ബോളിവുഡിലെ വമ്പന് താരങ്ങളെ തനിക്ക് വേണ്ടി കാത്തു നിര്ത്തി രണ്വീര് സിങ്ങ്. അക്ഷയ് കുമാര്, അജയ് ദേവ്ഗണ്, രോഹിത് ഷെട്ടി, കരണ് ജോഹര്, കത്രീന കൈഫ് എന്നിവരാണ് മുക്കാല് മണിക്കൂറോളം രണ്വീര് സിങ്ങിന് വേണ്ടി കാത്തു നിന്നത്. സൂര്യവാന്ഷി എന്ന ചിത്രത്തിന്റെ ട്രെയിലര് ലോഞ്ചിനിടെ ആയിരുന്നു സംഭവം. ചിത്രത്തിന്റെ ട്രെയിലര് ലോഞ്ചിംഗ് ചടങ്ങില് സമയത്ത് എത്താന് രണ്വീറിന് കഴിഞ്ഞില്ല. യൂട്യൂബറും ട്രെയിലര് ലോഞ്ച് ചടങ്ങിന്റെ അവതാരകനുമായിരുന്ന ആശിഷ് ചാഞ്ച്ലാനിയാണ് ഈ വിഡിയോ ഇന്സ്റ്റഗ്രാമിലൂടെ പങ്കുവച്ചത്.
സൂര്യവാന്ഷിയുടെ ട്രെയിലര് ലോഞ്ചിന്റെ സ്ഥലത്തേക്ക് ഓടിക്കിതച്ചെത്തിയ രണ്വീര് രോഹിത് ഷെട്ടിയെ കണ്ടതും ആലിംഗനം ചെയ്തു. തിരിഞ്ഞ് നോക്കിയതും അക്ഷയും അജയും കരണും കത്രീനയുമെല്ലാം നിരന്നു നില്ക്കുകയായിരുന്നു. ഇതോടെ എല്ലാവരുടേയും മുന്നില് ഏത്തമിടുകയായിരുന്നു രണ്വീര്. എന്നാല് ഇതുകൊണ്ടൊന്നും കാര്യമില്ലെന്ന് പറഞ്ഞ അക്ഷയുടെയും മറ്റുള്ളവരുടേയും കാലുപിടിക്കുകയായിരുന്നു രണ്വീര്.
'നാല് മുതിര്ന്ന താരങ്ങളെ 40 മിനിറ്റ് കാത്തിരിപ്പിച്ച ആദ്യത്തെ ജൂനിയര് താരമാണ് രണ്വീര്' - എന്നായിരുന്നു അക്ഷയ് പറഞ്ഞത്. ഇതോടെ ദീപിക കാരണമാണ് താന് താമസിച്ചതെന്ന് രണ്വീര് പറയുകയായിരുന്നു. തന്റെ ഭാര്യ ടൗണിലാണ് താമസിക്കുന്നതെന്നും അവിടുന്ന് ഇവിടേക്കെത്താന് വളരെ പ്രയാസമാണെന്നും മെട്രോ പണി നടക്കുന്നതുകൊണ്ട് ട്രാഫിക് നിയന്ത്രണം ഉണ്ടായിരുന്നെന്നുമാണ് രണ്വീര് പറഞ്ഞത്.
എന്നാല് വിഡിയോ ഇന്സ്റ്റാഗ്രാമില് കണ്ട ദീപിക രണ്വീറിനുള്ള രസകരമായ മറുപടിയുമായി എത്തുകയായിരുന്നു. 'ഭാര്യ ടൗണിലാണ് താമസിക്കുന്നതെങ്കിലും എപ്പോഴും സമയത്തെത്തും' - എന്നായിരുന്നു ദീപികയുടെ കമന്റ്.
