മലയാളികളുടെ മനസ്സറിഞ്ഞ് ഒരുക്കിയ സിനിമയായിരുന്നു തണ്ണീർമത്തൻ ദിനങ്ങൾ. ചിത്രത്തിൻ്റെ റിലീസിന് ഇന്ന് ഒരു വർഷം തികയുകയാണ്. ഈ സുന്ദര വേളയിൽ ചിത്രത്തിൻ്റെ ഓർമ്മ പങ്കുവെച്ചിരിക്കുകയാണ് സിനിമയിലെ താരങ്ങളും അണിയറപ്രവർത്തകരും. കഴിഞ്ഞ വർഷം ജൂലൈ 26നായിരുന്നു ചിത്രം പുറത്തിറങ്ങിയത്. റൊമാന്റിക് കോമഡി ഗണത്തിൽ പെടുന്ന ഈ ചിത്രം സംവിധാനം ചെയ്തത് നവാഗതനായ ഗിരീഷ് എ ഡിയാണ്. ഡിനോയ് പൗലോസും ഗിരീഷ് എഡിയും ചേർന്നാണ് തണ്ണീർമത്തൻ ദിനങ്ങളുടെ രചന നിർവ്വഹിച്ചിരിക്കുന്നത്.
വിനീത് ശ്രീനിവാസൻ, മാത്യു തോമസ്, അനശ്വര രാജൻ എന്നിവരായിരുന്നു ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിച്ചത്. പ്ലാൻ ജെ സ്റ്റുഡിയോവും, ഷെബിൻ ബെക്കർ പ്രൊഡക്ഷൻസും ചേർന്ന് നിർമ്മിച്ച ചിത്രത്തിലെ ഗാനങ്ങൾക്ക് ഈണം പകർന്നത് ജസ്റ്റിൻ വർഗ്ഗീസാണ്. ചിത്രത്തിൻ്റെ റിലീസ് വാർഷികത്തിൽ നടി അനശ്വര സോഷ്യൽ മീഡിയയിലൂടെ പങ്കുവെച്ച ഓർമ്മക്കുറിപ്പ് ശ്രദ്ധേയമാകുകയാണ്. തണ്ണീർമത്തൻ ദിനങ്ങളുടെ സന്തോഷം ആഘോഷിക്കുകയാണ്, ക്രൂവിനും കാസ്റ്റിനും പ്രേക്ഷകർക്കും നിരൂപകർക്കുമൊക്കെ ഒരുപാട് സ്നേഹം. ഈ യാത്രയിൽ ഒപ്പം കൂടിയ എല്ലാവരോടും നന്ദിയെന്നും ചിത്രത്തിൻ്റെ ഹാങോവർ തുടരുകയാണെന്നും അനശ്വര ഫേസ്ബുക്കിൽ കുറിച്ചു.
അതേസമയം ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിച്ച സന്ദീപ് ചന്ദ്രനും ഫേസ്ബുക്കിലൂടെ ഓർമ്മക്കുറിപ്പ് പങ്കുവെച്ചു. അതിങ്ങനെയാണ്..., 'തണ്ണീർമത്തൻ ദിനങ്ങളുടെ ഒരു വർഷം. കുട്ടിക്കാലം മുതൽക്കേ ഉള്ള ഏറ്റവും വലിയ ആഗ്രഹമായിരുന്നു സിനിയിൽ അഭിനയിക്കുക എന്നത്. ആഗ്രഹം തീവ്രമായിരുന്നെങ്കിലും ഇതൊക്കെ എന്നെ പോലുള്ള സാധാരണക്കാരെകൊണ്ട് സാധിക്കുമോ എന്ന ഒരു കാര്യം മനസ്സിനെ വല്ലാതെ കുഴപ്പിക്കുമായിരുന്നു. അന്നും ഇന്നും എപ്പോഴും മനസ്സിൽ സിനിമ മാത്രമാണ് നടക്കുമ്പോഴും ഇരിക്കുമ്പോഴും കിടക്കുമ്പോഴും ഉണ്ണുമ്പോഴും ഉറങ്ങുമ്പോഴും ഉറങ്ങാത്തപ്പോഴും എപ്പോഴും എവിടെയോ ഒരു ക്യാമറ വച്ചിട്ടുണ്ട്.
പൌലോ കൊയ്ലോ പറഞ്ഞതു പോലെ ഒരു കാര്യം നമ്മൾ തീവ്രമായി ആഗ്രഹിച്ചാൽ അത് നടത്തി തരാൻ ഈ ലോകം നമ്മുടെ കൂടെ നിക്കും അങ്ങനെ എനിക്കും ഒരു ലോകമുണ്ടായി സിനിമ സിനിമ സിനിമ എന്ന് പറഞ്ഞ് നടക്കുമ്പോൾ വേറെ വെല്ല പണിക്കും പോടാ എന്ന് പറയാതെ എല്ലാം നടക്കും നമ്മൾ നടത്തും എന്ന് പറഞ്ഞ് കൂടെ കൂട്ടിയ സുഹൃത്തുക്കൾ. അവരെല്ലാവരും തന്നെ ക്യാമറക്ക് മുൻപിലും പിൻപിലും ഉള്ള സിനിമ അതാണ് എനിക്ക് തണ്ണീർമത്തൻ ദിനങ്ങൾ. ജീവിതത്തിൽ ഒരിക്കലെങ്കിലും നടക്കുമോ എന്ന ഒരു വലിയ ചോദ്യത്തിന്റെ ഉത്തരം കിട്ടിയ കുറെ കുറെ ദിനങ്ങൾ. തണ്ണീർമത്തൻ ദിനങ്ങൾ. സന്ദീപ് കുറിച്ചു.
ചിത്രത്തിൻ്റെ സംഗീത സംവിധായകൻ ജസ്റ്റിൻ വർഗ്ഗീസ് തണ്ണീർ മത്തൻ ദിനങ്ങളുടെ വാർഷികത്തിൽ വീഡിയോയും ചിത്രത്തിൻ്റെ എഴുത്തുകാരിൽ ഒരാളും നടനുമായ ഡിനോയ് പൌലോസ് ചിത്രത്തിൻ്റെ ഒരു വർഷത്തെ ഓർമ്മ ആരാധകരും സുഹൃത്തുക്കളുമായി പങ്കുവെക്കുകയും ചെയ്തു.
