ഒരു കൊച്ചു ഗായികയുടെ പാട്ടിന്റെ വിഡിയോ പങ്കുവച്ച് അത്ഭുതം പ്രകടിപ്പിച്ചിരിക്കുകയാണ് ഗായകന് ജി. വേണുഗോപാല്. അപ്രതീക്ഷിതമായി ശ്രദ്ധയില്പ്പെട്ട വിഡിയോയിലെ കൊച്ചു ഗായിക പാടുന്നതു കേട്ടപ്പോള് അറിയാതെ എഴുന്നേറ്റിരുന്നു പോയി എന്നു തുറന്നുപറഞ്ഞാണ് വേണുഗോപാലിന്റെ പോസ്റ്റ്.
തിരുവില്വാമല സ്വദേശി സനിഗ സന്തോഷ് ആണ് ഭാവഗായകനെ ഞെട്ടിച്ച ആ പാട്ടുകാരി.
ജി.വേണുഗോപാലിന്റെ ഫെയ്സ്ബുക്ക് കുറിപ്പിന്റെ പൂര്ണ രൂപം:
'കട്ടിലില് കിടന്ന് ദുബായിലെ സുഹൃത്ത് രൂപേഷ് അയച്ചു തന്ന ട്രോളുകള് ഓരോന്നായി കാണുന്നതിനിടയില് ഈ പാട്ടിന്റെ തുടക്കം എന്റെ കാതുകളെ കൂര്പ്പിച്ചു. ഞാനറിയാതെ എണീറ്റിരുന്നു. ഇരുത്തം വന്ന ഗായകര് പോലും എടുത്ത് പൊക്കാന് മടിക്കുന്ന പാട്ട്. അയത്ന ലളിതമായി ഒഴുകുന്നു ആ ഇളം കണ്ഠത്തിലൂടെ. കഠിനമായ സംഗതികള് മുഴുവന് സ്വന്തം തൊണ്ടയ്ക്കുതകുന്നതാക്കാനുള്ള നൈസര്ഗ്ഗികതയും.
നിറ സന്ധ്യയായ് ഞാനാരോമലേ...
വിടര്ന്നെന്നില് നീയൊരു പൊന് താരമായ്
മേലാകെ കുളിരു പെയ്യുന്നു. സംഗതികളുടെ കൃത്യതയല്ല. ശ്രുതിയും ലയവും ശബ്ദ സൗന്ദര്യവും കൊണ്ടവള് ആ പാട്ടവളുടേതാക്കി മാറ്റിയിരിക്കുന്നു. അവള് പാട്ടിനപ്പുറത്തേയ്ക്കു സഞ്ചരിക്കുന്നു. കേട്ടാലറിയാം അത് പഠിച്ചുണ്ടാക്കിയ പാട്ടല്ല. അതവളുടെ ഉള്ളിന്റെയുള്ളില് നിന്നാണ്. പ്രാര്ത്ഥനകള്'
