അയ്യപ്പൻ നായരെന്ന മുണ്ടൂർ മാടന്റെ ആദ്യ തല്ല് മേടിക്കുന്നത് കുട്ടമണിയാണ്. ജോലി പോകുന്ന സാഹചര്യത്തിൽ കോശിയോടുള്ള ദേഷ്യം പ്രകടിപ്പിക്കാൻ അയ്യപ്പനു കിട്ടുന്നത് കുട്ടമണിയെ. പോരേ പൂരം. തല്ലി വശത്താക്കി കയ്യും കാലും ഒടിച്ചിടുന്ന കുട്ടമണി പിന്നീട് സിനിമയിൽ എഴുന്നേറ്റിരുന്നിട്ടില്ല. സാബുമോൻ ആണ് കുട്ടമണിയായി തകർത്താടിയത്. സിനിമയിലെ തല്ലുപോലെ തന്നെ അത്ര സുഖമുള്ളതായിരുന്നില്ല ആ സീനിലെ അനുഭവങ്ങളെന്ന് സാബുമോൻ പറയുന്നു.
അന്നത്തെ തല്ലിനു ശേഷം തന്റെ കയ്യില് ഉണ്ടായ പരുക്കുകളുടെ ചിത്രങ്ങൾ താരം സമൂഹമാധ്യമത്തിലൂടെ പങ്കുവയ്ക്കുക ഉണ്ടായി. ‘അയ്യപ്പൻ നായരുടെ ചവിട്ട് നെഞ്ചത്ത് വാങ്ങിയ കുട്ടമണിയുടെ അവസ്ഥ. ആദ്യ ദിവസത്തെ മുണ്ടൂർ മാടനുമായുള്ള അടി ഷൂട്ടിന്റെ അന്ന് വൈകുന്നേരത്തെ അനുഭവങ്ങൾ.’–ചിത്രങ്ങൾക്കൊപ്പം സാബുമോന് കുറിച്ചു.
'ബൈ ദുബൈ, ബിജു ചേട്ടൻ ശരിക്കുമെടുത്തിട്ടലക്കിയല്ലേ', 'മുണ്ടൂര് മാടൻ ശരിക്കും ആവാഹിച്ചോ ആ സമയത്ത് ശരിക്കും ചാമ്പിയതായിരുന്നല്ലേ', 'മുണ്ടൂർ മാടനോട് കലിപ്പ് ഇടാൻ പോണായിരുന്നോ', 'ഞാനും വിചാരിച്ചു എന്തോരു അഭിനയം, ഫൈറ്റ് ഒക്കെ എന്ത് ഒർജിനാലിറ്റിയാണെന്ന്, എക്സ്പ്രഷൻ ഇട്ടതു മുഴുവൻ ഒർജിനൽ ആയിരുന്നല്ലെ?', 'അമ്മാതിരി അഭിനയം അല്ലായിരുന്നോ, പടം കണ്ടപ്പോ നിങ്ങക്കിട്ട് ഒന്ന് പൊട്ടിക്കാൻ എനിക്ക് വരെ തോന്നി' എന്നിങ്ങനെ പോവുന്നു ചിത്രത്തിന് ലഭിക്കുന്ന കമന്റുകൾ.
