ജർമൻ വാഹന നിർമാതാക്കളായ ഫോക്സ്വാഗൻ്റെ സ്പോർട്ടി ക്രോസ്സ്ഓവർ എസ്യുവിയായ ടി-റോക്ക് ഇന്ത്യൻ വിപണിയിൽ. ഈ മാസം ആറാം തിയതിയാണ് ടിഗ്വാൻ ഓൾസ്പേസ് എസ്യുവി ഇന്ത്യയിൽ ലോഞ്ച് ചെയ്തത്. രണ്ടാഴ്ച തികയും മുൻപ് രണ്ടാമത് എസ്യുവിയും ഫോക്സ്വാഗൺ വിപണിയിലെത്തിച്ചു.
വാഹനത്തിന്റെ വില 19.99 ലക്ഷം (എക്സ്-ഷോറൂം) രൂപയാണ്. പൂർണമായും വിദേശത്ത് നിർമിച്ച് ഇന്ത്യയിലേക്ക് ഇറക്കുമതി ചെയ്യുയ്യുകയാണ്. ടി-റോക്ക് എല്ലാ ഫീച്ചറുകളും നിറഞ്ഞ ഒരൊറ്റ വേരിയന്റിലാണ് വില്പനക്കെത്തിയിരിക്കുന്നത്. 500 കാറുകൾ ഒരു വാഹന നിർമാതാവിന് ഇന്ത്യൻ ഹോമോളോഗേഷൻ നിയമങ്ങൾക്ക് വിധേയമാകാതെ വില്പനക്കെത്തിക്കാം എന്ന പുതിയ നിയമത്തിന്റെ ചുവട് പിടിച്ചാണ് ടി-റോക്കിന്റെ വരവ്. കുർക്കുമ യെല്ലോ, പ്യുവർ വൈറ്റ്, റെവെന്ന ബ്ലൂ, എനർജി ഓറഞ്ച്, ഇൻഡിയം ഗ്രേ എന്നീ അഞ്ച് ഡ്യുവൽ ടോൺ നിറങ്ങളിൽ ആണ് ടി-റോക്ക് വിപണിയിൽ എത്തിയിരിക്കുന്നത്.
സുരക്ഷയ്ക്കായി ആറ് എയർബാഗുകൾ, ഇബിഡിയോട് കൂടിയ എബിഎസ്, ഇലക്ട്രോണിക് സ്റ്റെബിലിറ്റി കൺട്രോൾ, ടയർ പ്രഷർ മോണിറ്ററിംഗ് സിസ്റ്റം, പാർക്കിംഗ് ക്യാമറ എന്നിവയും ടി-റോക്കിലുണ്ടാവും.ഡേടൈം റണ്ണിങ് ലാമ്പുകൾ ചേർന്ന ഫുൾ എൽഇഡി ഡ്യുവല് ബീം ഹെഡ്ലാംപ്, ക്രോം ലൈനുകളുള്ള ഗ്രിൽ, വലിയ എയര് ഡാം, ഡ്യുവൽ ടോൺ അലോയ് വീൽ, പ്ലാസ്റ്റിക് ക്ലാഡിങ്ങുകൾ, വലിപ്പം കൂടിയ വീൽ ആർച്ചുകൾ എന്നിവയാണ് ടി-റോക്കിന്റെ എക്സ്റ്റീരിയർ ആകർഷണങ്ങൾ. ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഡ്യുവൽ സോൺ ഓട്ടോമാറ്റിക് ക്ലൈമറ്റ് കൺട്രോൾ, 8.0 ഇഞ്ച് ടച്ച്സ്ക്രീൻ, പനോരമിക് സൺറൂഫ്, 'വിയന്ന' ലെതർ സീറ്റുകൾ എന്നിവയാണ് ഇന്റീരിയറിലെ ഫീച്ചറുകൾ.
ഡീസൽ എൻജിനിൽ ടി-റോക്ക് ലഭ്യമല്ല. 8.4 സെക്കൻഡിനുള്ളിൽ 0-100 കിലോമീറ്റർ വേഗത കൈവരിക്കാൻ കഴിയുന്ന ടി-റോക്കിന് മണിക്കൂറിൽ 205 കിലോമീറ്റർ ആണ് പരമാവധി വേഗത. 1.5 ലിറ്റർ നാല് സിലിണ്ടര് ടര്ബോചാര്ജ്ഡ് ടിഎസ്ഐ ഇവോ പെട്രോള് എൻജിൻ ആണ് ടി-റോക്കിന്റെ ഹൃദയം. ഈ എൻജിൻ 147 ബിഎച്ച്പി പവറും 250 എൻഎം ടോർക്കും ഉത്പാദിപ്പിക്കും. 7 സ്പീഡ് ഡ്യുവൽ ക്ലച്ച് ഓട്ടോമാറ്റിക് ആണ് ഗിയർബോക്സ്. സിലിണ്ടർ ഡിആക്ടിവേഷൻ സംവിധാനവും ടി-റോക്കിലുണ്ട്.
