ടൊവിനോ തോമസ് നായകനാകുന്ന ബേസിൽ ജോസഫ് സംവിധാനം ചെയ്യുന്ന 'മിന്നൽ മുരളി' എന്ന സിനിമയുടെ സെറ്റ് പൊളിച്ച സംഭവം സിനിമാലോകത്ത് വലിയ ചർച്ചയായിരിക്കുകയാണ്. ഈ സെറ്റ് ഒരുക്കിയത് ഇന്ത്യയിലെ തന്നെ ബ്രഹ്മാണ്ഡ ചിത്രമായ 'ബാഹുബലി'ക്ക് പിന്നിൽ പ്രവര്ത്തിച്ച മനു ജഗത്താണ്. കാസർഗോഡ് നീലേശ്വരം സ്വദേശിയായ മനു ഗവണ്മെന്റ് കോളേജ് ഓഫ് ആർട്സ് ചെന്നൈയിൽ നിന്ന് ഫൈൻ ആർട്സ് ബിരുദം പൂർത്തിയാക്കിയ ശേഷം ഏകദേശം 9 വർഷത്തോളം സാബു സിറിലിന്റെ സഹായിയായി കലാസംവിധാന രംഗത്ത് പ്രവർത്തിച്ചയാളാണ്. അതിനു ശേഷമാണ് സ്വതന്ത്ര കലാസംവിധായകനായത്.
ബ്ലെസി സംവിധാനം ചെയ്ത 'കൽക്കട്ട ന്യൂസ്' എന്ന ചിത്രത്തിലൂടെ മികച്ച കലാസംവിധാനത്തിന് സംസ്ഥാന പുരസ്കാരം ലഭിച്ചിട്ടുണ്ട്. ഹിന്ദി, തമിഴ്, തെലുങ്ക്, മലയാളം തുടങ്ങി ദക്ഷിണേന്ത്യയിലെ മിക്ക ഭാഷകളിലും കലാസംവിധായകനായി പ്രവര്ത്തിച്ചിട്ടുമുണ്ട് മനു.
ബാഹുബലി സിനിമയിൽ പൗരാണിക കാലഘട്ടത്തിലെ മഹിഷ്മതി രാജധാനിയും പാൽവാതീവന്റെയും ബാഹുബലിയുടെയും കൂറ്റൻ പ്രതിമകളും ഉള്പ്പെടെയുള്ള നിര്മ്മിതികളുടെ സ്കെച്ചുകൾ വരച്ചത് മനുവായിരുന്നു. സിനിമയുടെ കലാസംവിധായകനായ സാബു സിറിലിനോടൊപ്പമായിരുന്നു മനു ഇത് പൂര്ത്തിയാക്കിയിരുന്നത്. കൂടാതെ ഒട്ടനവധി സിനിമകളിൽ മനു പ്രവര്ത്തിച്ചിട്ടുണ്ട്.
മാർച്ച് മൂന്നിനാണ് ഞങ്ങള് അവിടെ പണി തുടങ്ങിയതെന്നും ഏകദേശം 30 ലക്ഷം രൂപയോളം ഇതിനകം ചിലവഴിച്ചിരുന്നുവെന്നും ഇനിയും പൂര്ത്തിയാകാനായി ഉണ്ടായിരുന്നുവെന്നും മനു മാധ്യമങ്ങളോട് പറഞ്ഞിരിക്കുകയാണ്. സെറ്റ് പണിയുന്നതിനായി ചെന്നൈയിൽ നിന്നുള്ള തൊഴിലാളികളായിരുന്നു കൂടുതലും ഉണ്ടായിരുന്നത്. ലോക്ക് ഡൗൺ ആയതിനാൽ എല്ലാം നിര്ത്തിവെച്ചിരിക്കുകയായിരുന്നു. ആലുവ പുഴയുടെ നടുവിൽ രൂപപ്പെട്ട മണൽതിട്ടയിൽ ഒരുക്കിയ സെറ്റിന്റെ ഇപ്പോഴത്തെ അവസ്ഥ അറിയാൻ ഞായറാഴ്ച അവിടെ പോയിരുന്നുവെന്നും അപ്പോഴാണ് തകര്ക്കപ്പെട്ടിരിക്കുന്നതായി കണ്ടതെന്നും ആകെ തകര്ന്നുപോയെന്നും മനു മനോരമ ഓൺലൈനിന് നൽകിയ അഭിമുഖത്തിൽ പറഞ്ഞിരിക്കുകയാണ്.
മനു ഉള്പ്പെടെയുള്ള നൂറോളം പേരുടെ ഒരു മാസത്തെ അധ്വാനമായിരുന്നു മിന്നൽ മുരളിയിലെ ഈ പള്ളിയുടെ സെറ്റ്. മനുവിന്റെ സഹായിയായ ശരത് എം നായർ ഫേസ്ബുക്കിൽ ഇതേ കുറിച്ച് കുറിച്ചിരിക്കുന്നത് ഇങ്ങനെയാണ്. ഒരു തണലുപോലുമില്ലാത്ത ചുട്ടുപഴുത്ത മണലിൽ,പൊരിവെയിലത്ത് കഷ്ടപ്പെട്ടുണ്ടാക്കിയതാണ്, ഞങ്ങൾ നൂറോളംപേരുടെ ഒരു മാസത്തോളം നീണ്ട വിയർപ്പും അദ്ധ്വാനവുമാണ്, മനു ജഗത്തിന്റെ അത്രയും മനോഹരമായ ഒരു സൃഷ്ടിയാണ്, പ്രതിഭയുള്ളൊരു സംവിധായകന്റെ ഏറ്റവും വലിയ സ്വപ്നമാണ്, ഒരുപാടുപേർക്ക് അന്നം നൽകുന്നൊരു നിർമ്മാതാവിന്റെ വിയർപ്പാണ് ഒരുളുപ്പുമില്ലാതെ നെറികെട്ട വർഗ്ഗീയതയുടെ പേരിൽ നിസ്സാരമായി നിങ്ങൾ തകർത്തു കളഞ്ഞത് എന്നാണ് ശരത് കുറിച്ചിരിക്കുന്നത്.
ലോകം മുഴുവൻ ഒറ്റക്കെട്ടായി ഒരു മഹാവിപത്തിനെ നേരിടുമ്പോൾ, ഇതെല്ലാം കഴിഞ്ഞ് രണ്ടുമാസത്തോളം അന്നം കിട്ടാനുള്ള വഴിയെന്ന ഒരുപാട് പേരുടെ ആശ്വാസമായിരുന്നു. നിയമാനുസൃതമായ എല്ലാ അനുമതികളോടുംകൂടെ മഹാദേവനു മുന്നിൽ ആയുധപൂജ ചെയ്ത് പടിപടിയായി അതു പണിതുയരുന്നത് കാണുമ്പോൾ, മനസ്സുനിറയെ സന്തോഷവും, വെള്ളിത്തിരയിലതു നിറഞ്ഞുനിൽക്കുന്ന ദിനങ്ങളിൽ അഭിമാനത്തോടെ ഞങ്ങളുടെ വർക്കെന്ന് പറയാമല്ലോ എന്ന പ്രതീക്ഷയുമായിരുന്നു. ഓരോ മഴത്തുള്ളി വീഴുമ്പോഴും, ഞങ്ങളൊന്നടങ്കം ഉള്ളിൽ വിളിക്കും; മഹാദേവാ,മഴപെയ്യാതെ കാക്കണേയെന്ന്. കാലം നിങ്ങൾക്ക് മാപ്പുതരില്ല, ആരുടെ പേരിലാണോ നിങ്ങളിതു ചെയ്തത്, ആ മഹാദേവനും, ശരതിന്റെ വാക്കുകള് അവസാനിപ്പിച്ചിരിക്കുന്നത് ഇങ്ങനെയാണ്.
