'ലൂസിഫർ' തെലുങ്ക് റീമേക്കിൽ ചിരഞ്ജീവി തന്നെയായിരിക്കും നായകൻ. സംവിധാനം നിര്വ്വഹിക്കുന്നത് അടുത്തിടെ പ്രഭാസ് ചിത്രം സാഹോ ഒരുക്കിയ സുജീത് റെഡ്ഡി ആയിരിക്കും. കേന്ദ്രകഥാപാത്രത്തെ അവതരിപ്പിക്കുകയും ഒപ്പം ചിത്രം നിർമിക്കുകയും ചെയ്യുന്നതും ചിരഞ്ജീവി തന്നെയായിരിക്കുമെന്ന് തെലുങ്ക് മാധ്യമങ്ങള് റിപ്പോര്ട്ട് ചെയ്തിരിക്കുകയാണ്. വാര്ത്ത പുറത്തുവന്നതിന് പിന്നാലെ ചിരഞ്ജീവിയെ ലൂസിഫറിലെ പ്രധാന കഥാപാത്രമായ സ്റ്റീഫൻ നെടുമ്പള്ളിയുടെ ലുക്കിലാക്കിയുള്ള ഫാൻ മെയ്ഡ് പോസ്റ്ററുകള് പ്രചരിക്കുന്നുമുണ്ട്.
മലയാളത്തിലെ ഇതുവരെയുള്ള ബോക്സ് ഓഫീസ് റെക്കോർഡുകളെയെല്ലാം തകർത്ത് ആദ്യമായി 200 കോടി ക്ലബ്ബിൽ ഇടം നേടിയ ചിത്രമായിരുന്നു മോഹൻലാൽ-പൃഥ്വിരാജ് കൂട്ടുകെട്ടിലൊരുങ്ങിയ ‘ലൂസിഫർ’. ആരാധകർ ആവേശത്തോടെ ഏറ്റെടുത്ത ചിത്രം. ചിത്രത്തിന്റെ തെലുങ്ക് പതിപ്പിൽ ചിരഞ്ജീവി നായകനാകുമെന്ന തരത്തിൽ വാര്ത്തകള് വന്നുതുടങ്ങിയിട്ട് ഏറെ നാളായെങ്കിലും അത് ഏകദേശം ഉറപ്പാക്കാവുന്ന റിപ്പോര്ട്ടാണ് ഇപ്പോള് തെലുങ്ക് മാധ്യമങ്ങളിൽ വന്നിരിക്കുന്നത്. സ്റ്റീഫനും ഖുറേഷിയും ഇനി ചിരഞ്ജീവി.
ചിരഞ്ജീവിയുടെ നിർമാണ കമ്പനിയായ കോണിഡെല പ്രൊഡക്ഷൻസായിരിക്കും നിര്മ്മാണം. അടുത്തിടെ ഇറങ്ങിയ ചിരഞ്ജീവി ചിത്രം സെയ്റാ നരസിംഹ റെഡ്ഢിയുടെ പ്രചരണാര്ത്ഥം കൊച്ചിയില് താരം എത്തിയപ്പോഴാണ് ലൂസിഫറിന്റെ റീമേക്ക് അവകാശം നേടിയതായി പ്രഖ്യാപിക്കുകയുണ്ടായത്.
‘ആചാര്യ’ എന്ന സിനിമയുടെ ചിത്രീകരണത്തിലാണ് ഇപ്പോള് ചിരഞ്ജീവി. ഇത് പൂര്ത്തിയായ ശേഷമായിരിക്കും ലൂസിഫർ തെലുങ്ക് റീമേക്കിന്റെ ചിത്രീകരണം ആരംഭിക്കുകയെന്നാണ് ലഭിക്കുന്ന സൂചന. ആദ്യം സംവിധായകൻ സുകുമാർ ആയിരുന്നു ചിത്രം സംവിധാനം ചെയ്യേണ്ടിയിരുന്നത്. അതിന് ശേഷമാണ് സാഹോ സംവിധായകനായ സുജീതിനെ തേടി അവസരം എത്തിയത്. തെലുങ്കിൽ വിപ്ലവമാകുമോ ചിത്രം എന്നാണ് ഇപ്പോൾ കണക്കുകൂട്ടൽ.
മുരളി ഗോപി കഥയും തിരക്കഥയും സംഭാഷണവുമൊരുക്കിയ ലൂസിഫര് നടൻ പൃഥ്വിരാജ് ആദ്യമായി സംവിധാനം ചെയ്ത ചിത്രമാണ്. കേരളത്തിലും കേരളത്തിന് പുറത്തും ചിത്രം നേടിയ മികച്ച വിജയം ഏറെ ചര്ച്ചയായിരുന്നു. ലൂസിഫര് രണ്ടാംഭാഗമായ എമ്പുരാൻ 2021ൽ പുറത്തിറങ്ങാൻ ഇരിക്കുകയുമാണ്.
