ലാഹോര് : പാകിസ്താനില് വെച്ച് നടക്കുന്ന ഏഷ്യാ കപ്പില് നിന്ന് ഇന്ത്യന് ടീം വിട്ടുനിന്നാല് ഇന്ത്യയില് നടക്കുന്ന ടി20 ലോകകപ്പില് പങ്കെടുക്കുന്നില്ലെന്ന് പാകിസ്താന്.
ഈ വര്ഷം സെപ്റ്റംബറില് നടക്കുന്ന ഏഷ്യ കപ്പിന് ബിസിസിഐ ഇന്ത്യന് ടീമിനെ പാകിസ്ഥാനിലേക്ക് അയച്ചില്ലെങ്കില് 2021 ല് ഇന്ത്യയില് നടക്കുന്ന ടി20 മത്സരങ്ങള് പാകിസ്താന് ടീമിനെ ഇന്ത്യയിലേക്ക് അയക്കില്ലെന്ന് പാകിസ്ഥാന് ക്രിക്കറ്റ് ബോര്ഡ് സി ഇ ഒ വസീം ഖാന് പറഞ്ഞു. ലാഹോറില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
അതേസമയം ബംഗ്ലാദേശ് തങ്ങളുടെ ടീമിനെ പാകിസ്താനിലേക്ക് പരമ്പരക്കായി പാകിസ്താനിലേക്ക് അയച്ചതിന് പ്രത്യുപകാരമായി ഏഷ്യ കപ്പിന്റെ നടത്തിപ്പവകാശം ബംഗ്ലാദേശ് ക്രിക്കറ്റ് ബോര്ഡിന് വിട്ട്കൊടുത്തെന്ന ആരോപണങ്ങള് തെറ്റാണെന്നും പിസിബിയിലെ ഒരു മുതിര്ന്ന അംഗം പറഞ്ഞു.
ഏഷ്യ കപ്പിന്റെ നടത്തിപ്പവകാശം ഏഷ്യന് ക്രിക്കറ്റ് കൗണ്സിലാണ് പിസിബിക്ക് നല്കിയിരിക്കുന്നത്. അത് അങ്ങനെ ആര്ക്കും കൈമാറാന് പറ്റുന്നതല്ലെന്നും അദ്ദേഹം കൂട്ടിച്ചേര്ത്തു.
രാഷ്ട്രീയ നയതന്ത്രം വഷളായതിനെ തുടര്ന്ന് 2008 മുതല് ഇന്ത്യ പാകിസ്താന് മണ്ണില് കളിച്ചിട്ടില്ല. അതിന് ശേഷം ഐസിസി ടൂര്ണമെന്റുകളില് മാത്രമാണ് ഇരു ടീമുകളും കളിച്ചിട്ടുള്ളത്.
