യാത്രയുടെ കാമുകന്‍

പിന്നീട് ഇന്ത്യാവിഷനില്‍ ഓട്ടോ ഷോ ചെയ്തു. ഇപ്പോള്‍ ഏഷ്യാനെറ്റില്‍ സ്മാര്‍ട്ട് ഡ്രൈവ് ഷോ ചെയ്യുന്നുണ്ട്. ഇങ്ങനെ പ്രിന്റിലും വിഷ്വലിലും മലയാളത്തില്‍ ഓട്ടോമൊബൈല്‍ കോളവും പ്രോഗ്രാമും ചെയ്തതുകൊണ്ട് പലരും മലയാളം ഓട്ടോമൊബൈല്‍ ജേര്‍ണലിസത്തിന്റെ പിതാവ് എന്നൊക്കെ വിശേഷിപ്പിച്ചുതുടങ്ങി.ഒന്നിലേറെ തവണ പരാജയത്തിലേക്ക് കൂപ്പുകുത്തിയെങ്കിലും സ്വന്തമായൊരു ഓട്ടോമൊബൈല്‍ മാസിക എന്നൊരു സ്വപ്നം ഞാന്‍ മനസില്‍ സൂക്ഷിച്ചിരുന്നു. പലതവണ തിരിച്ചടികളുണ്ടായെങ്കിലും മാഗസിന്‍ ജേര്‍ണലിസം ഇഷ്ടപ്പെടുന്നതുകൊണ്ടാണ് സ്മാര്‍ട്ട് ഡ്രൈവ് ആരംഭിച്ചത്. എഡിറ്റോറിയലില്‍ ഓട്ടോമൊബൈല്‍ വാര്‍ത്തകളല്ല മറിച്ച് ലോകത്ത് എന്തു നടക്കുന്നു എന്നതും എന്റെ കാഴ്ചപ്പാടുകളുമാണ് എഴുതുന്നത്. ഇപ്പോള്‍ സ്മാര്‍ട്ട് ഡ്രൈവ് ഓണ്‍ലൈന്‍ പേജും സജീവമാണ്. ഇതിനൊപ്പം ഒരു യൂട്യൂബ് ചാനലിലും കൈകാര്യം ചെയ്യുന്നുണ്ട്.

അങ്ങനെയിരിക്കേ, മാഗസിനുവേണ്ടി സംവിധായകന്‍ ലാല്‍ജോസിനേയും കൂട്ടി ഒരു യാത്ര പോയി. യാത്രയ്ക്കിടയില്‍ ലണ്ടന്‍ യാത്രയെക്കുറിച്ച് പറഞ്ഞപ്പോള്‍ അദ്ദേഹത്തിനും താല്‍പര്യമായി. അങ്ങനെ മൂന്നുപേര്‍ ഒരുമിച്ച് യാത്രപോകാന്‍ തീരുമാനിച്ചു. ഒന്നരവര്‍ഷം നീണ്ട ഒരുക്കങ്ങള്‍ക്കിടയില്‍ ഞങ്ങളൊരുമിച്ച് ചെറിയ യാത്രകള്‍ നടത്തി.

അങ്ങനെ ലണ്ടന്‍ യാത്രയ്ക്കുള്ള സമയമെത്തി. ജീവിതത്തിലെ അപൂര്‍വമായ അനുഭവങ്ങളിലൊന്നായിരുന്നത്. 27000 കിലോമീറ്റര്‍, 27 ദിവസം, 27 രാജ്യങ്ങള്‍, ഇതുവരെ ആരും പോകാത്ത റൂട്ട് അങ്ങനെ വെല്ലുവിളികളേറെയായിരുന്നു. പക്ഷേ ആ യാത്ര വിചാരിച്ചപോലെ എളുപ്പമായിരുന്നില്ല. യാത്രയില്‍ പലപ്രശ്‌നങ്ങളുമുണ്ടായി. അവസാനം സുരേഷ് സാറുമായി യോജിച്ച് പോകില്ല എന്നായപ്പോള്‍ 42 ദിവസം കഴിഞ്ഞ് സെന്റ് പീറ്റേഴ്‌സ് ബര്‍ഗില്‍വച്ച് ഞങ്ങള്‍ വഴിപിരിഞ്ഞു.

ഒരിക്കല്‍ ഭൂട്ടാനില്‍ പോകണമെന്ന് വലിയ ആഗ്രഹം. എങ്ങനെ പറ്റുമെന്നോ, വണ്ടി കൊണ്ടുപോകാന്‍ പറ്റുമെന്നോ, ഏത് വഴി കയറുമെന്നോ അറിയില്ല. എങ്കിലും വണ്ടിയുമായി പോകാന്‍ തീരുമാനിച്ചു. അങ്ങനെ ഞാനും ജമേഷ് കോട്ടയ്ക്കലും 2006 ല്‍ ഭൂട്ടാനിലും ഞങ്ങളുടെ കാല്‍പ്പാടുകള്‍ പതിപ്പിച്ചു. ത്രില്ലടിപ്പിച്ച മറ്റൊരു യാത്ര ശ്രീലങ്കയിലേക്കായിരുന്നു. എല്‍ ടി ടി ഇ തലവന്‍ പ്രഭാകരന്‍ കൊല്ലപ്പെട്ടശേഷം മേഖലയില്‍ ആദ്യമായി എത്തിയ വിദേശ മാധ്യമ പ്രവര്‍ത്തകന്‍ ഞാനാണ്.

സിംഹളനാണെന്ന് തെറ്റിധരിച്ചാണ് എനിക്ക് പ്രവേശനമനുവദിച്ചത്. പ്രഭാകരന്‍ കൊല്ലപ്പെട്ടിട്ട് രണ്ട് മാസം ആകുന്നേയുണ്ടായിരുന്നുള്ളൂ. പ്രഭാകരന്‍ വസിച്ച വീട്, ഒളിവില്‍ താമസിച്ച ബങ്കര്‍ എല്ലാം കണ്ടു. പ്രഭാകരനെ വെടിവച്ച് കൊന്ന നന്തിക്കടല്‍ എന്ന പ്രദേശത്തു മാത്രം പട്ടാളം കയറ്റിയില്ല. യുദ്ധത്തിന്റെ ഭീകരത എന്താണെന്ന് വിളിച്ചോതുന്ന കാഴ്ചകളായിരുന്നു അത്.

പല കാര്യങ്ങള്‍ക്കും പേടിയുള്ള ആളാണ് ഞാന്‍. ഇപ്പോഴും ഏറ്റവും പേടി വിമാനയാത്രയാണ്. വിമാനയാത്ര പേടിയുള്ള ഞാന്‍ 12 പേര്‍ക്ക് സഞ്ചരിക്കാവുന്ന വിമാനത്തില്‍ എവറസ്റ്റ് കാണാന്‍ പോയിട്ടുണ്ട്. ചെറിയ ഇടങ്ങളോടുള്ള പേടിയായ ക്ലസ്റ്റ്ട്രോഫോബിയയും എനിക്കുണ്ട്. എന്നെ പേടിപ്പിച്ച, എന്നാല്‍ വായനക്കാരെ ചിരിപ്പിക്കുന്ന ഒരു അനുഭവം ഈജിപ്തിലെ 2000 വര്‍ഷം പഴക്കമുള്ള കറ്റക്കോമ്പ് സന്ദര്‍ശനമാണ്.

അമ്മയും ഞങ്ങള്‍ക്കൊപ്പവും മറ്റ് സുഹൃത്തുക്കള്‍ക്കൊപ്പവും യാത്ര ചെയ്യാറുണ്ട്. മഞ്ജു അധ്യാപകരായ സുഹൃത്തുക്കള്‍ക്കൊപ്പം രണ്ടുവര്‍ഷമായി വിദേശരാജ്യങ്ങള്‍ സന്ദര്‍ശിക്കുന്നുണ്ട്. അവരെ ആ യാത്രകള്‍ക്കായി പ്രോത്സാഹിപ്പിക്കാനും ഞാന്‍ ശ്രദ്ധിക്കാറുണ്ട്.