ബോളിവുഡിലെ യുവനടിമാരില് ശ്രദ്ധേയയായ താരമാണ് തപ്സി പന്നു. തന്റേതായ നിലപാടുകള് പുലര്ത്തുന്ന ചുരുക്കം ചില നടിമാരിലൊരാളാണ് തപ്സിയും. വിമര്ശനങ്ങളെയും ട്രോളുകളെയും ഭയമില്ലാത്ത തപ്സി, പലപ്പോഴും ട്രോളുകള്ക്കൊക്കെ ചുട്ട മറുപടിയും കൊടുക്കാറുണ്ട്. രാജ്യം ലോക്ക്ഡൗണിലേക്ക് പോയതോടെ വീട്ടില് തന്നെയാണ് താരം. കുറച്ചു ദിവസങ്ങളായി ഫോണിലെ പഴയചിത്രങ്ങള് സോഷ്യല് മീഡിയയില് പങ്കുവെയ്ക്കുന്നതാണ് തപ്സിയുടെ പ്രധാന നേരം പോക്ക്.
കഴിഞ്ഞ രണ്ട് ദിവസങ്ങളായി തന്റെ ആദ്യകാലത്തെ സിനിമാചിത്രീകരണ ഓര്മകളും ആദ്യ പൊതുപരിപാടിക്കായി തയ്യാറാവുന്നതിന്റെ ചിത്രവുമൊക്കെയാണ് താരം തന്റെ ഇന്സ്റ്റഗ്രാമിലൂടെ പങ്കുവെച്ചത്. കൈയില് തോക്കും പിടിച്ച് നില്ക്കുന്ന കുട്ടിക്കാലത്തെ ഒരു ചിത്രം തപ്സി പങ്കുവെച്ചിരുന്നു. ഈ ചിത്രത്തിന് പിന്നിലെ കഥയൊന്നും തനിക്ക് ഓര്മ്മയില്ല. എന്നാല് എന്ന് മുതല്ക്കാണ് വിജയിക്കാനുള്ള ത്വര തനിക്ക് തുടങ്ങിയതെന്ന് ഇപ്പോഴാണ് ഓര്മ വന്നത്, എന്ന അടിക്കുറിപ്പോടെയാണ് ഈ ചിത്രം തപ്സി പോസ്റ്റ് ചെയ്തത്.
തപ്സി കഴിഞ്ഞ വര്ഷം ഒരു ഷാര്പ്പ് ഷൂട്ടറിന്റെ വേഷത്തില് എത്തിയ ചിത്രമായിരുന്നു സാന്ഡ് കി ആംഖ്. കുട്ടിക്കാല ചിത്രം പങ്കുവെച്ചതോടെ 'സാന്ഡ് കി ആംഖ് സിനിമയ്ക്ക് വേണ്ടി ഇത്രയും നേരത്തെ തയ്യാറെടുപ്പ് തുടങ്ങിയിരുന്നു അല്ലേ' എന്നാണ് സംവിധായകന് അഭിനവ് കമന്റ് ചെയ്തിരിക്കുന്നത്. തപ്സിയുടെ അവസാനമിറങ്ങിയ ചിത്രമായ ധപ്പടിന്റെ സംവിധായകനാണ് അഭിനവ് സിന്ഹ.
