ഓസ്ട്രിയൻ ബൈക്ക് നിർമാതാക്കളായ കെ ടി എം പരിഷ്കരിച്ച 250 ഡ്യൂക്ക് വിൽപ്പനയ്ക്കെത്തിച്ചു. ചില്ലറ പരിഷ്കാരങ്ങളോടെ എത്തുന്ന ഈ ഡ്യൂക്കിന്റെ വില മുൻഗാമിയെ അപേക്ഷിച്ച് 4,000 രൂപ അധികമാണ്. ബിഎസ് 6 നിലവാരമുള്ള എൻജിൻ സഹിതമെത്തുന്ന 2020 കെടിഎം 250 ഡ്യൂക്കിന് 2.09 ലക്ഷം രൂപയാണു ഡൽഹിയിലെ ഷോറൂം വില.
രണ്ടു ലക്ഷം രൂപയായിരുന്നു ബി എസ് ആറ് എൻജിൻ സഹിതം അവതരിപ്പിക്കുമ്പോൾ 250 ഡ്യൂക്കിന് വില; എന്നാൽ പിന്നീട് 5,000 രൂപയുടെ വർധന നിലവിൽ വന്നതോടെ വില 2.05 ലക്ഷമായി. പൂർണ എൽ ഇ ഡി ഹെഡ്ലൈറ്റ് ഘടിപ്പിച്ചതാണ് ‘250 ഡ്യൂക്കി’ലെ പ്രധാന പരിഷ്കാരം. നേരത്തെ ഈ ‘ഡ്യൂക്കി’ന്റെ ഹെഡ്ലാംപിലുണ്ടായിരുന്നത് ഹാലജൻ ബൾബുകളാണ്. ബൈക്കിൽ ഇപ്പോഴും എൽ സി ഡി യൂണിറ്റ് ലഭ്യമാണ്.
വൺ ടച് സ്റ്റാർട് സംവിധാനവും പരിഷ്കരിച്ച ‘250 ഡ്യൂക്കി’ലുണ്ട്. 248.8 സി സി, ലിക്വിഡ് കൂൾഡ്, സിംഗിൾ സിലിണ്ടർ എൻജിനാണ് ബൈക്കിനു കരുത്തേകുന്നത്; 30 ബി എച്ച് പിയോളം കരുത്തും 24 എൻ എം ടോർക്കും സൃഷ്ടിക്കാൻ ഈ എൻജിനാവും. സുരക്ഷയ്ക്കായി ഇരട്ട ചാനൽ എ ബി എസ് സഹിതമെത്തുന്ന ‘ബി എസ് ആറ് 250 ഡ്യൂക്കി’ൽ ‘സൂപ്പർ മോട്ടോ’ മോഡും കെ ടി എം ഒരുക്കിയിട്ടുണ്ട്; പിൻ ചക്രത്തിലെ എ ബി എസ് ഡിസേബിൾ ചെയ്യാനുള്ള സൗകര്യമാണിത്.
