കഴിഞ്ഞ ദിവസമാണ് ഉറൂബിന്റെ പ്രശസ്ത നോവലായ രാച്ചിയമ്മ സിനിമയാകുന്ന വിവരവും നടി പാര്വ്വതി അതിലെ പ്രധാന കഥാപാത്രമായ രാച്ചിയമ്മയായി എത്തുന്ന വിവരവും ഔദ്യോഗികമായി പുറത്ത് വന്നത്. രാച്ചിയമ്മയുടെ ലുക്കില് പാര്വ്വതിയുടെ ഫോട്ടോയും സോഷ്യല് മീഡിയയില് ശ്രദ്ധിക്കപ്പെട്ടിരുന്നു.
എന്നാല് നോവലിലെ രാച്ചിയമ്മയും പാര്വ്വതിയുടെ ലുക്കും തമ്മിലുള്ള വ്യത്യാസമൊര്മ്മിപ്പിച്ച് രംഗത്തെത്തിയിരിക്കുകയാണ് അധ്യാപികയും എഴുത്തുകാരിയുമായ ദീപ നിശാന്ത്. നോവലില് വായിച്ച രാച്ചിയമ്മയുടേതല്ല പാര്വ്വതിയുടെ ലുക്കെന്നും കറുത്തമ്മയെ വെളുത്തമ്മയാക്കുകയാണ് മലയാള സിനിമയെന്നും ദീപാ നിശാന്ത് ഫേസ്ബുക്കില് കുറിച്ചു.
ഫേസ്ബുക്ക് പോസ്റ്റിന്റെ പൂര്ണരൂപം
ഉറൂബിന്റെ രാച്ചിയമ്മയായി പാര്വ്വതിയെത്തുന്നു.
സന്തോഷമുള്ള വാര്ത്ത ..
കരുത്തുള്ള പെണ്ണിനെ അവതരിപ്പിക്കാന് കരുത്തുള്ള പെണ്ണു തന്നെ വരട്ടെ..
എന്നാലും ഈ ചിത്രം കണ്ടപ്പോള് ഒരു സങ്കടം
'കരിങ്കല്പ്രതിമപോലുള്ള ശരീരം' എന്ന് കൃത്യമായി ഉറൂബ് എഴുതിവെച്ച പെണ്ണാണ് !
'ടോര്ച്ചടിക്കും പോലുള്ള ഇടിമിന്നല്ച്ചിരിയുള്ള ' പെണ്ണാണ്!
'കറുത്തു നീണ്ട വിരല്ത്തുമ്പുകളില് അമ്പിളിത്തുണ്ടുകള് പോലുള്ള ' നഖങ്ങളോടുകൂടിയ പെണ്ണാണ്!
ഇരുട്ടത്ത് കൈയും വീശി കുതിച്ചു നടന്നു വരുമ്പോള് രാച്ചിയമ്മയെ കണ്ടറിയാന് പറ്റില്ല കേട്ടറിയാനേ പറ്റൂ എന്ന ഉറൂബിന്റെ വരികളിലൊക്കെ അവളുടെ നിറത്തെപ്പറ്റിയുള്ള കൃത്യമായ സൂചനകളുണ്ട്.
കറുത്തമ്മയെ വെളുത്തമ്മയാക്കുന്ന മലയാളസിനിമയാണ്!
നിറത്തിലൊന്നും വലിയ കാര്യമൊന്നുമില്ല.
എന്നാലും രാച്ചിയമ്മ എന്ന കഥാപാത്രത്തെക്കുറിച്ച് വായനക്കാര്ക്ക് ഉറൂബിട്ടു കൊടുക്കുന്ന ഒരു രൂപമുണ്ട്.
ആ രൂപത്തിലേക്ക് പാര്വ്വതിയെ കൊണ്ടുവരാന് വലിയ പ്രയാസമൊന്നും കാണില്ല.
രാച്ചിയമ്മയ്ക്കായി കാത്തിരിക്കുന്നു.
