ലോകപ്രശസ്ത ടിവി സീരിസ് ആയ ഫ്രണ്ട്സിലെ റേച്ചല് ഗ്രീന് എന്ന കഥാപാത്രത്തെ അവതരിപ്പിക്കുന്ന ഹോളിവുഡ് താരമാണ് ജെന്നിഫര് അനിസ്റ്റണ്. താരത്തിന്റെ അമ്പത്തിയൊന്നാമത്തെ ജന്മദിനമായിരുന്നു കഴിഞ്ഞ ദിവസം. ജെന്നിഫറിന്റെ സുഹൃത്തുക്കളെല്ലാം തന്നെ ആശംസ നേര്ന്നെത്തിയിരുന്നു. ജെന്നിഫറിനൊപ്പം അഭിനയിക്കുന്ന ലിസ കുര്ദോവാണ് ആദ്യം അഭിനന്ദനവുമായി ഇന്സ്റ്റഗ്രാമില് എത്തിയത്.
'എന്നും എപ്പോഴും സുന്ദരിയെങ്കിലും കൂടുതല് സുന്ദരിയായിക്കൊണ്ടിരിക്കുന്ന ജെന്നിഫറിന് പിറന്നാള് ആശംസകള്. നിന്നെ ഞാന് സ്നേഹിക്കുന്നു.'- ലിസ കുര്ദോവ് കുറിച്ചു. അനിസ്റ്റന്റെ അടുത്ത കൂട്ടുകാരിയും ഫ്രണ്ട്സിലെ സഹതാരവുമായ കോര്ട്നി കോക്സും ജെന്നിഫറിന് ആശംസ അറിയിച്ചു. ''ആരൊക്കെ എങ്ങനെയൊക്കെ പരിശ്രമിച്ചാലും ആര്ക്കും ജെന്നിഫര് ആകാന് പറ്റില്ല. ഒരിക്കലും. ജെന്നിഫറിനു പകരക്കാരി ജെന്നിഫര് മാത്രം.'' - കോര്ട്നി കോക്സ് കുറിച്ചു.
നടന് മാത്യു പെറിയും താരത്തിന് ആശംസ നേര്ന്നു. പിറന്നാള് പാര്ട്ടിക്കു വേണ്ടി ഇനിയും തനിക്ക് കാത്തിരിക്കാന് ആവില്ലെന്നായിരുന്നു എലന് ഡി ജെനേഴ്സ് കുറിച്ചത്. ഫ്രണ്ട്സ് സീരിയലിലെ ഒരു ചിത്രത്തിനൊപ്പം ജെന്നിഫറിന്റെ മുന്ഭര്ത്താവ് ജസ്റ്റിന് തെറോയും താരത്തിന് ആശംസകള് അറിയിച്ചു. ജന്മദിനത്തില് താന് കവര് ഗേളായ മാഗസിന്റെ ചിത്രം പോസ്റ്റ് ചെയ്താണ് ജെന്നിഫര് ഏവര്ക്കും മറുപടിയുമായി എത്തിയത്.
'' ഈ മനോഹര ജന്മദിന സമ്മാനത്തിനു നന്ദി. മാഗസിന് ഇന്നാണ് ഇറങ്ങുന്നതെന്ന് ഞാന് വിചാരിച്ചതേയില്ല. ഈ കവര് എന്നില് അഭിമാനം നിറയ്ക്കുന്നു. സന്തോഷവും. 51 തികയുന്നത് നല്ലൊരു അനുഭവമാണ്. ഈ പ്രായത്തിലും എന്നെ ആദരിച്ചതിന് അളവില്ലാത്ത നന്ദി. എവിടെയാണെങ്കിലും എന്റെ സുഹൃത്തുക്കള്ക്കൊപ്പം എങ്ങോട്ടു പോകുന്നതിനും ഞാന് തയാര്...നന്ദി എന്റെ പ്രിയ സുഹൃത്തുക്കളേ.'' - ജെന്നിഫര് കുറിച്ചു.
