അന്തരിച്ച സംവിധായകന് സച്ചി അവസാനമായി സംവിധാനം ചെയ്ത ചിത്രമായിരുന്നു അയ്യപ്പനും കോശിയും. വന് വിജയമായ ചിത്രത്തില് പൃഥ്വിരാജും ബിജു മേനോനുമായിരുന്നു പ്രധാന വേഷങ്ങളിലെത്തിയത്. ചിത്രത്തിന്റെ വിജയം മറ്റ് ഭാഷകളിലെ താരങ്ങളുടേയും നിര്മ്മാതാക്കളുടേയും കണ്ണിലുടക്കുകയും ചെയ്തു. ചിത്രം ഹിന്ദിയിലേക്കും തെലുങ്കിലേക്കും റീമേക്ക് ചെയ്യപ്പെടുകയാണ്. തമിഴ് റീമേക്കിനെ കുറിച്ചും റിപ്പോര്ട്ടുകള് പറയുന്നുണ്ട്.
റാണ ദഗ്ഗുബട്ടിയാണ് തെലുങ്ക് റീമേക്കില് പൃഥ്വിരാജ് ചെയ്ത വേഷം ചെയ്യുന്നതെന്നാണ് റിപ്പോര്ട്ടുകള് പറയുന്നത്. അതേസമയം ആരായിരിക്കും ബിജു മേനോന് ചെയ്ത വേഷം ചെയ്യുക എന്നതായിരുന്നു ആരാധകരുടെ ചോദ്യം. പുറത്തു വരുന്ന പുതിയ റിപ്പോര്ട്ടുകള് പ്രകാരം ബിജു മേനോന്റെ അയ്യപ്പന് നായരെ തെലുങ്കില് അവതരിപ്പിക്കുന്ന സൂപ്പര് താരം പവന് കല്യാണ് ആയിരിക്കും.
തെലുങ്ക് മാധ്യമങ്ങളാണ് പവന് കല്യാണ് ചിത്രത്തിലേക്ക് എത്തുന്നതായി റിപ്പോര്ട്ട് ചെയ്തിരിക്കുന്നത്. പവന് കല്യാണിന്റെ ജന്മദിനമായ സെപ്തംബര് 2 ന് ഇത് സംബന്ധിച്ച അറിയിപ്പുണ്ടാകുമെന്നും റിപ്പോര്ട്ടുകള് പറയുന്നു. ഹിറ്റ് സിനിമകളുടെ സംവിധായകന് വെങ്കി അത്ലുരിയാകും ചിത്രം ഒരുക്കുകയെന്നും റിപ്പോര്ട്ടുകള് പറയുന്നു.
നേരത്തെ നന്ദമുരി ബാലകൃഷ്ണയും റാണ ദഗ്ഗുബട്ടിയും പ്രധാന വേഷങ്ങളിലെത്തുന്നുവെന്നായിരുന്നു റിപ്പോര്ട്ടുകള്. എന്നാല് ബാലയ്യ ചിത്രത്തില് അഭിനയിക്കുന്നില്ലെന്ന് പിന്നീട് സ്ഥിരീകരിക്കപ്പെടുകയായിരുന്നു. പൃഥ്വിരാജും ബിജു മേനോനും തകര്ത്തഭിനയിച്ച ചിത്രത്തിന്റെ ഹിന്ദി റീമേക്കും ഒരുങ്ങുന്നുണ്ട്. ജോണ് എബ്രഹാമാണ് ഹിന്ദി റീമേക്കിന്റെ അവകാശം സ്വന്തമാക്കിയത്.
