അപ്രതീക്ഷിതമായിരുന്നു ഇന്ത്യൻ ക്രിക്കറ്റിന്റെ എക്കാലത്തെയും കൂൾ ക്യാപ്റ്റൻ എം.എസ് ധോണിയുടെ അന്താരാഷ്ട്ര കരിയറിൽ നിന്ന് വിരമിക്കൽ പ്രഖ്യാപനം. അതേ ഞെട്ടലിൽ തന്നെയായിരുന്നു ധോണിയെ സ്നേഹിക്കുന്ന ആരാധകരും. ധോണിയുടെ ഈ വിടവാങ്ങൽ തന്റെ ഹൃദയത്തെ ഏറെ സ്പർശിച്ചു എന്ന് പറയുകയാണ് നടൻ മാധവൻ.
"സഹോദരാ നിങ്ങളെന്നും ഒരേ സമയം സ്റ്റൈലിഷും വിനയമുള്ളവനുമാണ്. ഞാനെന്നും നിങ്ങളെ ആരാധിച്ചിരുന്നു. ഈ വിടവാങ്ങൽ ശൈലി എന്റെ ഹൃദയത്തെ വല്ലാതെ തൊട്ടു. എത്ര ഉചിതമായ ഗാനമാണ് നിങ്ങൾ തിരഞ്ഞെടുത്തത്. ഞാൻ ഒരേസമയം കരയുകയും ചിരിക്കുകയുമായിരുന്നു. നിങ്ങളുടെ ജീവിതത്തിലെ അടുത്ത ഘട്ടത്തിന് ദൈവം അനു ഗ്രഹിക്കട്ടെ. ഈ വർഷം ഒരുപാട് കാര്യങ്ങൾ ചെയ്യാൻ ഞങ്ങൾ നിർബന്ധിതരായി, പക്ഷേ ഇത് കനത്ത പ്രഹരമായി..ക്രിക്കറ്റ് എനിക്കിനി ഒരിക്കലും പഴയത് പോലാകില്ല". ധോണിക്കും ഒപ്പം വിരമിച്ച സുരേഷ് റെയ്നക്കും ഒപ്പമുള്ള ചിത്രം പങ്കുവച്ച് മാധവൻ കുറിച്ചു.
സ്വാതന്ത്രൃ ദിനത്തിന്റെ അന്നാണ് താൻ അന്താരാഷ്ട്ര ക്രിക്കറ്റിൽ നിന്നും വിരമിക്കുന്നതായി ധോണി പ്രഖ്യാപിച്ചത്. “നിങ്ങളുടെ സ്നേഹത്തിനും പിന്തുണയ്ക്കും ഒരുപാട് നന്ദി, ഇന്ന് 19.29 മുതൽ ഞാൻ വിരമിച്ചതായി കണക്കാക്കുക,” എന്നാണ് തന്റെ വിരമിക്കൽ പ്രഖ്യാപനമായി ധോണി ഇൻസ്റ്റാ ഗ്രാമിൽ കുറിച്ചത്.
ഇതിന് പിന്നാലെ സഹതാരം സുരേഷ് റെയ്നയും അന്താരാഷ്ട്ര ക്രിക്കറ്റിൽ നിന്ന് തന്റെ വിരമിക്കൽ പ്രഖ്യാപിച്ചു. “ധോണി, നിങ്ങളുടെ കൂടെ കളിക്കുന്നത് മനോഹരമായിരുന്നു. ഈ യാത്രയിൽ നിങ്ങളോടൊപ്പം ചേരുകയെന്ന മാർഗം ഞാൻ തിരഞ്ഞെടുക്കുന്നു, ഹൃദയം നിറഞ്ഞ അഭിമാനത്തോടെ. നന്ദി ഇന്ത്യ . ജയ് ഹിന്ദ്, ” റെയ്ന ഇൻസ്റ്റാ ഗ്രാമിൽ കുറിച്ചു.
