വര്ഷങ്ങളുടെ ഇടവേളയ്ക്ക് ശേഷം അന്വര് റഷീദ് തിരികെ വന്ന ചിത്രമായിരുന്നു ട്രാന്സ്. ഫഹദ് ഫാസിലിന്റെ ഗംഭീര പ്രകടനം കൊണ്ടും മേക്കിങ് കൊണ്ടും ചിത്രം ഏറെ ചര്ച്ചയായി മാറിയിരുന്നു. അമല് നീരദായിരുന്നു ചിത്രത്തിന്റെ ഛായാഗ്രഹണം. ഇപ്പോഴിതാ ചിത്രത്തെ കുറിച്ച് അധികമാര്ക്കും അറിയാത്തൊരു വസ്തുത പങ്കുവച്ചിരിക്കുകയാണ് അന്വര് റഷീദ്. അമല് നീരദും ഫഹദ് ഫാസിലും പ്രതിഫലം വാങ്ങാതെയാണ് ചിത്രം പൂര്ത്തിയാക്കിയതെന്ന് അന്വര് പറയുന്നു. ഒരു മാധ്യമത്തിന് നല്കിയ അഭിമുഖത്തിലാണ് അന്വര് റഷീദ് മനസ് തുറന്നത്.
'ട്രാന്സ് എനിക്ക് ഏറ്റവും പ്രിയപ്പെട്ട സിനിമകളിലൊന്നാണ്. അമലിനും ഫഹദിനും അത് അങ്ങനെ തന്നെയായിരിക്കും. ഞങ്ങളെ സംബന്ധിച്ച് ഫലത്തേക്കാളുപരി ആ പ്രക്രിയയായിരുന്നു പ്രധാനപ്പെട്ടത്. ഫഹദും അമലും ഒരു രൂപ പോലും പ്രതിഫലം വാങ്ങിയിട്ടില്ല. അവരുടെ വിശ്വാസത്തിനും സൗഹൃദത്തിനും ഞാന് കടപ്പെട്ടിരിക്കുന്നു'
അതേസമയം, ട്രാന്സിന് ശേഷം പുതിയ സിനിമയുമായി എത്തുകയാണ് അന്വര് റഷീദ്. ഇത്തവണ തമിഴിലാണ് അന്വര് റഷീദ് സിനിമയൊരുക്കുന്നത്. മൂന്ന് സിനിമകളാണ് നിര്മ്മിക്കാന് തീരുമാനിച്ചിരിക്കുന്നത്. അതില് ഒരെണ്ണം അന്വര് റഷീദ് സംവിധാനം ചെയ്യും. ഇത് തമിഴ് ചിത്രമായിരിക്കും. കെെതിയിലൂടെ പ്രേക്ഷകരുടെ ശ്രദ്ധ നേടിയ അര്ജുന് ദാസ് ആയിരിക്കും ചിത്രത്തില് നായകനാവുക. മറ്റൊരു ആവേശ വാര്ത്ത ഈ ചിത്രത്തിന് തിരക്കഥയൊരുക്കുന്നത് സംവിധായകന് മിഥുന് മാനുവല് തോമസ് ആയിരിക്കും.
നിര്മ്മിക്കുന്ന സിനിമകളില് ഒന്ന് സംവിധാനം ചെയ്യുന്നത് അല്ഫോണ്സ് പുത്രനായിരിക്കും. എന്നാലിത് നേരത്തെ അല്ഫോണ്സ് തമിഴില് ചെയ്യാനിരുന്ന മ്യൂസിക്കല് ചിത്രമായിരിക്കില്ല. പുതിയൊരു മലയാള ചിത്രമായിരിക്കുമെന്ന് അന്വര് അറിയിച്ചു. ചിത്രത്തില് ആരെല്ലാം ഉണ്ടാകും എന്ന് തീരുമാനിക്കുന്നതേയുള്ളൂവെന്നും അന്വര് അറിയിച്ചു.
മൂന്നാമത്തെ ചിത്രം ഒതളങ്ങാ തുരുത്തിന്റെ സിനിമ ആവിഷ്കാരമാണ്. വളരെ വലിയ വിജയമായി മാറിയ വെബ് സീരീസാണ് ഒതളങ്ങാ തുരുത്ത്. വെബ് സീരിസിലെ താരങ്ങളും സന്ദര്ഭങ്ങളും തന്നെയായിരിക്കും സിനിമയിലുമുണ്ടാവുക. എന്നാല് ചെറിയ ചില മാറ്റങ്ങളുമുണ്ടാകും. സീരിസ് ഒരുക്കിയ അംബൂജി തന്നെയാകും സിനിമയും സംവിധാനം ചെയ്യുക.
