മലയാളികള് ഏറെ പ്രതീക്ഷയോടെ കാത്തിരുന്ന ട്രാന്സ്ന്റെ ട്രെയ്ലര് പുറത്ത്. ഒരു മോട്ടിവേഷണല് സ്പീക്കറുടെ റോളില് ഫഹദ് ഫാസില് ചിത്രത്തിലെത്തുന്നു. നസ്രിയയാണ് നായിക. കേരളത്തിലും തമിഴ്നാട്ടിലും ആംസ്റ്റര്ഡാമിലും മുംബൈയിലുമായിട്ടായിരുന്നു ചിത്രീകരണം. ഏഴ് വര്ഷത്തിന് ശേഷം അന്വര് റഷീദ് സംവിധാനം ചെയ്യുന്ന ചിത്രം എന്ന പ്രത്യേകതയുമായാണ് ട്രാന്സ് പ്രേക്ഷകരിലേക്ക് വരുന്നത്.
2017ല് ജൂലൈയില് ആണ് ചിത്രീകരണം ആരംഭിക്കുന്നത്. നാല് ഷെഡ്യൂളുകളില് രണ്ട് വര്ഷം നീണ്ട ചിത്രീകരണം തന്നെയായിരുന്നു അണിയറപ്രവര്ത്തകരും ഉദേശിച്ചിരുന്നത്. ചിത്രത്തിനായി ഫഹദ് താടി നീട്ടി വളര്ത്തി. ട്രാന്സിനായി തന്റെ സമയം മുഴുവന് നല്കുകയുണ്ടായി. മാത്രമല്ല ചിത്രത്തിന്റെ ഡേറ്റ് പ്രശ്നങ്ങള് ഒഴിവാക്കാന് മറ്റു ചിത്രങ്ങളിലൊന്നും നടന് ഈ കാലയളവില് കരാര് ഒപ്പിട്ടില്ല.
അന്വര് റഷീദ് എന്റര്ടെയിന്മെന്റ് നിര്മിക്കുന്ന ചിത്രത്തില് ഫഹദിനൊപ്പം വിനായകന്, ഗൗതം വാസുദേവ് മേനോന്, നസ്രിയാ നസിം, സൗബിന് ഷാഹിര്, ശ്രീനാഥ് ഭാസി, ജോജു ജോര്ജ്, ധര്മജന്, ആഷിക്ക് അബു, ബൈജു, അശ്വതി മേനോന്, ദിലീഷ് പോത്തന്, വിനീത് വിശ്വന് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ഏകദേശം 20 കോടിയാണ് സിനിമയുടെ ബജറ്റ് എന്നും റിപ്പോര്ട്ട് ഉണ്ട്. അമല് നീരദ് ഛായാഗ്രഹണം നിര്വഹിക്കുന്നു. ഹോളിവുഡ് ചിത്രങ്ങളിലും പരസ്യചിത്രങ്ങളിലുമൊക്കെയാണ് സാധാരണയായി ഉപയോഗിക്കുന്ന റോബോട്ടിക് കാമറയിലാണ് ചിത്രത്തിലെ പ്രധാനപ്പെട്ട ഒരു സംഘട്ടന രംഗം ചിത്രീകരിക്കുന്നത്. ഇതാദ്യമായാണ് മലയാളത്തില് റോബോട്ടിക് ക്യാമറ ഉപയോഗിക്കുന്നത്. വിന്സന്റ് വടക്കന് തിരക്കഥ ഒരുക്കുന്ന ചിത്രത്തിന് ജാക്സണ് വിജയന് (റെക്സ് വിജയന്റെ സഹോദരന്) സംഗീതം നല്കുന്നു. റസൂല് പൂക്കുട്ടിയാണ് സൗണ്ട് ഡിസൈന്. അന്വര് റഷീദ് എന്റര്ടെയിന്മെന്സിന്റെ ബാനറില് പുറത്തിറങ്ങുന്ന ചിത്രം ഫെബ്രുവരി 20ന് തിയറ്ററുകളില് എത്തും.
