കോവിഡ് 19 ലോകത്തെ പിടിച്ചുലയ്ക്കുമ്പോള് സിനിമ മേഖലയിലും കടുത്ത പ്രതിസന്ധിയാണ് ഉയരുന്നത്. പല ചിത്രങ്ങളുടെയും ഷൂട്ടിംഗ് പാതിവഴിയില് നിര്ത്തി. പല ചിത്രങ്ങളും റിലീസിനായി തിയേറ്റര് തുറക്കുന്ന കാലം കാത്തിരിക്കുന്നു. ഇതിനിടെ ചില സിനിമകള് ഒടിടി റിസീനും തയ്യാറെടുക്കുന്നുണ്ട്. തിയേറ്റര് ഉടമകളും നിര്മ്മാതാക്കളും തമ്മിലുള്ള തര്ക്കത്തിന് ഇത് വഴിയൊരുക്കിയിട്ടുണ്ട്.
മഞ്ജു വാര്യരും സണ്ണി വെയ്നും ആദ്യമായി ഒന്നിക്കുന്ന ഹൊറര് ചിത്രം 'ചതുര്മുഖം' തീയേറ്ററില്ത്തന്നെ റിലീസ് ചെയ്യുമെന്ന് വ്യക്തമാക്കിയിരിക്കുകയാണ് നിര്മാതാവ് ജിസ് ടോംസ്. ഏകദേശം അഞ്ചരക്കോടി രൂപ ചെലവഴിച്ച് നിര്മ്മിച്ച ചിത്രത്തിന് ഗ്രാഫിക്സ് ജോലികള്ക്ക് മാത്രം 50 ലക്ഷം ചെലവായിട്ടുണ്ട്. ആമേന്, 9. ഡബിള് ബാരല് തുടങ്ങിയ സിനിമകള്ളുടെ ഛായഗ്രാഹണം നിര്വഹിച്ച അഭിനന്ദന് രാമാനുജനാണ് ചതുര്മുഖത്തിന്റെ ക്യാമറയുടെ പിന്നില്. പുതുമുഖങ്ങളായ രഞ്ജിത് കമല ശങ്കറും, സലിലും ചേര്ന്ന് സംവിധാനം ചെയ്യുന്ന ചിത്രത്തിന്റെ പിന്നണിയില് സിനിമാ മേഖലയിലെ ഏറ്റവും മികച്ച സാങ്കേതികവിദഗ്ധരാണ് ഒന്നിച്ചത്. ഇത്രയും മികച്ച ജോലി ചെയ്തിട്ട് തീയേറ്ററില് ഇറങ്ങാതെ ഓണ്ലൈനില് മാത്രം സിനിമ റിലീസ് ചെയ്താല് അതിന്റെ ആസ്വാദനം പൂര്ണമാവില്ലെന്ന് ജിസ് ടോംസ് ഒരു മാധ്യമത്തിന് അനുവദിച്ച അഭിമുഖത്തില് പറഞ്ഞു.
തിയേറ്ററുകള് തുറക്കാന് കാത്തിരിക്കുകയാണ്. മറ്റ് മാര്ഗമില്ലെങ്കില് മാത്രമേ ചതുര്മുഖ ഒ.ടി.ടി റിലീസിനായി ശ്രമിക്കൂ. തിയേറ്റര് എക്സ്പീരിയന്സ് ലഭിക്കാനാണ് കാത്തിരിക്കുന്നത്. ഏപ്രില് 20ന് റിലീസ് ചെയ്യാനായിരുന്നു ഉദ്ദേശിച്ചത്. ഇനി തീയേറ്ററുകള് തുറന്നിട്ട് വേണം പുതിയ റിലീസ് തിയതി നിശ്ചയിക്കാനെന്നും ജിസ് ടോംസ് കൂട്ടിച്ചേര്ത്തു.
