞപ്പോള് ഇവര്ക്ക് വിശ്വസിക്കാന് സാധിച്ചില്ല. മാത്രമല്ല മറ്റൊരു പ്രസവത്തില് ഭാര്യയും കുഞ്ഞും മരിച്ചെന്നും അദ്ദേഹം പുതിയതായി വെളിപ്പെടുത്തിയിരിക്കുകയാണ്.
