കൊച്ചി : സ്വപ്നയും സരിത്തും സന്ദീപുമെല്ലാം സ്വര്‍ണ്ണക്കടത്തിന് പുറമേ കള്ളപ്പണം വെളുപ്പിക്കാനും ഉന്നത സ്വാധീനം ഉപയോഗപ്പെടുത്തിയിരുന്നതായി എന്‍ഐഎ. പ്രതികളുടെ 5 ദിവസത്തെ അധിക കസ്റ്റഡി ആവശ്യപ്പെട്ടെങ്കിലും പ്രിൻസിപ്പൽ സെഷൻസ് കോടതി 4 ദിവസത്തെ കസ്റ്റഡി അനുവദിച്ചു. അതിനിടയില്‍ പ്രതികള്‍ ഹവാല വഴി പണം സമാഹരിച്ച് ഹവാലവഴി വിദേശത്ത് എത്തിച്ചാണ് തിരുവനന്തപുരത്ത് സ്വര്‍ണ്ണക്കടത്ത് നടത്തിയതെന്ന കസ്റ്റംസും ഹൈക്കോടതിയില്‍ ജാമ്യാപേക്ഷയെ എതിര്‍ത്ത് നല്‍കിയ ഹര്‍ജിയില്‍ വ്യക്തമാക്കിയിട്ടുണ്ട്.
സ്വര്‍ണ്ണക്കടത്ത് കേസ് പ്രതികളുടെ ജാമ്യാപേക്ഷ എതിര്‍ത്ത കസ്റ്റംസും സമാന രീതിയിലുള്ള കണ്ടെത്തല്‍ ഹൈക്കോടതിയിലും നല്‍കിയിട്ടുണ്ട്. വന്‍ ശൃംഖലയുണ്ടാക്കി പണം സമാഹരിച്ചു ഹവാല വഴി വിദേശത്തെത്തിച്ചാണു തിരുവനന്തപുരത്തു സ്വർണ കള്ളക്കടത്തു നടത്തിയതെന്നാണ് കസ്റ്റംസ് പറഞ്ഞിരിക്കുന്നത്. പലരിൽ നിന്നും പണം സ്വരൂപിച്ച് ഹവാല വഴി വിദേശത്തെത്തിച്ചാണ് നയതന്ത്ര ചാനൽ വഴി സ്വർണം കടത്തിയത്.
ഇന്ത്യയിലേക്കു വൻതോതിൽ സ്വർണം കടത്തിയതിൽ കൂടുതൽ പേർ ഉണ്ടോയെന്നറിയണം. മുഹമ്മദ് അൻവർ വൻ കള്ളക്കടത്ത് സംഘത്തിലെ കണ്ണിയാണ്. കള്ളക്കടത്തിനുവേണ്ടി ഇയാൾ പണം ശേഖരിച്ചു. കേസിൽ പ്രതിയായ എടക്കാടൻ സെയ്തലവിയുടെ മൊഴിയിൽ നിന്നാണ് അൻവറിന്റെ പങ്കാളിത്തം വ്യക്തമായത്. സെയ്തലവിയുടെ സഹകാരിയാണ് ഇയാൾ. അൻവറിന്റെ സഹകാരികളാണ് എം.എ ഷമീം, സി.വി ജിഫ്സൽ എന്നിവർ.
ഷമീമിന്റെ ബിസിനസ് പങ്കാളിയാണു ജിഫ്സൽ. ഷാർഷ് ദ് അഫയർ റാഷിദ് ഖമീസ് അലിക്കുള്ള പാഴ്സൽ എന്ന പേരിൽ ബിൽ എൻട്രി ചെയ്തിട്ടുണ്ടെന്നും നിയമപ്രകാരം പിടിച്ചെടുക്കേണ്ടതായ വസ്തുക്കൾ ഇതിൽ ഉണ്ടെന്നും വിവരം ലഭിച്ചിരുന്നെന്നും കസ്റ്റംസ് കോടതിയെ അറിയിച്ചു. രേഖകൾ ഫോറിൻ പ്രിവിലേജ്ഡ് പഴ്സൻസ് (റെഗുലേഷൻസ് ഓഫ് കസ്റ്റംസ് പ്രിവിലേജസ്) നിയമം 1957 പ്രകാരമുള്ള നിബന്ധനകൾ അനുസരിച്ചല്ലെന്നും നിയമാനുസൃതം വേണ്ട ഒപ്പില്ലെന്നും സൂചനയുണ്ടായിരുന്നു.
എല്ലാ നടപടി ക്രമങ്ങളും പാലിച്ച് നടത്തിയ പരിശോധനയിൽ 14,82,00,010 രൂപ വിലമതിക്കുന്ന 30,244.900 ഗ്രാം സ്വർണം പിടിച്ചെടുത്തു. തുടർന്നാണു സരിത്, സ്വപ്ന, സന്ദീപ് തുടങ്ങിയവരെ അറസ്റ്റ് ചെയ്തതെന്നും കസ്റ്റംസ് അറിയിച്ചു.
Comments