കൊച്ചി: വിശുദ്ധവാര ആചരണത്തില് കര്ദിനാള് മാര് ജോര്ജ് ആലഞ്ചേരി എറണാകുളം സെന്റ് മേരീസ് ബസിലിക്കയില് നടത്തുന്ന ശുശ്രൂഷകളില് 20 പേര് പങ്കെടുക്കുമെന്ന മാധ്യമ വാര്ത്ത അടിസ്ഥാന രഹിതമാണെന്ന് സിറോ മലബാര് സഭയുടെ ആസ്ഥാനമായ കാക്കനാട് സെന്റ് തോമസ് മൗണ്ടില് നിന്നും അറിയിച്ചു. 20 പേര് പങ്കെടുക്കാന് അനുമതി തേടിയിട്ടില്ല. അഞ്ചു പേരെ പങ്കെടുപ്പിച്ചുകൊണ്ട് കുര്ബാന നടത്താമെന്ന് കെ.സി.ബി.സി അധ്യക്ഷന് എന്ന നിലയില് കര്ദിനാള് ജോര്ജ് ആലഞ്ചേരി കേരള സഭയ്ക്ക് നിര്ദേശം നല്കിയിരുന്നു.
ഈ നിര്ദേശം തന്നെയാണ് സിറോ മലബാര് സഭയിലെ എല്ലാ രൂപതകള്ക്കും നല്കിയിട്ടുള്ളത്. അതനുസരിച്ച് അഞ്ചു പേരില് കൂടാന് പാടില്ലെന്നും സര്ക്കാര് നിര്ദേശം കൃത്യമായി പാലിക്കണമെന്നും നിര്ദേശം നല്കിയിരിക്കേ അതിനു വിരുദ്ധമായി പ്രചരിക്കുന്ന എല്ലാ വാര്ത്തകളും അടിസ്ഥാന രഹിതമാണ്. ശുശ്രൂഷയ്ക്ക് മൂന്നു പേര്ക്കുള്ള അനുമതിയാണ് വാങ്ങിയിട്ടുണ്ടെന്നും സിറോ മലബാര് മീഡിയ കമ്മീഷന് സെക്രട്ടറി ഫാ. ആന്റണി തലച്ചെല്ലൂര് വ്യക്തമാക്കി.
