അമ്പലപ്പുഴ: കരിമണല് ഖനനത്തിനെതിരേ സമരംനടക്കുന്ന തോട്ടപ്പള്ളി പൊഴിമുഖത്ത് സന്ദര്ശനത്തിനെത്തിയ പ്രതിപക്ഷനേതാവ് രമേശ് ചെന്നിത്തലയ്ക്കെതിരേ കേസ്. കോവിഡ് പെരുമാറ്റച്ചട്ടം ലംഘിച്ചതിനാണ് അമ്പലപ്പുഴ പോലീസ് കേസെടുത്തത്. സന്ദര്ശനത്തിനിടെ സാമൂഹിക അകലം പാലിച്ചില്ല എന്നതാണ് കേസിന് കാരണമെന്ന് സി.ഐ. ടി. മനോജ് പറഞ്ഞു.
പ്രതിപക്ഷനേതാവടക്കം ഇരുപതോളം പേര്ക്കെതിരേയാണു കേസ് എടുത്തിട്ടുള്ളത്. ഇന്നലെ രാവിലെയാണ് രമേശ് ചെന്നിത്തല തോട്ടപ്പള്ളിയില് സന്ദര്ശനത്തിനെത്തിയത്. ജനകീയ സമരസമിതി റിലേ നിരാഹാരം നടത്തുന്ന സമരപ്പന്തലിലെത്തി അദ്ദേഹം പ്രസംഗിച്ചു. തുടര്ന്ന് പൊഴിമുഖത്തെത്തി.
ഡി.സി.സി. പ്രസിഡന്റ് എം. ലിജു, കെ.പി.സി.സി. ജനറല്സെക്രട്ടറി എ.എ. ഷുക്കൂര്, മുന് എം.എല്.എ. അഡ്വ. ബി. ബാബുപ്രസാദ് തുടങ്ങി നേതാക്കളും പ്രവര്ത്തകരുമായി ഇരുപതിലേറെപ്പേര് ഒപ്പമുണ്ടായിരുന്നു. കോവിഡിന്റെ പശ്ചാത്തലത്തില് ആളുകള് കൂടുന്നത് നിരോധിച്ചിട്ടുളളതാണ്.
