അഭിനയത്തിലും രാഷ്ട്രീയത്തിലും നിലപാടുകള്കൊണ്ട് ഏറെ ശ്രദ്ധിക്കപ്പെട്ട താരമാണ് ശ്രീനിവാസന്. ഇപ്പോഴിതാ കേന്ദ്ര ഗവണ്മെന്റിന്റെ ചില നയങ്ങള്ക്കെതിരെ വിമര്ശനവുമായി രംഗത്തെത്തിയിരിക്കുകയാണ് താരം. ജീവിച്ചിരിക്കുന്ന ആള്ക്കാരുടെ പട്ടിണി മാറ്റിയതിന് ശേഷമല്ലെ 3000 കോടിയുടെ പ്രതിമ ഉണ്ടാക്കേണ്ടതെന്ന് അദ്ദേഹം ചോദിച്ചു. ഒരു മാധ്യമത്തിന് നല്കിയ അഭിമുഖത്തിലാണ് താരം ഇക്കാര്യം പറഞ്ഞത്.
'കേന്ദ്രത്തിലെ ഗവണ്മെന്റ് വേണ്ടാത്ത കാര്യങ്ങള് പലതും ചെയ്യുന്നു. 3000 കോടി ചെലവാക്കിയിട്ട് സര്ദാര് വല്ലഭായി പട്ടേലിന്റെ പ്രതിമയുണ്ടാക്കി. പിന്നെ ശിവജിയുടെ പ്രതിമ 3600 കോടിയ്ക്കാണ് ഉണ്ടാക്കിയത്. 2000ത്തിന്റേയും 500ന്റേയും നോട്ട് അച്ചടിക്കാന് 12,000 കോടി രൂപ വേറെ ചിലവാക്കി. അദാനിയ്ക്ക് ഒരു ലക്ഷം കോടി രൂപ ലോണ് കൊടുത്തു. ഇതൊക്കെ ജനാധിപത്യമാണ്! എന്തിനാണ് പ്രതിമയുണ്ടാക്കുന്നത്. ജീവിച്ചിരിക്കുന്ന ആള്ക്കാരുടെ പട്ടിണി മാറ്റയതിന് ശേഷമല്ലേ പ്രതിമയുണ്ടാക്കുക. പ്രതിമ ഉണ്ടാക്കണ്ട എന്ന് ഞാന് പറയുന്നില്ല. ആദ്യം പട്ടിണി മാറ്റൂ' ശ്രീനിവാസന് പറഞ്ഞു.
'ഞാന് ദൈവ വിശ്വാസി ആണോ അല്ലയോ എന്ന വിഷയമല്ല പറയുന്നത്. ദൈവത്തിന് പാണങ്ങളോട് കരുണയില്ല. അതുകൊണ്ടാണ്. ആ ഒറ്റക്കാരണം കൊണ്ടാണ് എനിക്ക് ദൈവത്തോട് വിരോധം. ദൈവം എന്തിന് വേണ്ടിയാണ് പാവപ്പെട്ടവനേയും പണക്കാരനേയും ഉണ്ടാക്കിയത്. നല്ലവനേയും ചീത്ത ആള്ക്കാരേയും ഉണ്ടാക്കിയത്? ദൈവം സര്വ ശക്തനാണെങ്കില് നല്ല ആള്ക്കാരെ മാത്രം ഉണ്ടാക്കിയാല് പോരെ'യെന്നും അദ്ദേഹം ചോദിക്കുന്നു.
