മുംബൈ: ഇന്ത്യയുടെ കോവിഡ് ആശങ്ക കൂട്ടി ഏഷ്യയിലെ ഏറ്റവും വലിയ ചേരിയായ മുംബൈയിലെ ധാരാവിയില് രോഗബാധിതരുടെ എണ്ണത്തില് വന് വര്ദ്ധനവ്. പ്രതീക്ഷിച്ചത് പോലെ തന്നെ രോഗം പടരുകയാണെന്ന സൂചന നല്കി 15 പേര്ക്ക് കൂടി പുതിയതായി രോഗം കണ്ടെത്തിയതോടെ ധാരാവിയില് രോഗികളുടെ എണ്ണം വെള്ളിയാഴ്ച വരെ 101 ആയിട്ടാണ് ഉയര്ന്നത്. 10 മരണവും റിപ്പോര്ട്ട് ചെയ്തിട്ടുണ്ട്.
ഏറ്റവും പുതിയതായി മരണം റിപ്പോര്ട്ട് ചെയ്യപ്പെട്ടിരിക്കുന്നത് 62 കാരനാണ്. മട്ടുംഗ ലേബര് ക്യാമ്പ്, മുസ്ളീം നഗരന്ദ് ഇന്ദിരാനഗര് എന്നിവിടങ്ങളില് മൂന്ന് കേസുകള് വീതവും സോഷ്യല് നഗറില് രണ്ടും ഡോ. ബലിംഗാ നഗര്, ലക്ഷ്മി ചാവ്ള്, ജനതാ സൊസൈറ്റി, സര്വോദയ സൊസൈറ്റി എന്നിവിടങ്ങളില് ഓരോന്ന് വീതവും റിപ്പോര്ട്ട് ചെയ്തു. വലിയ ജനസാന്ദ്രതയുള്ള ധാരാവിയില് എട്ടുലക്ഷം പേരാണ് അടുത്തടുത്ത് കിടക്കുന്ന ചെറ്റക്കുടിലുകളില് താമസിക്കുന്നത്. അതുകൊണ്ടു തന്നെ സര്ക്കാരിന്റെ സാമൂഹ്യഅകലം എന്ന നിബന്ധന ഇവിടെ ദുഷ്ക്കരമാണ്.
പ്രദേശം ഇന്ത്യയിലെ ഹോട്ട്സ്പോട്ടുകളിലാണ് പെടുത്തിയിരിക്കുന്നത്. കഴിഞ്ഞയാഴ്ച ധാരാവിയില് പ്രാദേശിക ഭരണകൂടം രോഗം പടരാന് സാധ്യതയുള്ള മാത്രം ഒമ്പത് രോഗബാധിത സോണുകള് കണ്ടെത്തിയിരുന്നു. രോഗവ്യാപനത്തിന്റെ സാധ്യത മുന്നില്ക്കണ്ട് പോലീസ് ബാരിക്കേഡുകളും മറ്റും വെച്ച് ഇവിടേയ്ക്ക് പ്രവേശനം നിഷേധിച്ചിരിക്കുകയാണ്. ഇവിടെയുള്ളവരെ പുറത്തേക്ക് വിടാതെ അവശ്യവസ്തുക്കളും മറ്റും വീട്ടില് എത്തിച്ചു കൊടുത്തുകൊണ്ടിരിക്കുയാണ്.
രാജ്യത്ത് കോവിഡ് ബാധിതര് ഏറെയുള്ള നഗരങ്ങളിലാണ് മുംബൈ. ഇവിടെ 2,073 കേസുകളാണ് റിപ്പോര്ട്ട് ചെയ്തത്. 1.2 കോടി ജനങ്ങളുള്ള നഗരം കഴിഞ്ഞ മാസം മുതല് തുടങ്ങിയിരിക്കുന്ന ലോക്ക് ഡൗണ് നീളുകയാണ്. ഏപ്രില് 30 വരെ മഹാരാഷ്ട്രയും ലോക്ഡൗണ് പ്രഖ്യാപിച്ചിരിക്കുകയാണ്. നഗരത്തില് ഉടനീളം വ്യാപക പരിശോധനകളും നടക്കുകയാണ്. ഇതുവരെ 27,000 പരിശോധനകളാണ് ബ്രിഹണ് മുംബൈ മുനിസിപ്പല് കോര്പ്പറേഷന് നടത്തിയത്്.
