ശ്രീനാഥ് ഭാസി, റോഷൻ മാത്യു, അന്ന ബെൻ, തൻവി റാം എന്നിവരെ കേന്ദ്രകഥാപാത്രങ്ങളാക്കി നടനായ മുഹമ്മദ് മുസ്തഫ ആദ്യമായി സംവിധാനം ചെയ്ത കപ്പേള ഇപ്പോൾ സോഷ്യൽ മീഡിയയിൽ വീണ്ടും ചർച്ചാ വിഷയമായി മാറിയിരിക്കുകയാണ്. ചിത്രം തീയേറ്ററുകളിലെത്തി വിജയകരമായ ദിവസങ്ങൾ പിന്നിടവേയാണ് കേരളത്തിൽ കൊറോണ പിടിമുറുക്കാനാരംഭിച്ചത്. ഇതുമായി ബന്ധപ്പെട്ടുള്ള മുൻകരുതലിൻ്റെ ഭാഗമായി പിന്നാലെ തീയേറ്ററുകൾക്ക് പൂട്ടു വീണു. ഇതിനെ തുടർന്ന് തീയേറ്ററുകളിൽ നിന്ന് ചിത്രം പിൻവലിക്കപ്പെടുകകയും പിന്നീട് ആഴ്ചകൾക്ക് മുൻപാണ് കപ്പേള ഓടിടി പ്ലാറ്റ്ഫോമിലൂടെ പ്രേക്ഷകരിലേക്കെത്തിയത്.
ഇപ്പോഴിതാ ചിത്രത്തിൻ്റെ റിവ്യൂകളും ചർച്ചകളുമൊക്കെയാണ് സോഷ്യൽ മീഡിയയിലെ സിനിമാ പ്രേമികളുടെ കൂട്ടായ്മയ്ക്കിടയിൽ നടക്കുന്നത്. ചിത്രത്തിന് ഭൂരിഭാഗം പേരും പോസിറ്റീവായ പ്രതികരണമാണ് നൽകുന്നത്. ഈ നല്ല പ്രതികരണങ്ങൾക്ക് നന്ദി അറിയിച്ച് രംഗത്തെത്തിയിരിക്കുകയാണ് ചിത്രത്തിലെ പ്രധാന കഥാപാത്രങ്ങളിലൊന്ന് അവതരിപ്പിച്ച നടി തൻവി റാം. ചിത്രത്തിൽ ശ്രീനാഥ് ഭാസി അവതരിപ്പിച്ച കഥാപാത്രത്തിൻ്റെ പെയറായാണ് തൻവി പ്രത്യക്ഷപ്പെട്ടത്.
റോയ് എന്ന കഥാപാത്രമായി ശ്രീനാഥ് ഭാസി എത്തിയപ്പോൾ ആനി എന്ന കഥാപാത്രമായാണ് തൻവി എത്തിയത്. എല്ലായിടത്തു നിന്നും നല്ല പ്രതികരണം ലഭിക്കുന്നതിൽ സന്തോഷമുണ്ടെന്നും വലിയ ചിത്രത്തിൻ്റെ ചെറിയ ഭാഗമാകാനായതിലും സംവിധായകൻ്റെ ആദ്യസംരംഭത്തിൽ ക്ഷണിക്കപ്പെട്ടതിലും സന്തോഷമുണ്ടെന്നും തൻവി കുറിച്ചു.
അഭിനേതാവായി കഴിവ് തെളിയിച്ച മുസ്തഫ ഇക്ക മനോഹരമായി ആവിഷ്കരിച്ച അദ്ദേഹത്തിൻ്റെ ആദ്യ സംവിധാന സംരംഭ ചിത്രത്തിൽ അവസരം നൽകിയതിന് അദ്ദേഹത്തിനാണ് ക്രെഡിറ്റെന്നും ചിത്രം ഇത്ര വിജയമാക്കി മാറ്റിയ ക്രൂവിലെ ഓരോരുത്തർക്കും ക്രെഡിറ്റ് അർഹിക്കുന്നെന്നും തൻവി കുറിച്ചു. പിന്നെ തീർച്ചയായും എൻ്റെ കോസ്റ്റാറിനും, തന്നെ കംഫർട്ടബിളാക്കി നിർത്തി വേണ്ട നിർദ്ദേശങ്ങൾ നൽകി ഈ യാത്രയിലൊരു വഴികാട്ടിയായതിന് ശ്രീനാഥ് ഭാസിക്കും നന്ദിയെന്നും തൻവി കുറിച്ചിരിക്കുന്നു.
