കോഴിക്കോട് : ഗായകന് കെ.ജെ യേശുദാസിന് ഇനിയും ഗുരുവായൂര് ക്ഷേത്രത്തില് പ്രവേശനം നിഷേധിക്കരുതെന്ന് ചൂണ്ടിക്കാട്ടി സിപിഎം നേതാവും ഉദുമ എംഎല്എയുമായ കെ.കുഞ്ഞിരാമന് രംഗത്ത്. യേശുദാസിന്റെ 80 മത് പിറന്നാളിനോട് അനുബന്ധിച്ച് ഒരു ആഴ്ചപ്പതിപ്പിന്റെ യേശുദാസ് പതിപ്പിനോടുള്ള പ്രതികരണമായാണ് കെ.കുഞ്ഞിരാമന് എം.എല്.എ ഇക്കാര്യം ചൂണ്ടിക്കാട്ടിക്കൊണ്ട് കത്തെഴുതിയിരിക്കുന്നത്.
എസ്.ഗോപാലകൃഷ്ണന്റെ ലേഖനത്തില് പറഞ്ഞതുപോലെ യേശുദാസിനെ ഗുരുവായൂര് ക്ഷേത്രത്തില് പ്രവേശിപ്പിക്കാന് മടികാട്ടുന്ന നമ്മുടെ സമൂഹത്തിനെറ കൊള്ളരുതായ്മയെ കുറിച്ച് പ്രത്യേകം എടുത്തു പറഞ്ഞതില് സന്തോഷിക്കുന്നുവെന്നും കെ.കുഞ്ഞിരാമന് എംഎല്എ കത്തില് പറയുന്നു. ഇക്കാലത്ത് ഭക്തരില് ഭക്തിയുള്ള ഒന്നാമന് യേശുദാസാണെന്നാണ് തന്റെ വിശ്വാസമെന്നും 'ഭക്തന്മാര് തരികിലേ മുക്തിക്ക് രസമുള്ളൂ.. ഭക്തന്മാര് തന്നതെല്ലാം മുക്തിക്ക് രസം തന്നെ' എന്നാണ് ശ്രീകൃഷ്ണന് വിദുരരുടെ ക്ഷണം സ്വീകരിക്കവേ പറഞ്ഞ് എന്ന് ഇന്നത്തെ ഭക്തര് ഓര്ക്കണമെന്നും അദ്ദേഹം ചൂണ്ടിക്കാട്ടുന്നു.
