വ്യത്യസ്ത രീതിയിലുള്ള പ്രണയാഭ്യര്ത്ഥനകള് നമ്മള് കണ്ടിട്ടുണ്ട്. കരയില് വെച്ചും ആകാശത്ത് വെച്ചുമൊക്കെ പ്രണയം പങ്കാളിയെ അറിയിക്കുന്നവരുണ്ട്. ഇപ്പോള് സോഷ്യല് മീഡിയയില് വൈറലാകുന്നത് വിവാഹ അഭ്യര്ഥന നടത്താനുണ്ടാക്കിയ ഒരുക്കങ്ങള് ഒരു അപകടത്തില് എത്തിച്ച ചിത്രങ്ങളാണ്. പ്രൊപ്പോസല് നടത്തി വീട് തന്നെ തീപിടിച്ച സംഭവമാണ് പുറത്ത് വരുന്നത്.
ബ്രിട്ടീഷുകാരനായ ആല്ബെര്ട്ട് നുഡ്ര്യുവായിരുന്നു നായകന്. ഇദ്ദേഹത്തിന് സംഭവിച്ച അപകടമായ പ്രൊപ്പോസല് കഥ സൗത്ത് യോക്ക്ഷൈറിലെ ഫയര്ഫോഴ്സ് ഡിപ്പാര്ട്ട്മെന്റാണ് തങ്ങളുടെ ഫെയ്സ്ബുക്ക് പേജിലൂടെ പങ്കുവെച്ചത്. ആല്ബെര്ട്ട് നുഡ്ര്യു തന്റെ പ്രണയിനിയായ വലേറിയ മെഡ്വികിനെ പ്രൊപ്പോസ് ചെയ്യാന് വീടിനുള്ളില് നൂറ് കണക്കിന് ടീലൈറ്റുകളും കാന്ഡിലുകളും കത്തിച്ചു വെച്ചു. മാത്രമല്ല വീട് നിറയെ ബലൂണുകള് കെട്ടി വൈന് നിറച്ച ഗ്ലാസുകളും ഒരുക്കി. സൗത്ത് വെസ്റ്റ് ന്യൂസ് സര്വീസിന്റെ റിപ്പോര്ട്ടനുസരിച്ച് 100ലധികം ടീ ലൈറ്റുകളും 60 ബലൂണുകളും ഇയാള് ഒരുക്കിയിരുന്നു. എന്നാല് എല്ലാം സെറ്റ് ചെയ്ത് കാമുകിയെ കൂട്ടികൊണ്ട് വരാനായി ഇയാള് പുറത്ത് പോയ സമയത്ത് വീട്ടില് തീപ്പിടിത്തം ഉണ്ടാകുകയായിരുന്നു.
ടീലൈറ്റുകളുടെ അരികില് കത്തിക്കാതെ വച്ച കാന്ഡിലുകളിലേക്കും തീ പടര്ന്ന് വീടു മുഴുവന് കത്തുകയായിരുന്നു. പ്രണയിനിയുമായി തിരിച്ചെത്തിയ ആല്ബെര്ട്ട് കണ്ടത് അപ്പാര്ട്ട്മെന്റില് നിന്ന് തീയും പുകയും ഉരുന്നതും ഫയര്ഫോഴ്സ് തീയണക്കുന്നതുമാണ്. 'ഫോട്ടോകള് സൂക്ഷിച്ചു നോക്കിയാല് കാണാം, നൂറ് കണക്കിന് ടീ ലൈറ്റുകള് കത്തിയെരിഞ്ഞിരിക്കുന്നത്..' - ചിത്രങ്ങള് പങ്കുവെച്ച് ഫയര്ഫോഴ്സ് ഡിപ്പാര്ട്ടമെന്റ് കുറിച്ചിരിക്കുന്നു. എന്നാല് തന്റെ പ്രണയാഭ്യര്ത്ഥനയില് നിന്ന് ആല്ബെര്ട്ട് പിന്മാറിയില്ല. കത്തിയെരിഞ്ഞ വീടിന് മുന്നില് നിന്ന് തന്നെ ആല്ബെര്ട്ട് വലേറിയയെ അങ്ങ് പ്രൊപ്പോസ് ചെയ്തു. ആല്ബെര്ട്ടിനോട് വലേറിയ സമ്മതം മൂളിയിട്ടുണ്ടെന്നാണ് റിപ്പോര്ട്ട്.
