ബിഗ് ബോസ് തമിഴ് പതിപ്പിലൂടെ ശ്രദ്ധേയ ആയ താരമാണ് മീര മിഥുന്. ബിഗ് ബോസിലെ വിവാദനായികയായിരുന്ന താരം അതിലെ മത്സരാര്ഥിയായ നടന് ചേരനെതിരേ ലൈംഗികാരോപണം ഉന്നയിച്ചിരുന്നു. ആരോപണം തെറ്റാണെന്ന് തെളിഞ്ഞതോടെ താരത്തെ പുറത്താക്കിയിരുന്നു. തുടര്ന്ന് മീര കമല്ഹാസനെതിരെ ആരോപണവുമായി രംഗത്ത് വന്നു. കമലിന്റെ ഒരു ചിത്രത്തില് നിന്ന് തന്നെ പുറത്താക്കി മകള് അക്ഷര ഹാസന് അവസരം നല്കിയെന്നായിരുന്നു മീര ആരോപിച്ചത്.
മീരയുടെ ആരോപണം തെറ്റാണെന്ന് കാട്ടി ചിത്രത്തിന്റെ അണിയറ പ്രവര്ത്തകര് രംഗത്ത് വന്നതോടെ ബിഗ് ബോസ് ഷോയിലെ പുരുഷ മത്സരാര്ഥികളെല്ലാം തനിക്ക് പിറകെയായിരുന്നുവെന്നും അവര്ക്ക് തന്റെ കൂടെ സമയം ചെലവഴിക്കാന് ആഗ്രമുണ്ടായിരുന്ന ആരോപണവുമായാണ് മീര വന്നത്. ഇതു പലരും നിഷേധിച്ചപ്പോള് ഇപ്പോള് തെന്നിന്ത്യന് സുന്ദരി തൃഷയ്ക്കെതിരെയാണ് മീര തിരിഞ്ഞിരിക്കുന്നത്. ഫോട്ടോഷോപ്പ് ഉപയോഗിച്ച് തൃഷ പോസ്റ്റ് ചെയ്യുന്ന ചിത്രങ്ങള് തന്റെ ചിത്രങ്ങള് മോര്ഫ് ചെയ്ത് ഉപയോഗിക്കുന്നതാണെന്നാണ് മീരയുടെ പുതിയ ആരോപണം.
'' തൃഷ, ഇത് നിനക്കുളള അവസാന മുന്നറിയിപ്പാണ്. ഇനി എന്റെ ഹെയര്സ്റ്റൈലിനു സമാനമായ ചിത്രങ്ങള് ഫോട്ടോഷോപ്പ് ചെയ്ത് സമൂഹമാധ്യമങ്ങളില് പങ്കുവച്ചാല് വിവരം അറിയും. നിങ്ങള്ക്കറിയാം ഞാന് ഇതെന്തുകൊണ്ടാണ് പറഞ്ഞതെന്ന്. വളരാന് പഠിക്കൂ.'' മീര കുറിച്ചു. മീരയുടെ പുതിയ ആരോപണത്തിനെതിരെ ട്രോളുകളും വിമര്ശനവുമായി ആരാധകരും എത്തി. തൃഷ നിങ്ങളെപ്പോലെ വെറുതെ ഇരിക്കുകയല്ലെന്നും അതിനാല് ആരോപണം കണ്ട് കാണില്ലെന്നുമാണ് ഒരാള് കുറിച്ചത്. നിങ്ങള്ക്ക് മാനസികമായി പ്രശ്നമുണ്ടെന്നും ഡോക്ടറെ കാണേണ്ടതുണ്ടെന്നുമാണ് മറ്റൊരാള് കുറിച്ചത്.
