തിരുവനന്തപുരം: അവസാന സെമസ്റ്റർ ഒഴികെയുള്ള എല്ലാ സെമെസ്റ്ററുകൾക്കും യൂണിവേഴ്സിറ്റി പരീക്ഷ ഒഴിവാക്കുവാൻ സാങ്കേതിക സർവകലാശാല സിണ്ടിക്കേറ്റ് തീരുമാനിച്ചു. യു.ജി.സി നിർദ്ദേശങ്ങൾ പ്രകാരം മുൻ സെമസ്റ്റർ പരീക്ഷകളിലെ ശരാശരി ഗ്രേഡുകൾക്ക് ആനുപാതികമായി മാർക്കുകൾ നൽകുവാനാണ് തീരുമാനം. ഇപ്രകാരം ലഭിക്കുന്ന നൂറുമാർക്കിനൊപ്പം ആഭ്യന്തര മൂല്യനിർണ്ണയം വഴി അൻപതിൽ ലഭിച്ച മാർക്ക് ഏകീകരിക്കും. ഈ രണ്ടുമാർക്കുകളും ചേർത്ത് നൂറ്റിഅമ്പതുമാർക്കിനാണ് ഗ്രേഡുകൾ നിശ്ചയിക്കുക. ഇതിനൊപ്പം എല്ലാ വിഷയങ്ങൾക്കും അഞ്ച് ശതമാനം പൊതു മോഡറേഷൻ മാർക്കും അധികമായി നൽകും.
മുൻസെമെസ്റ്ററുകളിലെ എല്ലാ വിഷയങ്ങളും വിജയിക്കുന്ന മുറയ്ക്കാണ് ഈ സെമെസ്റ്റെറിന്റെ ഗ്രേഡ് കാർഡുകൾ വിദ്യാർത്ഥികൾക്ക് നൽകുക. ഇപ്രകാരം ലഭിക്കുന്ന ഗ്രേഡുകൾ തൃപ്തികരമല്ലെങ്കിൽ അവ റദ്ദുചെയ്യുവാനും തുടർന്ന് അതേവിഷയത്തിലെ അടുത്തപരീക്ഷ എഴുതുവാനും അനുവദിക്കും. നിലവിലെ രണ്ട്, നാല്, ആറ് സെമെസ്റ്ററുകളിലെ റഗുലർ വിദ്യാർത്ഥികൾക്കാണ് ഇവ ബാധകമാവുക. ഇതോടൊപ്പം നിലവിലെ രണ്ടാം സെമസ്റ്റർ വിദ്യാർത്ഥികൾക്ക് അവരുടെ ഒന്നാം സെമെസ്റ്ററിലെ ഏതെങ്കിലും രണ്ടുവിഷയങ്ങളിലെ മാർക്കുകൾ മെച്ചപ്പെടുത്തുവാനുള്ള അവസരവും അധികമായി നൽകും.
അവസാന സെമസ്റ്റർ വിദ്യാർത്ഥികൾക്ക് പരീക്ഷ നടത്തണമെന്ന യു.ജി.സി. നിർദേശമുള്ളതുകൊണ്ട് യൂണിവേഴ്സിറ്റി നിർദേശങ്ങൾക്കനുസൃതമായി കോളേജ് തലത്തിൽ പരീക്ഷ നടത്തും. ഈ പരീക്ഷകളുടെ നടത്തിപ്പിനെപ്പറ്റിയു-ള്ള വിശദമായ നിർദേശങ്ങളും മറ്റുവിവരങ്ങളും യൂണിവേഴ്സിറ്റി ഉടൻതന്നെ പ്രസിദ്ധപ്പെടുത്തും. ഓരോ വിഷയത്തിലും കോളേജ് തലത്തിൽ ലഭിക്കുന്ന മാർക്കുകൾ വിദ്യാർത്ഥികളുടെ മുൻസെമെസ്റ്ററുകളിലെ ശരാശരി ഗ്രേഡുകൾക്ക് ആനുപാതികമായി ഏകീകരിക്കും. ക്യാമ്പസ് പ്ലേസ്മെന്റ് വഴി ജോലിലഭിച്ചവർക്കും വിവിധ സർവകലാശാലകളിൽ ഉന്നതപഠനത്തിനായി പ്രവേശനം ലഭിച്ചവർക്കും പരീക്ഷകൾ നീണ്ടുപോകുന്നതുമൂലം അവസരങ്ങൾ നഷ്ടമാകാതിരിക്കാനാണ് യൂണിവേഴ്സിറ്റി ശ്രമിക്കുന്നതെന്ന് വൈസ് ചാൻസലർ ഡോ.എം.എസ്. രാജശ്രീ അഭിപ്രായപ്പെട്ടു. യൂണിവേഴ്സിറ്റി നിർദേശങ്ങൾക്കനുസരിച്ച് നടത്തുന്ന കോളേജ്തല പരീക്ഷകൾ വഴി ഗ്രേഡുകൾ നേടുവാൻ താല്പര്യമില്ലാത്ത വിദ്യാർത്ഥികൾക്കും, ഈ പരീക്ഷയിൽ ലഭിച്ച ഗ്രേഡുകൾ മെച്ചപ്പെടുത്തുവാൻ ആഗ്രഹിക്കുന്നവർക്കും സെപ്റ്റംബറിൽ നടത്തുന്ന യൂണിവേഴ്സിറ്റി പരീക്ഷകളിൽ അവസരം ലഭിക്കും.നിലവിലെ കോവിഡ് സാഹചര്യം മെച്ചപ്പെടുന്ന മുറക്ക് സപ്ലിമെന്ററി പരീക്ഷകൾ നടത്തും.
കുട്ടികൾക്ക് വീട്ടിലിരുന്ന് പരീക്ഷ എഴുതാം.ലാസ്റ് സെമസ്റ്റർ പരീക്ഷകൾ ഓൺലൈൻ ആയിട്ടാണ് നടത്തുക. പരീക്ഷ നടത്തിപ്പ് ചുമതല കോളേജുകൾക്ക് ആയിരിക്കും. യൂണിവേഴ്സിറ്റിയുടെ മാർഗനിർദേശങ്ങൾക്ക് വിധേയമായിട്ടാകും കോളേജുകൾ പരീക്ഷ നടത്തുക.
