മുംബൈ : കോവിഡ് കാലത്തെ പതിവു കാഴ്ചയായ ചാലഞ്ചുകളുടെ കുത്തൊഴുക്കിനിടെ സച്ചിന് തെൻഡുൽക്കറിനു മുന്നിൽ ‘കീപ്പ് ഇറ്റ് അപ്പ് ചാലഞ്ച്’ വച്ച യുവരാജ് സിങ്ങിന് കിടിലൻ മറുപടിയുമായി സൂപ്പർതാരം. ക്രിക്കറ്റ് ബാറ്റിന്റെ സൈഡ് ഉപയോഗിച്ച് പരമാവധി സമയം പന്ത് നിലത്തിടാതെ തട്ടാനാണ് യുവരാജ് സിങ് സച്ചിനെ ചാലഞ്ച് ചെയ്തത്. സച്ചിനു പുറമെ രോഹിത് ശർമ, ഹർഭജൻ സിങ് എന്നിവരെയും യുവി ചാലഞ്ച് ചെയ്തു. ബാറ്റിന്റെ അരിക് ഉപയോഗിച്ച് പന്ത് നിലത്തിടാതെ തട്ടുന്ന വിഡിയോ സഹിതമായിരുന്നു ഇത്.
‘വെല്ലുവിളി നിറഞ്ഞ ഈ സമയത്ത്, വീട്ടിൽത്തന്നെ ചെലവഴിച്ച് കോവിഡ് 19നെ പ്രതിരോധിക്കാനും കഴിയുന്നത്ര അതേപടി തുടരാനും ഞാൻ പ്രതിജ്ഞാബദ്ധനാണ്. ഈ വെല്ലുവിളി ഏറ്റെടുക്കാൻ മാസ്റ്റർ ബ്ലാസ്റ്റർ സച്ചിൻ തെൻഡുൽക്കർ, ഹിറ്റ്മാൻ രോഹിത് ശർമ, ടർബണേറ്റർ ഹർഭജൻ സിങ് എന്നിവരെ ഞാൻ നോമിനേറ്റ് ചെയ്യുന്നു’ – വിഡിയോ സഹിതം യുവി ട്വിറ്ററിൽ കുറിച്ചു. സച്ചിനും രോഹിത് ശർമയ്ക്കും ഈ ചാലഞ്ച് എളുപ്പമായിരിക്കാമെങ്കിലും ഹർഭജൻ സിങ്ങിന് അത്ര എളുപ്പമായിരിക്കില്ല എന്ന് ഒന്ന് ‘കുത്താനും’ യുവി മറന്നില്ല.
എന്തായാലും യുവി ഉയർത്തിയ ചാലഞ്ച് ഏറ്റെടുത്ത് സച്ചിൻ തെൻഡുൽക്കർ രംഗത്തെത്തിയതോടെ ‘പോരാട്ടം’ ആവേശകരമായി. യുവരാജിന്റെ ചാലഞ്ച് ഏറ്റെടുത്തുവെന്ന് മാത്രമല്ല, സച്ചിന്റെ വക അതിൽ ട്വിസ്റ്റുമുണ്ടായിരുന്നു. ഒരു കറുത്ത തുണി ഉപയോഗിച്ച് കണ്ണുകെട്ടിയായിരുന്നു സച്ചിന്റെ പ്രകടനം! കണ്ണുകെട്ടി ബാറ്റു ചരിച്ചുപിടിച്ച് പന്ത് തട്ടിയ സച്ചിൻ, ചാലഞ്ച് യുവരാജിന്റെ തന്നെ മുന്നിലേക്ക് തിരികെ വയ്ക്കുകയും ചെയ്തു.
In these challenging times, I am committed to staying at home to prevent the spread of #Covid19 and will #KeepItUp as long as it is required.
I further nominate master blaster @sachin_rt hit man @ImRo45 and turbanator @harbhajan_singh @UN @deespeak pic.twitter.com/20OmrHt9zv— yuvraj singh (@YUVSTRONG12) May 14, 2020
‘യുവി, താങ്കൾ എനിക്ക് വളരെ എളുപ്പമുള്ള ഒരു ചാലഞ്ചാണ് നൽകിയത്. അതുകൊണ്ട് കുറച്ച് കടുപ്പമുള്ളൊരു ചാലഞ്ച് ഞാൻ തിരികെ നൽകുന്നു. ഇതൊന്ന് ഏറ്റെടുത്ത് നോക്കൂ’ – സച്ചിൻ വിഡിയോയിൽ പറഞ്ഞു.
I am challenging you back @YUVSTRONG12, but this time with a twist!!👀🙅🏻♂️😉
All I can ask everyone to do is take care and stay safe! pic.twitter.com/px4usxZPkT— Sachin Tendulkar (@sachin_rt) May 16, 2020
പക്ഷേ, ചാലഞ്ച് ഏറ്റെടുത്ത് സച്ചിൻ ഒരുക്കിയ ട്വിസ്റ്റുകൾ അവിടെയും തീർന്നില്ല. കണ്ണുകെട്ടി പന്ത് തട്ടാനുള്ള ചാലഞ്ച് യുവിക്കു മുന്നിൽവച്ച സച്ചിൻ, ചാലഞ്ച് ഏറ്റെടുക്കാനുള്ള ഒരു കുറുക്കുവഴിയും യുവിയോടു പങ്കുവച്ചു. സച്ചിന്റെ കണ്ണുകെട്ടിയിരുന്ന ആ കറുത്ത തുണി മറുവശം കാണാവുന്ന തരത്തിൽ സുതാര്യമായിരുന്നു! കണ്ണ് കെട്ടിയെങ്കിലും പന്ത് കണ്ടുകൊണ്ടാണ് സച്ചിൻ അതു തട്ടിയതെന്ന് വ്യക്തം. എന്തായാലും സച്ചിന്റെ ചാലഞ്ച് ആരാധകരും ഏറ്റെടുത്തതോടെ സംഭവം സമൂഹമാധ്യമങ്ങളിൽ ഹിറ്റായി. ഇതിനു പിന്നാലെ യുവരാജും പ്രതികരണവുമായെത്തി: ആളുമാറിയാണ് ഞാൻ വെല്ലുവിളിച്ചതെന്ന് തിരിച്ചറിയുന്നു. എന്തായാലും തിരികെ നൽകിയ ചാലഞ്ച് ഏറ്റെടുക്കാൻ എനിക്ക് ഒരാഴ്ച വേണ്ടിവരും.
