കൊവിഡ് വ്യാപനത്തെ തുടര്ന്ന് ലോക്ക്ഡൗണും കാര്യങ്ങളുമായി മുന്നോട്ട് പോകുകയാണ് രാജ്യം. ആരോഗ്യ പ്രവര്ത്തകരും പൊലീസ് ഉദ്യോഗസ്ഥരും വിശ്രമമില്ലാതെ ജനങ്ങള്ക്ക് വേണ്ടി ജോലി ചെയ്യുകയാണ്. ഇപ്പോള് റെയില്വേ മന്ത്രി പീയുഷ് ഗോയലിന്റെ അഭിനന്ദനം ഏറ്റുവാങ്ങിയ ഒരു പോലീസ് ഉദ്യോഗസ്ഥയാണ് സോഷ്യല് മീഡിയയില് താരമായിരിക്കുന്നത്.
ശ്രമിക് സ്പെഷ്യല് ട്രെയിനില് യാത്ര ചെയ്ത നാല് മാസം പ്രായമായ കുഞ്ഞിന് വീട്ടില് നിന്നും പാലെത്തിച്ച് നല്കിയ സുശീല ബടായിക് എന്ന ഉദ്യോഗസ്ഥയാണ് പ്രശംസ അര്ഹിച്ചത്. ഹതിയ റെയില്വേ സ്റ്റേഷനിലായിരുന്നു സംഭവം. റെയില്വേ പ്രൊട്ടക്ഷന് ഫോഴ്സിന്റെ അസിസ്റ്റന്റ് സബ് ഇന്സ്പെക്ടറായി ജോലി നോക്കുകയാണ് സുശീല. ട്രെയിനിലെ യാത്രക്കാരിയായ യുവതി തന്റെ കുഞ്ഞിന് വിശക്കുന്നുണ്ടെന്ന് സുശീലയെ അറിയിക്കുകയായിരുന്നു.
ഇതോടെ സുശീല തന്റെ വാഹനമെടുത്ത് വീട്ടിലെത്തി പാല് ചൂടാക്കി യുവതിയെ ഏല്പ്പിക്കുകയായിരുന്നു. മധുബാനിയിലെ തന്റെ നാട്ടിലേക്ക് മടങ്ങുകയായിരുന്ന മെഹ്രുനിഷ എന്ന യുവതിയുടെ കുഞ്ഞിനാണ് സുശീല സഹായവുമായി രംഗത്തെത്തിയത്. എഎസ്ഐ മനുഷ്യത്വവും പ്രതിബദ്ധതയും കാണിച്ചതില് അഭിമാനിക്കുന്നുവെന്നാണ് പീയുഷ് ഗോയല് ട്വിറ്ററില് കുറിച്ചത്.
