ആദ്യ ചുംബനമായാലും അന്ത്യ ചുംബനമായാലും പ്രണയ ചുംബനമായാലും എല്ലാറ്റിനും അതിന്റേതായ പ്രധാന്യമുണ്ട്. ഇക്കാര്യം ഓര്മ്മിപ്പിക്കുകയാണ് ജൂലൈ 6. ഒരു ചെറു ചുംബനത്തിലൂടെ തങ്ങള് സ്നേഹിക്കുന്നവരോട് മനസ്സിലെ വൈകാരികത മുഴുവന് പറയാതെ പങ്കുവെയ്ക്കുന്ന ചെറിയ വലിയ പ്രവര്ത്തി. പ്രണയത്തിന്റെ യഥാര്ത്ഥ സന്തോഷം പങ്കുവെച്ച് ലോകം ഇന്ന് ചുംബനദിനം ആഘോഷിക്കുന്നു.
തങ്ങളുടെ പരിശുദ്ധമായ സ്നേഹവും ഇഷ്ടവും സന്തോഷത്തോടെ ചെയ്യുന്ന ഈ ചെറിയ പ്രവര്ത്തിയില് നിറഞ്ഞു നില്ക്കുന്ന എന്നും പ്രിയപ്പെട്ടവര്ക്കായി സമയം കണ്ടെത്താനും അവരോടുള്ള കരുതലും സ്നേഹവും ബോദ്ധ്യപ്പെടുത്താനും വേണ്ടിയുള്ളതാണ് ചുംബനദിനമെന്നും വെറുതേ ഒരു ചടങ്ങിന് വേണ്ടിയോ യാന്ത്രികമായോ ആവരുത് ഈ പ്രവര്ത്തി എന്നും അത് നിങ്ങളോട് ആവശ്യപ്പെടുന്നു. ദീര്ഘകാലം നില നില്ക്കുന്ന ആത്മസംതൃപ്തിയുള്ള ബന്ധങ്ങളില് രണ്ടുപേര്ക്കിടയിലെ തീനാളത്തെ ഊതിക്കത്തിക്കാനുള്ള ചെറിയ തീപ്പൊരി എന്നാണ് വിശേഷണം.
അതേസമയം വാലന്റൈന്സ് ഡേ പോലെ ഒരു ഔദ്യോഗിക അവധി ദിനമൊന്നുമല്ല അന്താരാഷ്ട്ര ചുംബനദിനം. എന്നിരുന്നാലും തങ്ങളുടെ പ്രണയ തീവ്രത ബോദ്ധ്യപ്പെടുത്താന് 2000 ന്റെ തുടക്കം മുതല് ആള്ക്കാര്ക്കിടയില് ഇത് കൂടുതല് പ്രസിദ്ധമാണ്. യുകെയില് തുടങ്ങിയ പതിവ് പിന്നീട് ലോകം മുഴൂവന് വ്യാപിച്ചു. അതേസമയം ജൂലൈ ആറിന് പുറമേ തന്നെ ലോകത്തിന്റെ വിവിധ ഭാഗങ്ങളില് ഫെബ്രുവരി 13 നു മറ്റൊരു ചുംബന ദിനം കൂടി ലോകം ആഘോഷിക്കുന്നുണ്ട്.
പരസ്യചുംബനം റോമാക്കാരുടെ പതിവായിരുന്നു എന്നാണ് ചരിത്രം രേഖപ്പെടുത്തുന്നത്. ചില പ്രത്യേക സ്ഥലത്ത് പ്രത്യേക സാഹചര്യത്തില് സാമൂഹ്യ പദവിയുടെ സൂചനയായി അവര് ഉപയോഗിച്ചിരുന്ന പ്രവര്ത്തിയാണ്. മൂന്ന് തരത്തില് റോമാക്കാര് ഈ പ്രവര്ത്തിയെ തിരിച്ചിരുന്നു. സ്നേഹത്തോടെ സൗഹൃദം പ്രകടിപ്പിക്കാന് ഉപയോഗിച്ചിരുന്ന 'ഒസ്കുലം' എന്നാല് കവിളില് നല്കുന്ന മുത്തം. 'ബാസിയം'പ്രണയാര്ദ്രമാകുന്ന നേരത്ത് അത് പ്രകടിപ്പിക്കാന് ചുണ്ടില് നല്കുന്ന ചുംബനം, പ്രണയത്തിന്റെയും കാമത്തിന്റെലും ലക്ഷണമായി മാറുന്ന വൈകാരിക ചുംബനത്തെ 'സേവിയം' എന്നും അവര് വിളിക്കുന്നു.
ഈയൊരു ചെറിയ പ്രവര്ത്തിയിലൂടെ പങ്കാളി നിങ്ങളെ എത്രമാത്രം മതിക്കുന്നെന്നും കരുതുന്നെന്നും സ്നേഹിക്കുന്നെന്നും ബോദ്ധ്യപ്പെടുത്തുന്നെന്നാണ് മന:ശ്ശാസ്ത്ര വിശകലനം. ഈ ദിനം ആള്ക്കാരെ കൂടുതല് അടുപ്പിക്കുന്നു.
