ഒരു സുപ്രഭാതത്തിൽ മലയാളി സിനിമാ പ്രേക്ഷകരെ അക്ഷരാർത്ഥത്തിൽ ഞെട്ടിച്ചത് ഭാവഗായകൻറെ മേക്കോവർ ചിത്രങ്ങളാണ്. ഈ ചിത്രങ്ങള് കണ്ടവരൊക്കെ ആദ്യ നോക്കിൽ കരുതിയത് അത് ഏതെങ്കിലും സിനിമാ നടനായിരിക്കും എന്നാവും. ഈ പ്രായത്തിലും ആൾക്ക് എന്നാ ഒരിതാ എന്നൊക്കെ മനസിലൂടെ ഓടിയിട്ടുണ്ടാകും. പക്ഷേ മലയാളികൾക്ക് അത്ര സുപരിചിതമായ മുഖമാണല്ലോ എന്ന ചിന്തയിൽ ഒന്നുകൂടി സൂക്ഷിച്ചു നോക്കുമ്പോഴാണ് ആളെ മനസിലാകുക. മലയാളത്തിന്റെ സ്വന്തം ഭാവഗായകനാണ് മസിലും പെരുപ്പിച്ച്, മീശ പിരിച്ച് നില്ക്കുന്നത്. ഏതോ ഗുസ്തിക്കാരനാണെന്നും ഹോളിവുഡ് നടനാണെന്നുമൊക്കെയുള്ള ചിന്തയും ചിലരിലുണ്ടായി. എന്തായാലും സോഷ്യൽ മീഡിയ ഈ ചിത്രങ്ങൾ ഏറ്റെടുക്കുകയായിരുന്നു. സിനിമാതാരങ്ങളടക്കം നിരവധി പേർ ഈ ചിത്രം തങ്ങളുടെ സോഷ്യൽ മീഡിയ അക്കൌണ്ടുകളിലൂടെ പോസ്റ്റ് ചെയ്തു.
76-ാം വയസ്സിലും ഫിറ്റ്നസ് കാത്തുസൂക്ഷിക്കുന്ന മലയാളത്തിൻ്റെ ഭാവഗായകൻ ജയചന്ദ്രൻ പുതിയ തലമുറയ്ക്ക് പ്രചോദനമാണെന്ന് വരെ പലരും ചിത്രങ്ങൾ ചൂണ്ടിക്കാട്ടി കൊണ്ട് വ്യക്തമാക്കി. ഇപ്പോഴിതാ ഈ വെെറലായ ചിത്രങ്ങൾക്ക് പിന്നിലെ 'രഹസ്യം' വെളിപ്പെടുത്തി രംഗത്തെത്തിയിരിക്കുകയാണ് ഭാവഗായകൻ. ക്ലബ് എഫ്.എമ്മിന് നൽകിയ പ്രത്യേക അഭിമുഖത്തിലാണ് ജയചന്ദ്രൻ ഈ 'രഹസ്യം' വെളിപ്പെടുത്തിയത്.
ജയചന്ദ്രൻ പറയുന്നതിങ്ങനെ... തന്റെ സുഹൃത്ത് പകർത്തിയ ഒരു ഫോട്ടോയാണിത്. താനങ്ങനെ ഫിറ്റ്നസ് നോക്കുന്ന ആളൊന്നുമല്ല. വയസ്സായില്ലേ? നടക്കാനൊക്കെ പോകുമായിരുന്നു. കുളിക്കുന്നതിന് മുൻപ് ചെറിയ വ്യായാമങ്ങൾ ചെയ്യും അത്ര തന്നെ. അതും വെറും അരമണിക്കൂർ മാത്രമാണെന്നും ഇപ്പോൾ വെറുതെ വീട്ടിലിരിക്കുകയാണല്ലോയെന്നും ജയചന്ദ്രൻ പറയുന്നു. ലോക്ക്ഡൗൺ അല്ലേ? വേറെ പരിപാടികളൊന്നും തന്നെയില്ലല്ലോ.
ചിത്രം വെെറലായതിന് പിന്നാലെ നിരവധി പേരാണ് ഇതിന്റെ പിന്നിലെ രഹസ്യമറിയാൻ വിളിക്കുന്നതെന്നും ജയചന്ദ്രൻ പറയുന്നു. കുറച്ച് പാട്ടുകൾ പാടിയിട്ടുണ്ട് പക്ഷേ ഒന്നും ഓർക്കുന്നില്ലെന്നും പുതിയ പാട്ടുകളൊന്നും മനസിൽ നിൽക്കാറില്ലെന്നും ഗായകൻ തുറന്ന് പറഞ്ഞു. ഇപ്പോൾ താൻ ബിജിബാലിന്റെ അടക്കം ഏതൊക്കെയോ സിനിമകൾക്ക് വേണ്ടി പാടിയിട്ടുണ്ടെന്നും ഇപ്പോഴത്തെ കാലത്തെ പാട്ടുകളൊന്നും മനസ്സിൽ നിൽക്കുന്നതല്ലെന്നും ജയചന്ദ്രൻ ഇതോടൊപ്പം കൂട്ടിച്ചേർത്തു.
