നടന് ദുല്ഖര് സല്മാന്റെ ജന്മദിനത്തില് ഹൃദയസ്പര്ശിയായ കുറിപ്പ് പങ്കുവെച്ചിരിക്കുകയാണ് സംവിധായകന് അനൂപ് സത്യന്. ദുല്ഖറും അനൂപ് സത്യനും ഒന്നിച്ച വരനെ ആവശ്യമുണ്ട് എന്ന ചിത്രത്തിന്റെ ഷൂട്ടിംഗ് ക്ലിപ്പുകള്ക്കൊപ്പമാണ് അനൂപ് കുറിപ്പ് പങ്കുവെച്ചിരിക്കുന്നത്. പോസ്റ്റ്പ്രൊഡക്ഷന് സമയത്ത് ഉണ്ടായ വഴക്കുകളെ കുറിച്ചാണ് അനൂപ് കുറിച്ചത്. നഴ്സറി മുതല് എം.എസ്.സി വരെ ഒരേ ക്ലാസില് ഒരുമിച്ചു പഠിച്ച തന്റെ ഇരട്ടസഹോദരന് അഖിലിനെക്കുറിച്ചുള്ള ഓര്മകള് പങ്കുവച്ചാണ് അനൂപ് സത്യന് തന്റെ ലഘുകുറിപ്പ് ആരംഭിക്കുന്നത്. അഖിലുമായി ഉണ്ടാകാറുള്ള വഴക്കുകള് പോലെ പിന്നീട് സംഭവിച്ചിട്ടുള്ളത് ദുല്ഖറിനൊപ്പമായിരുന്നെന്നും അനൂപ് പറയുന്നു. അനൂപിന്റെ വാക്കുകള് ഇങ്ങനെ -
എന്റെ ജീവിതത്തിലെ ഏറ്റവും വലിയ വഴക്കിനെക്കുറിച്ചാണ് ഈ കുറിപ്പ്. 2007ലായിരുന്നു അത്. നഴ്സറി മുതല് എം.എസ്.സി വരെ ഒരേ ക്ലാസില് പഠിച്ച്, വര്ഷങ്ങളായി ഒരുമിച്ചു നടന്ന് ഞാനും എന്റെ ഇരട്ട സഹോദരനും ശരിക്കും പരസ്പരം മടുത്തിരുന്നു. ഇനി ഒരു നിമിഷം പോലും ഞങ്ങള്ക്ക് പരസ്പരം സഹിക്കാന് പറ്റില്ല എന്നു തോന്നിയ ദിവസം ഞങ്ങള് അക്ഷരാര്ത്ഥത്തില് അടിപിടി കൂടാന് തുടങ്ങി. കയ്യില്കിട്ടിയ കസേര വച്ച് എറിഞ്ഞൊക്കെയായിരുന്നു ആ അടിപിടി. ഞങ്ങള് തമ്മിലുള്ള ഈ വഴക്ക് കാണാന് നല്ല രസമായതുകൊണ്ടാണോ എന്നറിയില്ല, ഞങ്ങളുടെ ഹൗസ് ഓണര് അദ്ദേഹത്തിന്റെ അതിഥികളുമായെത്തി അവര്ക്കു ഞങ്ങളെ പരിചയപ്പെടുത്തി. 'ഞാന് പറഞ്ഞില്ലേ ആ പ്രശസ്തനായ സംവിധായകന്റെ ഇരട്ടക്കുട്ടികളെ പറ്റി. ഇവരാണ് അവര്'. അതോടെ പരസ്പരം ദേഹത്തു കൈവച്ചുള്ള വഴക്ക് ഞാന് അവസാനിപ്പിച്ചു. പിന്നെ എല്ലാം ഇമോഷണല് വഴക്കുകളായിരുന്നു. ഒരു രക്ഷയുമില്ലാത്ത അവസ്ഥയിലൊഴിച്ച്, അത്തരം വഴക്കുകളും ഞാന് പരമാവധി ഒഴിവാക്കാന് ശ്രമിക്കുമായിരുന്നു
ഈ വര്ഷം അത്തരത്തില് ഇമോഷണല് വഴക്ക് നടന്നത് ദുല്ഖറിന്റെ അടുത്താണ്. ആദ്യമായി ഞാന് സംവിധായകനായും ദുല്ഖര് നിര്മാതാവായും എത്തിയ ഞങ്ങളുടെ സിനിമയുടെ പോസ്റ്റ് പ്രൊഡക്ഷന് നടക്കുന്ന സമയത്ത്. ഞങ്ങള് തമ്മില് കടുത്ത അഭിപ്രായ വ്യത്യാസങ്ങളുണ്ടായിരുന്നു. വലിയ വാദപ്രതിവാദങ്ങള് നടന്നിട്ടുണ്ട്. പരസ്പരം എന്തൊക്കെയോ വിളിച്ചു പറഞ്ഞിട്ടുണ്ട്. എന്നാലും, ഇന്ന് അദ്ദേഹത്തിന്റെ ജന്മദിനം ആയതിനാല് സിനിമയിലെ ഏറ്റവും നല്ല വ്യക്തികളില് ഒരാളായി ഞാന് ആള്ക്കു വോട്ടു ചെയ്യും. സത്യം പറഞ്ഞാല്, ദുല്ഖര് ശരിക്കും അങ്ങനെ തന്നെയാണ്.
