മുംബൈ : ഇന്ത്യൻ ക്രിക്കറ്റ് ടീമംഗങ്ങളുടെ ‘സ്ത്രീ രൂപ’ങ്ങളുമായി ഇൻസ്റ്റഗ്രാമിൽ പോസ്റ്റിട്ട് വൈറലാക്കിയ യുവരാജ് സിങ്ങിന്റെ വഴിയേ മറ്റൊരു പോസ്റ്റുമായി സഹതാരം ഹർഭജൻ സിങ്ങും. ഇപ്പോഴത്തെ ഇന്ത്യൻ ടീമംഗങ്ങളുടെ ചിത്രങ്ങൾക്ക് ‘സ്ത്രീ രൂപം’ നൽകിയ യുവരാജിനു പകരം ഹർഭജൻ തിരഞ്ഞെടുത്തത് സച്ചിൻ തെൻഡുൽക്കറും സൗരവ് ഗാംഗുലിയും ഉൾപ്പെടുന്ന മുൻ തലമുറയെ. എന്തായാലും യുവിക്കു പിന്നാലെ ഹർഭജന്റെ പോസ്റ്റും ആരാധകർ ഏറ്റെടുത്തു. പോസ്റ്റിന് കമന്റുമായി ബിസിസിഐ പ്രസിഡന്റ് കൂടിയായ മുൻ ക്യാപ്റ്റൻ സൗരവ് ഗാംഗുലി കൂടി രംഗത്തെത്തിയതോടെ രംഗം കൊഴുത്തു.
യുവരാജിന്റെ പോസ്റ്റിന്റെ ചുവടുപിടിച്ച്, ‘ഇതിൽ ആരെ നിങ്ങൾ ഡേറ്റിങ്ങിന് തിരഞ്ഞെടുക്കും’ എന്നായിരുന്നു ഹർഭജന്റെ ചോദ്യം. ചിത്രത്തിൽ ഉണ്ടായിരുന്നത് മുൻ ഇന്ത്യൻ താരങ്ങളായ വീരേന്ദർ സേവാഗ്, ഹർഭജൻ സിങ്, സച്ചിൻ തെൻഡുൽക്കർ, രാഹുൽ ദ്രാവിഡ്, സൗരവ് ഗാംഗുലി, യുവരാജ് സിങ്, സഹീർ ഖാൻ, ഗൗതം ഗംഭീർ, ആശിഷ് നെഹ്റ എന്നീ ‘വനിത’കൾ.
ഇതിനിടെയാണ് പോസ്റ്റിനു കമന്റുമായി ഗാംഗുലി തന്നെ രംഗത്തെത്തിയത്. ‘ഫ്ലാഷി ഗ്ലാസ് വച്ച നടുവിലെ ആ കുട്ടിയെ എനിക്കിഷ്ടപ്പെട്ടു’ എന്നായിരുന്നു ഗാംഗുലിയുടെ കമന്റ്. അത് ആരുടെ ചിത്രമാണെന്നല്ലേ? സാക്ഷാൽ ഗാംഗുലിയുടെ തന്നെ. തന്റെ തന്നെ ചിത്രത്തിനാണ് തമാശരൂപേണ ഗാംഗുലി ലൈക്കടിച്ചത്. ശിഖർ ധവാൻ ഉൾപ്പെടെയുള്ള താരങ്ങളും കമന്റുമായെത്തി.
