സംവിധായകന് പ്രിയദര്ശന്റെയും നടി ലിസിയുടെയും മകളായ കല്യാണി പ്രിയദര്ശന് അഭിനയ മേഖലയില് സജീവമാകുകയാണ്. തെലുങ്കില് സജീവമായ താരം മലയാള സിനിമയിലും അരങ്ങേറി. കല്യാണി അഭിനയിച്ച അനൂപ് സത്യന് ചിത്രം 'വരനെ ആവശ്യമുണ്ട്' വന് വിജയമാണ് നേടിയത്. പിതാവ് പ്രിയദര്ശന്റെ ബ്രഹ്മാണ്ഡ ചരിത്ര സിനിമയായ മരക്കാര് അറബിക്കടലിന്റെ സിംഹത്തിലും സുപ്രധാന വേഷത്തില് കല്യാണി എത്തുന്നുണ്ട്. മരക്കാര് പൂര്ത്തിയാക്കിയതിന് പിന്നാലെയാണ് അനൂപ് സത്യന് ചിത്രമായ വരനെ ആവശ്യമുണ്ട് സിനിമയില് കല്യാണി എത്തിയത്.
മറ്റുള്ളവരെല്ലാം തന്റെ അഭിനയത്തെ കുറിച്ച് നല്ല വാക്കുകള് പറഞ്ഞപ്പോള് അച്ഛന് പ്രിയദര്ശന് തന്റെ അഭിനയത്തെ കുറിച്ച് പറയുന്നത് കാത്തിരിക്കുകയായിരുന്നു കല്യാണി. എന്നാല് മരക്കാര് സിനിമയുടെ പോസ്റ്റ് പ്രൊഡക്ഷന് ജോലികളുമായി തിരക്കിലായതിനാല് പ്രിയദര്ശന് മകളുടെ ആദ്യ മലയാള ചിത്രം കാണാന് സമയം കിട്ടിയില്ല. ഒടുവില് പ്രിയദര്ശന് ചിത്രം കണ്ടു, അതെക്കുറിച്ച് കല്യാണി ഇന്സ്റ്റഗ്രാമില് കുറിയ്ക്കുകയും ചെയ്തു.
'' അച്ഛന് ഒടുവില് എന്റെ സിനിമ കണ്ടു. അദ്ദേഹം സംവിധായകനെയും മറ്റുള്ളവരെയും വിളിച്ച് പ്രശംസിക്കുന്നതിന്റെ തിരക്കിലാണ്. ഞാന് ആകട്ടെ ആ കോള് കട്ട് ചെയ്ത് എന്നെ പ്രശംസിക്കുന്നത് കേള്ക്കാനുള്ള കാത്തിരിപ്പിലാണ്... എനിക്കുള്ള ആലിംഗനം എപ്പോള് ലഭിക്കും.'' - കല്യാണി ഇന്സ്റ്റഗ്രാം കുറിച്ചു. പിന്നീട് കുറച്ച് മണിക്കൂറുകള് കഴിഞ്ഞ് കല്യാണി വീണ്ടും കുറിപ്പുമായി ഇന്സ്റ്റാഗ്രാമില് എത്തി. '' ഒടുവില് എന്നെ അച്ഛന് ആശ്ലേഷിച്ചു. സിനിമയും സിനിമയിലെ എന്റെ കഥാപാത്രത്തെയും അദ്ദേഹം ഇഷ്ടപ്പെട്ടുവെന്ന് പറഞ്ഞു'' - കല്യാണി കുറിച്ചു.
