മിനി സ്ക്രീനിലൂടെയും ബിഗ് സ്ക്രീനിലൂടെയും പ്രേക്ഷകർക്ക് പ്രിയങ്കരിയായി മാറിയ അഭിനേത്രിയാണ് മോളി കണ്ണമ്മാലി. ഒരുപക്ഷേ ചാള മേരി എന്ന് പറഞ്ഞാലാകും ഏറെ പ്രേക്ഷകർക്കും പെട്ടെന്ന് മനസിലാകുക. അടുത്തിടെ മോളി കണ്ണമ്മാലി വാർത്തകളിൽ നിറഞ്ഞത് ജീവിതത്തിലെ ദുരിതങ്ങൾ തുറന്നു പറഞ്ഞതിലൂടെയായിരുന്നു. ചതിയുടെയും വഞ്ചനയുടെയും പുതിയ കാലത്തിൻ്റെ അടയാളമായി മോളി കണ്ണമ്മാലി മാറിയിരുന്നു. ഇപ്പോഴിതാ മോളി തൻ്റെ പുതിയ മേക്കോവർ ലുക്കിലൂടെ സോഷ്യൽ മീഡിയയിൽ തരംഗം സൃഷ്ടിച്ചിരിക്കുകയാണ്.
മനോരമ ആരോഗ്യം മാസികയുടെ കവർ ചിത്രമായി പുറത്ത് വന്നിരിക്കുന്ന പുതിയ ചിത്രം സോഷ്യൽ മീഡിയയിൽ വൈറലാണ്. സെലിബ്രിറ്റി ഫോട്ടോഗ്രാഫറായ ശ്യാം ബാബുവാണ് ചിത്രത്തിന് പിന്നിൽ. ശ്യാമിനും മേക്കോവർ ലുക്ക് പരീക്ഷിച്ച മോളി കണ്ണമ്മാലിക്കും സോഷ്യൽ മീഡിയയിൽ പ്രശംസകളുടെ പ്രവാഹമാണ്. വർണ്ണ വെറിയുടെ അപ്രമാദിത്യം അടക്കിവാഴുന്ന ഇക്കാലത്ത് ഇത്തരം നീക്കങ്ങൾ സൃഷ്ടിക്കുന്നത് വലിയ ഇംപാക്ടാണ് എന്നാണ് സോഷ്യൽ മീഡിയ ചൂണ്ടിക്കാട്ടുന്നത്.
ആരാധകർക്കും സിനിമാ സീരിയൽ പ്രേമികൾക്കും പുറമേ നിരവധി സംവിധായകരും നടീ നടന്മാരും ചലച്ചിത്ര പ്രവർത്തകരും പ്രശംസകൾ അറിയിച്ച് ചിത്രങ്ങൾ പങ്കുവെക്കുന്നുണ്ട്. മേക്കോവർ പൊളിച്ചല്ലോ എന്ന് കുറിച്ചുകൊണ്ടാണ് സംവിധായകൻ ഒമർ ലുലു ചിത്രം പങ്കുവെച്ചിരിക്കുന്നത്. നിങ്ങൾക്കാകെ വേണ്ടത് ആത്മവിശ്വാസമാണ്. ബാക്കിയുള്ളതെല്ലാം നിങ്ങളെ തേടിയെത്തും എന്ന് കുറിച്ചുകൊണ്ടാണ് ചിത്രം പകർത്തിയ ശ്യാം പോസ്റ്റർ പങ്കുവെച്ചിരിക്കുന്നത്.
